1 Apaturi Israe curuacjãrã Õꞌacʉ̃ ĩꞌorõpʉ ñaꞌarõ weecãrã niwã. Na tojo weecã ĩꞌagʉ̃, Õꞌacʉ̃ narẽ filisteo masãrẽ wiacʉ niwĩ. Tojo weerã cuarenta cʉ̃ꞌmarĩ na dutise doca nicãrã niwã.

2 Niꞌcʉ̃ ʉmʉ Manoa wãmetigʉ Dan ya curuacjʉ̃ nicʉ niwĩ. Zoracjʉ̃ nicʉ niwĩ. Manoa nʉmo põꞌrãmarĩgõ nico niwõ. 3 Õꞌacʉ̃ cʉ̃ basuta nimigʉ̃, cʉ̃rẽ werecoꞌtegʉ weronojõ upʉsãjãnʉꞌcã* 13.3 Ĩꞌaña Gn 16.7 docapʉ ojaꞌquere. co tiro eta, aꞌtiro nicʉ niwĩ: “Mʉꞌʉ põꞌrãmarĩgõ niꞌi. Niꞌcãrõacãrẽ nijĩpaco waꞌa, niꞌcʉ̃ põꞌrãtigosaꞌa. 4 Ne vino, siꞌbioꞌquere sĩꞌrĩticãꞌña. Tojo nicã Moisé baꞌadutitiꞌquenojõrẽ baꞌaticãꞌña. 5 Mʉꞌʉ põꞌrãtiacjʉ ne poari seenoꞌña marĩgʉ̃sami. Cʉ̃ bajuati dʉporo Õꞌacʉ̃ yagʉ, Nazareo masʉ̃† 13.5 Nazareo masã nírõ, “Õꞌacʉ̃ yarã cũunoꞌcãrã nima”, nisĩꞌrĩrõ weeꞌe. Na Nazareo masã nirĩ curare vinorẽ, siꞌbioꞌquere ne sĩꞌrĩticãrã niwã. Na ye poarire seeticãrã niwã. Tojo nicã wẽrĩꞌcãrã upʉ tiropʉ waꞌaticãrã niwã. Nazareo masã sãjãrã, apeterore yoaticã tojo niseticũcãrã niwã. Apetero peꞌere na catiro põtẽorõ tojo sãjã, yapaticãrã niwã. cũunoꞌyutojagʉsami. Cʉ̃ Israe curuacjãrã filisteo masãrẽ daꞌracoꞌteꞌcãrãrẽ yʉꞌrʉweticã weenʉꞌcãgʉ̃sami”, nicʉ niwĩ.

6 Cʉ̃ tojo níca beꞌro Manoa nʉmo marãpʉ tiropʉ waꞌa, aꞌtiro ni wereco niwõ: “Õꞌacʉ̃ oꞌóꞌcʉ yʉꞌʉ tiro etami. Õꞌacʉ̃ cʉ̃ basuta nimigʉ̃, cʉ̃rẽ werecoꞌtegʉ weronojõ upʉsãjãnʉꞌcãꞌcʉ bajuami. ‘¿Noꞌocjʉ̃ niti mʉꞌʉ?’ ni sẽrĩtiñaꞌtiasʉ. Cʉ̃ quẽꞌrã cʉ̃ wãmerẽ weretiami. 7 Aꞌtiro niami: ‘Mʉꞌʉ nijĩpaco waꞌa, niꞌcʉ̃ põꞌrãtigosaꞌa. Niꞌcãcã meꞌrã ne vinorẽ, siꞌbioꞌquere sĩꞌrĩticãꞌña. Moisé baꞌadutitiꞌquenojõrẽ baꞌaticãꞌña. Cʉ̃ wĩꞌmagʉ̃ ne bajuaꞌcʉ téé wẽrĩgʉ̃pʉ Õꞌacʉ̃ yagʉ nazarero masʉ̃ nigʉ̃sami,’ niami”, ni wereco niwõ.

8 Co tojo nicã tʉꞌogʉ, Manoa Õꞌacʉ̃rẽ aꞌtiro ni sẽrĩcʉ niwĩ: “Õꞌacʉ̃, mʉꞌʉ ʉ̃sãrẽ oꞌóꞌcʉre apaturi ʉ̃sã tiropʉ oꞌóya tja. Cʉ̃ wĩꞌmagʉ̃ bajuacjʉre deꞌro wee masõrãsari, ni weregʉ aꞌtiato”, nicʉ niwĩ.

9 Õꞌacʉ̃ cʉ̃ sẽrĩsere tʉꞌo, Manoa nʉmo cãpũpʉ nigõrẽ cʉ̃ basuta nimigʉ̃, cʉ̃rẽ werecoꞌtegʉ weronojõ upʉsãjãnʉꞌcã, apaturi core bajuacʉ niwĩ. Co marãpʉ Manoa peꞌe co meꞌrã marĩcʉ niwĩ. 10 Cʉ̃ bajuacã ĩꞌagõ, sojaro meꞌrã co marãpʉre werego waꞌaco niwõ:

—Cãrʉ̃ yʉꞌʉ ĩꞌaꞌcʉ apaturi bajuami tja, nico niwõ.

11 Co tojo nicã tʉꞌogʉ, Manoa wãꞌcãnʉꞌcã, cʉ̃ nʉmorẽ sirutuwãꞌcã, cʉ̃ tiropʉ ejacʉ niwĩ.

—¿Mʉꞌʉta niti yʉꞌʉ nʉmo meꞌrã ucũꞌcʉ? ni sẽrĩtiñaꞌcʉ niwĩ.

—Ʉ̃ʉ, cʉ̃ta niꞌi, nicʉ niwĩ.

12 Cʉ̃ tojo nicã tʉꞌogʉ, Manoa cʉ̃rẽ aꞌtiro nicʉ niwĩ:

—Mʉꞌʉ wereꞌque queoro waꞌacã, ¿ʉ̃sã deꞌro wee wĩꞌmagʉ̃rẽ masõrãsari? ¿Deꞌro weerãsari cʉ̃ meꞌrã? ni sẽrĩtiñaꞌcʉ niwĩ.

13 Õꞌacʉ̃ cʉ̃ basuta nimigʉ̃, cʉ̃rẽ werecoꞌtegʉ weronojõ upʉsãjãnʉꞌcã, cʉ̃rẽ aꞌtiro yʉꞌticʉ niwĩ:

—Mʉꞌʉ nʉmo nipeꞌtise yʉꞌʉ core wereꞌquere weeato. 14 Ne cãꞌrõ ʉꞌsedʉcaco, tojo nicã vino, siꞌbioꞌquere sĩꞌrĩticãꞌto. Te ʉꞌsepaganojõ meꞌrã weeꞌque quẽꞌrãrẽ baꞌaticãꞌto. Tojo nicã Moisé baꞌadutitiꞌquenojõrẽ baꞌaticãꞌto. Nipeꞌtise yʉꞌʉ core dutiꞌquere weeato, nicʉ niwĩ.

15 Beꞌro Manoa cʉ̃rẽ aꞌtiro nicʉ niwĩ:

—Mʉꞌʉ ʉ̃sã meꞌrã tojáníña yujupʉ. Mʉꞌʉ baꞌacã, niꞌcʉ̃ cabracãrẽ wẽjẽ, doꞌarãtirã weeꞌe.

16 Cʉ̃ peꞌe Manoarẽ yʉꞌticʉ niwĩ:

—Mʉsã yʉꞌʉre tojadutimicã, mʉsã baꞌasere baꞌasome. Mejõ peꞌe Õꞌacʉ̃rẽ cabracãrẽ wẽjẽ ʉ̃jʉ̃amorõpeoya. Manoa cʉ̃ “Õꞌacʉ̃ cʉ̃ basuta nimigʉ̃, cʉ̃rẽ werecoꞌtegʉ weronojõ upʉsãjãnʉꞌcãmi”, ni masĩticʉ niwĩ.

17 Beꞌro Manoa cʉ̃rẽ nicʉ niwĩ:

—¿Deꞌro wãmetiti mʉꞌʉ? Mʉꞌʉ ʉ̃sãrẽ wereꞌque queoro waꞌacã ĩꞌarã, ãpẽrã tʉꞌoropʉ mʉꞌʉrẽ “Diacjʉ̃ta wereapĩ”, nirãsaꞌa, nicʉ niwĩ.

18 Cʉ̃ peꞌe Manoarẽ yʉꞌticʉ niwĩ:

—¿Deꞌro weegʉ yʉꞌʉ wãmerẽ masĩsĩꞌrĩti? Yʉꞌʉ werecãma, mʉsã tʉꞌomarĩa waꞌabosaꞌa, nicʉ niwĩ.

19 Beꞌro Manoa cabracãrẽ wẽjẽ, tojo nicã otese dʉca perire míí, ʉ̃tã buꞌipʉ ʉ̃jʉ̃amorõpeo, Õꞌacʉ̃rẽ eꞌcatipeocʉ niwĩ. Manoa, cʉ̃ nʉmo na ĩꞌarĩ cura Õꞌacʉ̃ na ĩꞌatiꞌquenojõrẽ ĩꞌocʉ niwĩ. 20 Pecameꞌe oꞌme mʉjãarĩ cura Õꞌacʉ̃ cʉ̃ basuta nimigʉ̃, cʉ̃rẽ werecoꞌtegʉ weronojõ upʉsãjãnʉꞌcã, oꞌme waꞌteropʉ mʉjãa waꞌacʉ niwĩ. Tojo weecã ĩꞌarã, Manoa, cʉ̃ nʉmo diꞌtapʉ paamuꞌrĩqueꞌacãrã niwã. 21 Cʉ̃ narẽ apaturi bajuaticã, Manoa “Õꞌacʉ̃ cʉ̃ basuta nimigʉ̃, cʉ̃rẽ werecoꞌtegʉ weronojõ upʉsãjãnʉꞌcãpĩ”, ni masĩcʉ niwĩ.

22 Tojo weegʉ cʉ̃ nʉmorẽ nicʉ niwĩ:

—Marĩ Õꞌacʉ̃rẽ ĩꞌapʉ. Tojo weerã marĩ wẽrĩrãsaꞌa, nicʉ niwĩ.

23 Cʉ̃ nʉmo peꞌe nico niwõ:

—Õꞌacʉ̃ marĩrẽ wẽjẽsĩꞌrĩgʉ̃, aꞌte marĩ ʉ̃jʉ̃amorõpeoꞌquere, tojo nicã otese dʉca peri marĩ oꞌoꞌquere ñeꞌetibopĩ. Aꞌtere ĩꞌotibopĩ. Tojo nicã, marĩrẽ aꞌtere weretibopĩ, nico niwõ.

24 Beꞌro Manoa nʉmo wĩꞌmagʉ̃rẽ põꞌrãtigo, cʉ̃rẽ Sansón wãmeyeco niwõ. Wĩꞌmagʉ̃ bʉcʉacã, Õꞌacʉ̃ cʉ̃rẽ añurõ weecʉ niwĩ. 25 Siapeꞌe meꞌrã bʉcʉa, niꞌcã nʉmʉ Sansón Dan ya curuacjãrã ya diꞌtapʉ nirĩ cura Espíritu Santu cʉ̃pʉre sãjãnʉꞌcãcʉ niwĩ. Zora, Estaol wãmetise macãrĩ waꞌteropʉ tojo waꞌacaro niwʉ̃.