17 Faraṍ Israe curuacjãrãrẽ duꞌuwĩrõcaterore Õꞌacʉ̃ narẽ filisteo masã nirĩ diꞌta yʉꞌrʉtẽrĩrĩ maꞌapʉ miaticʉ niwĩ. Ti maꞌa diacjʉ̃ca maꞌa nimicã, aꞌtiro wãcũcʉ niwĩ: “Filisteo masã na meꞌrã aꞌmewẽjẽsĩꞌrĩcã, na uirã, aꞌmewẽjẽrõnojõ oꞌorã, Egiptopʉ dajatojabosama”, nicʉ niwĩ. 18 Tojo weegʉ Maa Sõꞌarĩ maapʉ waꞌadutigʉ, masã marĩrõ, yucʉ marĩrõ nirĩ maꞌa peꞌe beꞌtoawãꞌcãcã weecʉ niwĩ. Israe curuacjãrã Egipto diꞌtare wijarã, surara aꞌmewẽjẽrã waꞌarã weronojõ wijawãꞌcãcãrã niwã.

19 Moisé cʉ̃ José mijĩ ye õꞌarĩ mejãrẽ miacʉ niwĩ. Todʉporopʉ José Israe curuacjãrãrẽ tojo weeduticʉ niwĩ. Titare José narẽ nicʉ niwĩ:

“Õꞌacʉ̃ mʉsãrẽ diacjʉ̃ta weetamugʉ̃ aꞌtigʉsami. Te tojo waꞌacã, ye õꞌarĩ mejãrẽ mʉsã miaña. Õꞌacʉ̃ wãme meꞌrã ‘Tojota weerãti’, niña”, nicʉ niwĩ.

20 Israe curuacjãrã Sucore wija, téé Etam wãmetiro masã marĩrõ, yucʉ marĩrõ sumutopʉ tojaqueꞌacãrã niwã. 21 Õꞌacʉ̃ na dʉporo waꞌayucʉ niwĩ. Ʉmʉcjore oꞌmepõꞌrã meꞌrã narẽ maꞌa sʉꞌori ĩꞌogʉ̃, baꞌpaticʉ niwĩ. Ñami peꞌere niꞌcã pecameꞌe ʉ̃jʉ̃rĩ põꞌrã meꞌrã, narẽ sĩꞌoo, baꞌpaticʉ niwĩ. Cʉ̃ tojo weecã, ñami, ʉmʉco waꞌamʉjãcãrã niwã. 22 Oꞌmepõꞌrã peꞌe ʉmʉcore na dʉporo ʉꞌmʉtãcaro niwʉ̃. Ñami peꞌema pecameꞌe ʉ̃jʉ̃rĩ põꞌrã ʉꞌmʉtãcaro niwʉ̃. Tojo diaꞌcʉ̃ waꞌanuꞌcũcãꞌcaro niwʉ̃.