Juã ojamʉꞌtãca pũrĩ niꞌi
Aꞌti pũrĩ aꞌtiro weero ojanoꞌpã nise niꞌi
Ãꞌrĩ judío masʉ̃ Zebedeo macʉ̃ Santiago acabiji nicʉ niwĩ.
Aꞌtere ojacʉ niwĩ. Jesucristore ẽjõpeorãrẽ nisoose meꞌrã buꞌerãrẽ tʉꞌomasĩdutigʉ ojacʉ niwĩ. Tojo nicã Jesucristore ẽjõpeonuꞌcũdutigʉ, queoro weenuꞌcũdutigʉ ojacʉ niwĩ. Maꞌise peꞌere apeye yʉꞌrʉoro weenuꞌcũdutigʉ ojacʉ niwĩ.
Cʉ̃́ta ape pũrĩ Jesucristo catiri ʉmʉco cjasere ojacʉ niwĩ.
1
Jesucristo ye queti niꞌi
1-2 Yʉꞌʉ mʉsãrẽ Jesucristo ye cjasere, cʉ̃ nisetisere ojagʉ weeꞌe. Aꞌtiro niꞌi. Aꞌti turi weese dʉporo cʉ̃, cʉ̃ pacʉ meꞌrã nitojacʉ niwĩ. Beꞌro aꞌti turipʉre bajuacʉ niwĩ. Cʉ̃ catinuꞌcũgʉ̃ marĩrẽ catinuꞌcũcã weegʉ́ nimi. Ʉ̃sã cʉ̃rẽ ĩꞌawʉ̃. Cʉ̃ ucũsere tʉꞌowʉ. Ʉ̃sã basu warota cʉ̃rẽ ĩꞌabutiawʉ. Cʉ̃rẽ añurõ masĩwʉ̃. Tojo weerã cʉ̃rẽ ĩꞌaꞌquere mʉsãrẽ wereꞌe. 3 Ʉ̃sã marĩ pacʉ Õꞌacʉ̃ meꞌrã, tojo nicã cʉ̃ macʉ̃ Jesucristo meꞌrã añurõ nicãꞌa. Mʉsã quẽꞌrãrẽ tojota ʉasãsaꞌa. Tojo weerã ʉ̃sã ĩꞌaꞌquere, tʉꞌoꞌquere mʉsãrẽ wereꞌe. 4 Mʉsãrẽ añurõ eꞌcatiato nígʉ̃ aꞌti pũrĩrẽ ojaꞌa.
Õꞌacʉ̃ añugʉ̃ nimi nise queti niꞌi
5 Jesucristo ʉ̃sãrẽ buꞌeꞌquere mʉsãrẽ wereturiaꞌa. Cʉ̃ aꞌtiro niwĩ: “Õꞌacʉ̃ añugʉ̃ nimi. Cʉ̃pʉre ne ñaꞌase marĩꞌi. Cʉ̃ sĩꞌose weronojõ nimi. Naꞌitĩꞌase weronojõ nitimi”, niwĩ. 6 Marĩ aꞌtiro nibosaꞌa: “Õꞌacʉ̃ meꞌrã añurõ nicãꞌa”, nibosaꞌa. Tojo nimirã ñaꞌarõ wéérã, nisoorã weesaꞌa. Marĩ weesetise, marĩ ye ucũse ʉseri meꞌrã tojo weesaꞌa. 7 Õꞌacʉ̃ añurõ weemi. Marĩ Õꞌacʉ̃ weronojõ añurõ wéérã pũrĩcã, ãpẽrã meꞌrã añurõ nisetimasĩꞌi. Cʉ̃ macʉ̃ Jesucristo wẽrĩse meꞌrã nipeꞌtise marĩ ñaꞌarõ nisetisere dʉcayunuꞌcũmi.
8 Marĩ ñaꞌase cʉomirã ñaꞌase mooꞌo nírã, marĩ basuta nisoorã weeꞌe. Marĩ wãcũse diacjʉ̃ niweꞌe. 9 Õꞌacʉ̃ queoro weenuꞌcũgʉ̃ marĩ ñaꞌarõ weeꞌquere diacjʉ̃ wereyʉꞌrʉcã, queorota marĩrẽ acobojogʉsami. Nipeꞌtise marĩ ñaꞌarõ weesetiꞌquere coepeꞌocʉ̃sami. 10 Õꞌacʉ̃ aꞌtiro nicʉ niwĩ: “Masã nipeꞌtirã ñaꞌarã nima”, nicʉ niwĩ. “Marĩ ñaꞌarõ weeweꞌe” nírã, “Õꞌacʉ̃ nisoosepijagʉ nimi”, nirã weebosaꞌa. Cʉ̃ ucũsere ẽjõpeotirã weronojõ nibosaꞌa.