1 Õꞌacʉ̃ dutise cũuꞌquere wéréca beꞌro Moisére nicʉ niwĩ:

—Aarṍ, cʉ̃ põꞌrã Nadab, Abihú, ãpẽrã setenta Israe curuacjãrã wiorã meꞌrã aꞌto yʉꞌʉ nirõpʉ mʉjãtia. Mejõ yoacurero tojato. Topʉ paamuꞌrĩqueꞌato. 2 Mʉꞌʉ seꞌsaro yʉꞌʉ tiropʉre ejaya. Masã peꞌe mʉꞌʉ meꞌrã ne pʉꞌtoacãpʉ mʉjãtinemoticãꞌto, nicʉ niwĩ.

3 Moisé masã tiropʉ waꞌa, nipeꞌtise Õꞌacʉ̃ níꞌquere, tojo nicã cʉ̃ dutiꞌquere masãrẽ weregʉ waꞌacʉ niwĩ. Cʉ̃ tojo werecã tʉꞌorã, nipeꞌtirãpʉta niꞌcãrõnojõ wãcũseti, yʉꞌticãrã niwã:

—Nipeꞌtise Õꞌacʉ̃ ʉ̃sãrẽ weedutiꞌquere weerãti, nicãrã niwã.

4 Tere tʉꞌogʉ, Moisé nipeꞌtise Õꞌacʉ̃ dutiꞌquere ojaõꞌocʉ niwĩ. Ape nʉmʉ peꞌe ñamiñaꞌcũrõ wãꞌcã, niꞌcãrõ Õꞌacʉ̃rẽ ẽjõpeorã waꞌicʉrãrẽ ʉ̃jʉ̃amorõpeoatjore ʉ̃rʉ̃gʉ̃ dʉꞌpocã́pʉ niꞌcã mesã ʉ̃tã meꞌrã seeneocũucʉ niwĩ. Tojo nicã docepaga ʉ̃tãpaga te Israe curarinʉcʉ̃rẽ niꞌcãrẽpaga miinʉꞌcõcʉ niwĩ. 5 Beꞌro niꞌcãrẽrã maꞌmapjia Israe curuacjãrãrẽ waꞌicʉrã wẽjẽdutigʉ oꞌócʉ niwĩ. Narẽ Õꞌacʉ̃rẽ eꞌcatipeorã, waꞌicʉrãrẽ ʉ̃jʉ̃amorõpeoduticʉ niwĩ. Tojo nicã, apeyema Õꞌacʉ̃ narẽ añurõ weeato nírã, wecʉa ʉmʉarẽ wẽjẽ, ʉ̃jʉ̃amorõpeoduticʉ niwĩ. 6 Moisé deco meꞌrã díre mii, bapari pacapʉ piosãacʉ niwĩ. Apeye dʉꞌsasere waꞌicʉrãrẽ ʉ̃jʉ̃amorõpeoropʉ piopeocʉ niwĩ. 7 Tuꞌajanʉꞌcõ, Moisé “Õꞌacʉ̃ masã meꞌrã aꞌtiro apogʉti” ni ojáca turipʉre mii, masãrẽ buꞌeĩꞌocʉ niwĩ. Tere tʉꞌorã, na peꞌe aꞌtiro nicãrã niwã:

—Nipeꞌtise marĩ wiogʉ Õꞌacʉ̃ marĩrẽ weedutiꞌquere weerãti. Cʉ̃ dutisere yʉꞌtirãti, nicãrã niwã.

8 Beꞌro Moisé díre mii, masãpʉre tere wẽeste, aꞌtiro nicʉ niwĩ:

—Aꞌte dí meꞌrã Õꞌacʉ̃ “Masã meꞌrã tojo weegʉti” níꞌquere diacjʉ̃ta cʉ̃ dutiꞌquenojõta weegʉsami, ni masĩnoꞌo, nicʉ niwĩ Moisé.

9 Tere tuꞌajáca beꞌro Moisé Aarṍ, Nadab, Abihú, tojo nicã setenta Israe curuacjãrã wiorã meꞌrã ʉ̃rʉ̃gʉ̃pʉ mʉjãcʉ niwĩ. 10 Topʉ na Õꞌacʉ̃, Israe curuacjãrã wiogʉre ĩꞌacãrã niwã. Cʉ̃ ʉꞌtacũrõrẽ añuse yaꞌsase peri zafiro wãmetise peri asipaꞌacũñacaro niwʉ̃. Ʉꞌmʉse weronojõ yaꞌsameꞌrĩcãꞌcaro niwʉ̃. 11 Ãꞌrã Israe curuacjãrã wiorã Õꞌacʉ̃rẽ ĩꞌamicã, narẽ ne mejẽcã waꞌacã weeticʉ niwĩ. Na niꞌcãrõ meꞌrã baꞌa, sĩꞌrĩ weecãrã niwã.

12 Õꞌacʉ̃ Moisére aꞌtiro nicʉ niwĩ:

—Yʉꞌʉ tiro ʉ̃rʉ̃gʉ̃pʉ mʉjãtinemoña. Mʉjãti, topʉ yʉꞌʉre coꞌteya. Yʉꞌʉ ʉ̃tã meꞌrã weeꞌque pjĩrĩrẽ mʉꞌʉrẽ oꞌogʉti. Te pjĩrĩpʉ yʉꞌʉ ojaꞌque nipeꞌtise yʉꞌʉ weedutiꞌquere mʉꞌʉ Israe curuacjãrãrẽ weregʉsaꞌa.

13 Tere tʉꞌogʉ, Moisé, cʉ̃rẽ weetamugʉ̃ Josué meꞌrã ʉ̃rʉ̃gʉ̃ Õꞌacʉ̃ nirõpʉ mʉjãnemocʉ niwĩ. 14 Cʉ̃ mʉjãnemoati dʉporo wiorãrẽ aꞌtiro nicʉ niwĩ:

—Aꞌtota coꞌteya, téé ʉ̃sã dijaticãpʉ. Aarṍ, tojo nicã Hur mʉsã meꞌrã tojama. Noꞌo mʉsãrẽ mejẽcã waꞌacã, narẽ wereya, nicʉ niwĩ.

15 Tojo níca beꞌro Moisé ʉ̃rʉ̃gʉ̃pʉ mʉjãcʉ niwĩ. Tigʉre niꞌcã oꞌmecurua tuubiꞌacaro niwʉ̃. 16 Õꞌacʉ̃ cʉ̃ añurõ asistese ʉ̃rʉ̃gʉ̃ Sinaípʉ dijatacã, seis nʉmʉrĩrẽ omecurua tigʉre tuubiꞌacaro niwʉ̃. Ape nʉmʉ siete nʉmʉ nirĩ nʉmʉrẽ oꞌmecuruapʉta Õꞌacʉ̃ Moisére pijidijocʉ niwĩ. 17 Israe curuacjãrã Õꞌacʉ̃ asistesere ʉ̃rʉ̃gʉ̃ dʉposãrĩpʉ pecameꞌe ʉ̃jʉ̃acõꞌarõ weronojõ ĩꞌacãrã niwã. 18 Moisé ti oꞌmecuruapʉ sãjãa, tigʉ ʉ̃rʉ̃gʉ̃pʉ mʉjãnemocʉ niwĩ. Topʉre cuarenta ʉmʉcori, cuarenta ñamirĩ* Ĩꞌaña Gn 7.4 docapʉ ojaꞌquere. tojacʉ niwĩ.