Juã Jesucristo ye quetire ojaꞌque niꞌi
Aꞌti pũrĩ aꞌtiro weero ojanoꞌpã nise niꞌi
Ãꞌrĩ judío masʉ̃ Zebedeo macʉ̃, Santiago acabiji nicʉ niwĩ. Cʉ̃ paco Salomé wãmetico niwõ. Co Jesú paco María maꞌmio nico niwõ. Tojo weegʉ Jesú Juã basucʉ nicʉ niwĩ. Ne waropʉre Juã waꞌi wẽjẽrĩ masʉ̃ nicʉ niwĩ. Ãꞌrĩta Jesú besecṹúꞌcãrã waꞌterore cʉ̃ ʉpʉtʉ maꞌigʉ̃ waro nicʉ niwĩ. Cʉ̃, cʉ̃ maꞌmi Santiago meꞌrã tojo waꞌabosaꞌa nirõ marĩrõ ĩꞌoduarã niyucã, Jesú narẽ Boanerges pisucʉ niwĩ. Tojo nígʉ̃, “Bʉpo Põꞌrã” weronojõ pũrĩrõ ucũꞌu nígʉ̃, tojo nicʉ niwĩ. Juã Jesú meꞌrã sijagʉ cʉ̃ buꞌegʉ nicʉ niwĩ. Juãta Pedro meꞌrã Jesú masã́ca beꞌro cʉ̃rẽ sĩosõrõcũuocapepʉ oꞌmawãꞌcãcaterore Pedro dʉporo ti pepʉre ejamʉꞌtãcʉ niwĩ.
Aꞌti pũrĩ judío masã nitirãrẽ ojaꞌcaro weronojõ ojanoꞌcaro niwʉ̃. Tojo nicã Jesú buꞌesere sirutuꞌcãrã cʉ̃ yere na daꞌraꞌquere añurõ waro ojanoꞌbutiacaro niwʉ̃. Aꞌti pũrĩ ẽjõpeose cjasere, maꞌise cjasere ucũyʉꞌrʉnʉꞌcãꞌa. Aꞌti pũrĩ Jesure ẽjõpeodutiro cʉ̃ weesetiꞌcaronojõta, cʉ̃ ucũꞌcaronojõta ojanoꞌo.
1
Õꞌacʉ̃ macʉ̃ masʉ̃ weronojõ upʉtigʉ cʉ̃ aꞌtiꞌque niꞌi
1 Ne waropʉta aꞌti turi weese dʉporo Õꞌacʉ̃ macʉ̃ cʉ̃ meꞌrã nitojacʉ niwĩ. Õꞌacʉ̃ nisetisere ĩꞌoacjʉ cʉ̃ quẽꞌrã Õꞌacʉ̃ta nicʉ niwĩ. 2 Ne waropʉ Õꞌacʉ̃ meꞌrã ni dʉꞌpocã́titojacʉ niwĩ. 3 Õꞌacʉ̃ cʉ̃ macʉ̃ meꞌrã nipeꞌtisere weecʉ niwĩ. Nipeꞌtise cʉ̃ meꞌrã weenoꞌque niꞌi. 4 Õꞌacʉ̃ macʉ̃ catise peꞌtitise oꞌogʉ nimi. Tojo nicã aꞌti turicjãrãrẽ sĩꞌose weronojõ nimi. Cʉ̃ añusere, diacjʉ̃ cjasere ĩꞌomi. 5 Cʉ̃ aꞌti turicjãrã naꞌitĩꞌarõpʉ weronojõ nirãrẽ añusere cʉ̃ pacʉ ye cjasere ĩꞌogʉ̃ aꞌtigʉ weecʉ niwĩ. Naꞌitĩꞌase sĩꞌosere cãꞌmotaꞌamasĩtisaꞌa. Aꞌte weronojõ ñaꞌase cʉ̃rẽ põtẽoticaro niwʉ̃.
6 Õꞌacʉ̃ cʉ̃ macʉ̃ aꞌtise dʉporo ʉmʉ niꞌcʉ̃rẽ oꞌómʉꞌtãcʉ niwĩ. Cʉ̃ yʉꞌʉ weronojõ Juã wãmetiwĩ. 7 Juã Õꞌacʉ̃ macʉ̃ aꞌti turicjãrãrẽ sĩꞌoweegʉ aꞌtiatjere ucũmʉꞌtãgʉ̃ niwĩ. Nipeꞌtirã Õꞌacʉ̃ macʉ̃rẽ ẽjõpeoato nígʉ̃ tojo weewĩ. 8 Cʉ̃ aꞌti turicjãrãrẽ sĩꞌoweegʉ waro nitiwĩ. Tojo weronojõ oꞌogʉ, sĩꞌoweegʉ aꞌtiacjʉ ye cjasere weremʉꞌtãrĩ masʉ̃ aꞌticʉ niwĩ. 9 Titare sĩꞌogʉ̃́ waro Jesucristo aꞌti turipʉre bajuatojacʉ niwĩ. Cʉ̃́ta nipeꞌtirãrẽ Õꞌacʉ̃ ye cjasere ĩꞌocʉ niwĩ.
10 Maatapʉta Õꞌacʉ̃ cʉ̃ meꞌrã aꞌti diꞌtare weecʉ niwĩ. Cʉ̃ aꞌtopʉ nicã, cʉ̃ wééca diꞌtacjãrã nimirã, cʉ̃rẽ ĩꞌamasĩticãrã niwã. 11 Cʉ̃ ya diꞌtapʉ aꞌticʉ niwĩ. Tocjãrã cʉ̃ ya diꞌtacjãrã peꞌe cʉ̃rẽ ñeꞌetiwã. 12 Niꞌcãrẽrã cʉ̃rẽ ñeꞌe ẽjõpeowã. Nipeꞌtirã cʉ̃rẽ ẽjõpeorãrẽ Õꞌacʉ̃ põꞌrã sãjãcã weewĩ. 13 Õꞌacʉ̃ põꞌrã nise pacʉsʉmʉa põꞌrãtise weronojõ niweꞌe. Cʉ̃ macʉ̃rẽ ẽjõpeose meꞌrã peꞌe cʉ̃ põꞌrã ninoꞌo.
14 Õꞌacʉ̃ macʉ̃ Õꞌacʉ̃ nisetisere ĩꞌogʉ̃, aꞌti turipʉre aꞌticʉ niwĩ. Masʉ̃ ẽjãtjĩagʉ̃, ʉ̃sã meꞌrã niwĩ. Masãrẽ maꞌiyʉꞌrʉwĩ. Nipeꞌtise cʉ̃ ucũꞌque, tojo nicã cʉ̃ weeꞌque diacjʉ̃ niwʉ̃. Cʉ̃ Õꞌacʉ̃ weronojõ tutuayʉꞌrʉgʉ, añuyʉꞌrʉgʉ niwĩ. Cʉ̃ tojo weesetisere ĩꞌawʉ̃. Cʉ̃ Õꞌacʉ̃ macʉ̃ niꞌcʉ̃ta nimi. Tojo weegʉ cʉ̃ pacʉ weronojõ nimi. 15 Juã Õꞌacʉ̃ macʉ̃ ye quetire weregʉ, aꞌtiro niwĩ:
—Ãꞌrĩta nimi yʉꞌʉ mʉsãrẽ ucũꞌcʉ. Aꞌtiro nimiwʉ̃ba: “Beꞌropʉ niꞌcʉ̃ aꞌtigʉsami. Cʉ̃ yʉꞌʉ bajuase dʉporopʉ nitojacʉ niwĩ. Tojo weegʉ cʉ̃ yʉꞌʉ nemorõ nimi”, niwĩ Juã.
16 Marĩ nipeꞌtirã cʉ̃ añuse oꞌosere ñeꞌeticã weeweꞌe. Nipeꞌtirã ñeꞌenuꞌcũcãꞌa. 17 Õꞌacʉ̃ dutise Moisé meꞌrã oꞌonoꞌcaro niwʉ̃. Jesucristo meꞌrã peꞌe Õꞌacʉ̃ marĩrẽ maꞌisere masĩnoꞌo. Tojo nicã diacjʉ̃ cjasere masĩnoꞌo. 18 Ne niꞌcʉ̃ Õꞌacʉ̃rẽ ĩꞌaticʉ niwĩ. Cʉ̃ macʉ̃ niꞌcʉ̃ta cʉ̃ meꞌrã ninuꞌcũgʉ̃ cʉ̃ pacʉre marĩrẽ masĩcã weewĩ.
Juã masãrẽ wãmeyeri masʉ̃ Jesucristo ye cjasere wereꞌque niꞌi
(Mt 3.3,11-12; Mr 1.2-3,7-8; Lc 3.4-6,15-17)
19 Jerusalẽ́cjãrã judío masã wiorã, paꞌiare Juã tiropʉ sẽrĩtiñaꞌdutirã oꞌócãrã niwã. Tojo nicã Leví ya curuacjãrãrẽ oꞌócãrã niwã. Na cʉ̃ tiropʉ etarã, “¿Ñamʉnojõ waro nibutiamiti mʉꞌʉ?” niwã cʉ̃rẽ.
20 Cʉ̃ narẽ diacjʉ̃ yʉꞌtiwĩ:
—Yʉꞌʉ Õꞌacʉ̃ beseꞌcʉ Cristo mejẽta niꞌi.
21 Na cʉ̃rẽ apaturi sẽrĩtiñaꞌwã:
—¿To pũrĩcãrẽ ñamʉnojõ niti? ¿Mʉꞌʉ todʉporocjʉ̃ Õꞌacʉ̃ ye queti weremʉꞌtãrĩ masʉ̃ Elía mejẽta niti?
Juã narẽ yʉꞌtiwĩ:
—Niweꞌe.
Na cʉ̃rẽ apaturi sẽrĩtiñaꞌnemowã tja:
—¿Mʉꞌʉ sõꞌonícʉ Õꞌacʉ̃ yere weremʉꞌtãrĩ masʉ̃, masã na “Aꞌtiacjʉ niapʉ” na níꞌcʉ mejẽta niti?
Juã narẽ “Niweꞌe”, niwĩ.
22 Cʉ̃ tojo nicã tʉꞌorã, cʉ̃rẽ “¿To pũrĩcãrẽ ñamʉnojõ niti mʉꞌʉ? Ʉ̃sã queoro mʉꞌʉ yʉꞌtisere miasĩꞌrĩsaꞌa ʉ̃sãrẽ oꞌóꞌcãrã tiropʉ. ¿Mʉꞌʉ basu deꞌro tʉꞌoñaꞌti mʉꞌʉ?” ni sẽrĩtiñaꞌwã.
23 Juã narẽ yʉꞌtiwĩ:
—Dʉporocjʉ̃ Õꞌacʉ̃ ye queti weremʉꞌtãrĩ masʉ̃ Isaía wãmetigʉ níꞌcaronojõta “Niꞌcʉ̃ yucʉ marĩrõ, masã marĩrõpʉ caricũnuꞌcũbajaqueꞌatigʉsami” ninoꞌcʉ niꞌi. Isaía aꞌtiro nicʉ niwĩ:
Marĩ wiogʉ aꞌtiatji maꞌarẽ apoyuya.
Diacjʉ̃ca maꞌa, añurĩ maꞌa quẽꞌrã́rõ weronojõ weeyuya, ni ojacʉ niwĩ.
Marĩ wiogʉ aꞌtiati dʉporo mʉsã nisetisere apoyuya, mʉsã wãcũsere dʉcayuya nígʉ̃, tojo nicʉ niwĩ.
24-25 Juãrẽ sẽrĩtiñaꞌcãrã, fariseo masã oꞌóꞌcãrã cʉ̃rẽ sẽrĩtiñaꞌnemowã tja:
—To pũrĩcãrẽ mʉꞌʉ Õꞌacʉ̃ beseꞌcʉ Cristo, o Elía o sõꞌonícʉ Õꞌacʉ̃ ye queti weremʉꞌtãrĩ masʉ̃ nitimigʉ̃, ¿deꞌro weegʉ wãmeyeti?
26 Juã narẽ niwĩ:
—Yʉꞌʉ aco meꞌrã wãmeyeꞌe. Apĩ niꞌcʉ̃ mʉsã waꞌteropʉre mʉsã ĩꞌamasĩtigʉ nimi. 27 Cʉ̃ yʉꞌʉ beꞌro werenʉꞌcãgʉ̃sami. Beꞌropʉ werenʉꞌcãꞌcʉ nimigʉ̃, yʉꞌʉ nemorõ niyʉꞌrʉnʉꞌcãmi. Yʉꞌʉ peꞌe mejõ nigʉ̃ waro niꞌi. Cʉ̃ ye sapature tuweemasĩtigʉ weronojõ cʉ̃rẽ ne niꞌcãrõwijimasĩtisaꞌa, niwĩ Juã.
28 Aꞌte Betania wãmetiro Jordã́ wãmetiri maa siaquijipʉ tojo waꞌawʉ. Topʉ Juã masãrẽ wãmeyewĩ.
Õꞌacʉ̃ cʉ̃ beseꞌcʉ masãrẽ yʉꞌrʉoatje niꞌi
29 Tojo waꞌáca beꞌro ape nʉmʉ peꞌe Juã Jesú aꞌticã ĩꞌawĩ. Cʉ̃rẽ ĩꞌagʉ̃, aꞌtiro niwĩ:
—Ĩꞌaña, ãꞌrĩ nimi Õꞌacʉ̃ oꞌógʉ. Cʉ̃ oveja wĩꞌmagʉ̃ na wẽjẽ ʉ̃jʉ̃amorõpeogʉ weronojõ nimi. Cʉ̃ wẽrĩse meꞌrã aꞌti turicjãrã ñaꞌarõ weeꞌquere acobojogʉsami. 30 Yʉꞌʉ mʉsãrẽ todʉporopʉre aꞌtiro ucũgʉ̃, ãꞌrĩrẽta ucũwʉ̃. Aꞌtiro niwʉ̃:
—Beꞌropʉ niꞌcʉ̃ aꞌtigʉsami. Cʉ̃ yʉꞌʉ bajuase dʉporopʉ nitojacʉ niwĩ. Tojo weegʉ cʉ̃ yʉꞌʉ nemorõ nimi. 31 Yʉꞌʉmarĩcã cʉ̃rẽ masĩticãti. Masĩtimigʉ̃, Israe curuacjãrã cʉ̃rẽ masĩato nígʉ̃ narẽ aco meꞌrã wãmeyegʉ aꞌtiwʉ, niwĩ Juã.
32 Juã ninemowĩ tja:
—Cãrʉ̃ Espíritu Santu buja weronojõ bajugʉ dijati, ãꞌrĩ Jesú buꞌipʉ ejapejami. 33 Ne waro cʉ̃rẽ ne ĩꞌamasĩtiwʉ. Todʉporopʉ Õꞌacʉ̃ yʉꞌʉre aco meꞌrã wãmeyedutigʉ, aꞌtiro niwĩ: “Mʉꞌʉ Espíritu Santu dijati, niꞌcʉ̃pʉre ejapejacã ĩꞌagʉ̃saꞌa. Cʉ̃ masãrẽ Espíritu Santure oꞌoacjʉ nigʉ̃sami”, niwĩ Õꞌacʉ̃. 34 Aꞌte tojo waꞌacã, yʉꞌʉ cʉ̃rẽ ĩꞌamasĩwʉ̃. Tojo weegʉ mʉsãrẽ wereꞌe. Cʉ̃́ta nimi Õꞌacʉ̃ macʉ̃, ni werewĩ Juã.
Ne waro Jesú buꞌerã ninʉꞌcãꞌque niꞌi
35 Tojo waꞌáca beꞌro ape nʉmʉ Juã cʉ̃ wãmeyewʉaropʉta niwĩ tja. Ʉ̃sã pʉarã, yʉꞌʉ, tojo nicã André Juã buꞌerã niwʉ̃. 36 Titare Jesú ʉ̃sã pʉꞌto yʉꞌrʉacã ĩꞌagʉ̃, Juã aꞌtiro niwĩ:
—Ĩꞌaña, ãꞌrĩ nimi Õꞌacʉ̃ oꞌógʉ. Oveja wĩꞌmagʉ̃ weronojõ nimi.
37 Cʉ̃ tojo nisere tʉꞌorã, ʉ̃sã Juãrẽ sirutumiꞌcãrã Jesú peꞌere sirutunʉꞌcãwʉ̃. 38 Ʉ̃sã tojo weecã, Jesú ʉ̃sãrẽ majãmiĩꞌawĩ.
—¿Ñeꞌenojõrẽ ʉati? niwĩ.
Ʉ̃sã cʉ̃rẽ yʉꞌtiwʉ:
—Rabbí ¿noꞌopʉ niati mʉꞌʉ? niwʉ̃. Rabbí, ʉ̃sã ye meꞌrã nírõ, “Ʉ̃sãrẽ buꞌegʉ” nisĩꞌrĩrõ weeꞌe.
39 Cʉ̃ ʉ̃sãrẽ niwĩ:
—Teꞌa. Ĩꞌarã aꞌtia, niwĩ.
Ʉ̃sã cʉ̃ meꞌrã waꞌawʉ. Ñamicaꞌapʉ niyucã, cʉ̃ meꞌrã ninaꞌia waꞌawʉ.
40 André, yʉꞌʉ meꞌrã Jesure sirutugʉ, Simó Pedro acabiji niwĩ. 41 Cʉ̃, cʉ̃ maꞌmi Simórẽ maata aꞌmagʉ̃ waꞌawĩ. Cʉ̃rẽ nicʉ niwĩ:
—Mesías masãrẽ yʉꞌrʉoacjʉ, Õꞌacʉ̃ oꞌógʉti níꞌcʉre bocaejapʉ, nicʉ niwĩ. Mesías, Cristo Õꞌacʉ̃ beseꞌcʉ nisĩꞌrĩrõ weeꞌe.
42 André Simórẽ Jesú tiropʉ pijiejawĩ. Cʉ̃rẽ ĩꞌagʉ̃, Jesú aꞌtiro niwĩ:
—Mʉꞌʉ Simó niꞌi, Joná macʉ̃. Beꞌro mʉꞌʉ Cefas wãmetigʉsaꞌa, niwĩ. Cefas, ʉ̃sã ye meꞌrã nírõ, Pedro “ʉ̃tãgã” nisĩꞌrĩrõ weeꞌe.
Jesú Felipere, Natanaerẽ pijiꞌque niꞌi
43 Beꞌro cja nʉmʉ Jesú Galileapʉ waꞌasĩꞌrĩwĩ. Cʉ̃ topʉ waꞌase dʉporo Felipe wãmetigʉre bocaeja, niwĩ:
—Teꞌa yʉꞌʉ meꞌrã.
44 Felipe Betsaida wãmetiri macãcjʉ̃ niwĩ. Pedro quẽꞌrã, André cʉ̃ acabiji meꞌrã ti macãcjãrãta niwã. 45 Felipe Jesú “Teꞌa” nicã tʉꞌogʉ, Natanaerẽ pijigʉ waꞌawĩ. Cʉ̃ tiropʉ ejagʉ, cʉ̃rẽ nicʉ niwĩ:
—Ʉ̃sã Õꞌacʉ̃ beseꞌcʉ, Moisé cʉ̃ ya pũrĩpʉ ojaꞌcʉre bocaejapʉ. Õꞌacʉ̃ ye queti weremʉꞌtãrĩ masã quẽꞌrã cʉ̃rẽta ojacãrã niwã. Na ojaꞌcʉ Jesú Nazarecjʉ̃ José macʉ̃ na ninoꞌgʉ̃ niami.
46 Natanae cʉ̃rẽ nicʉ niwĩ:
—¿Mʉꞌʉ tʉꞌoñaꞌcã, Nazarepʉre añurã nibosari?
Felipe cʉ̃rẽ yʉꞌticʉ niwĩ:
—Teꞌa ĩꞌarã marĩ.
47 Jesú Natanae aꞌticã ĩꞌagʉ̃, cʉ̃rẽ niwĩ:
—Ãꞌrĩ nimi Israe curuacjʉ̃ waro. Õꞌacʉ̃ ʉaro queoro weegʉ́ nimi. Ne nisoose moomi.
48 Jesú tojo nicã tʉꞌogʉ, Natanae cʉ̃rẽ sẽrĩtiñaꞌwĩ:
—¿Deꞌro wee mʉꞌʉ yʉꞌʉre masĩti?
Jesú Natanaerẽ yʉꞌtiwĩ:
—Yʉꞌʉ mʉꞌʉrẽ Felipe pijise dʉporo ĩꞌatojapʉ. Mʉꞌʉ yucʉ higuera wãmeticjʉ docapʉ niapʉ.
49 Natanae cʉ̃rẽ niwĩ:
—Ʉ̃sãrẽ buꞌegʉ, mʉꞌʉ Õꞌacʉ̃ macʉ̃ Israe curuacjãrã wiogʉ niꞌi.
50 Jesú cʉ̃rẽ niwĩ:
—¿Mʉꞌʉ “Higueragʉ docapʉ niapʉ” niseacãrẽ tʉꞌogʉ, yʉꞌʉre ẽjõpeoti? Beꞌropʉre mʉꞌʉ aꞌte nemorõ añuse waro ĩꞌagʉ̃saꞌa, niwĩ.
51 Jesú ninemowĩ:
—Nirõta niꞌi. Beꞌropʉ mʉsã ʉꞌmʉse pãrĩcã ĩꞌarãsaꞌa. Yʉꞌʉ Õꞌacʉ̃ macʉ̃ masʉ̃ weronojõ upʉtigʉ niꞌi. Õꞌacʉ̃rẽ werecoꞌterã ʉꞌmʉsecjãrã yʉꞌʉ tiropʉ dijati, mʉjãamʉjãcã ĩꞌarãsaꞌa, niwĩ Jesú.