1 Ana za na kumbai do uri lyuwai aci a̱ a̱a̱dodoꞌo, na̱ vumava̱sula̱ ve epeꞌen, oɓolo na̱ a̱soja e le, reve me ene malingata ma̱ A̱sula̱ a̱ cipusa̱ diga zuva, u guza̱ ta̱ akani o ugbamu na̱ ma̱kpa̱tuꞌutsu ma̱ a̱a̱ka̱ri a̱ a̱ruꞌun lungu-lungu. 2-3 A̱vu malingataꞌa me reme aaganguꞌu, za na da̱na̱i yo diga ɗe za na fo a̱ tsu ɗe Mekerenkesu ko Male. A̱vu u tara akaniꞌi a̱vu u takpara yi. Reve u vari yi a̱tsuma̱ a̱ a̱a̱ka̱ri a̱ a̱ruꞌuꞌun. A̱vu u katsu una̱ntsu wa̱ a̱a̱ka̱ri a̱ a̱ruꞌuꞌun na̱ ma̱kpa̱tuꞌutsu ma na u da̱na̱i na̱ a̱yi uguzu o ukere, reve u to una̱ntsuꞌu cine za lo na aa gura kpa̱tuꞌwa̱ yi shi. Na̱ Mekerenkesu ma ciga ma ꞌyuwan u da̱na̱ pe hali aꞌwan ukpakukupa (1,000). A mantsa mo ndolo, waa gura luluma̱ ama o uvaɗi shi. Na aꞌwan o ndolo o koto, a̱vu malingataꞌa ma̱ ba̱ɗa̱ yi mantsa waꞌa.

4 Reve me ene nda̱na̱ta̱ n tsugono na̱ a̱bunda̱, waru aza a na a̱ ri ɗe nden aza a na A̱sula̱ a cayi ucira u na aa yuwan tsugono tsa ɗa. Kwisa̱ va aza a na nꞌyuwatan n kukoɗoi a aci e le a ɗa adama a na a dammai ikaka ya̱ Yesu oɓolo na adanshi a̱ A̱sula̱. Ama a nda a yuwaan a̱a̱dodoꞌo ko a̱a̱ma̱li a̱ yi a̱ga̱nda̱ shi, waru a̱ ushi urotsu wa̱ yi e icin i le ko e ekere e le shi. A̱ ka̱mba̱ ta̱ wuma reve a̱ da̱nu a̱ nda̱na̱ta̱ n tsugonoꞌo, a̱vu a yuwan tsugono oɓolo na̱ Kristi Zamawawa hali aꞌwan ukpakukupa (1,000). 5 A̱yi nda a̱yi ɗa mantsa mo ufaru ma na A̱sula̱ a̱a̱ ꞌya̱sa̱n ama diga o ukwa̱. (Akapi a̱ a̱kwa̱kwa̱ a̱a̱ ka̱mba̱ wuma shi, hali she na aꞌwan ukpakukupa o ndolo o koto.) 6 Aza a na A̱sula̱ a̱ ꞌya̱sa̱in a̱tsuma̱ o ukwa̱ a mantsa ma nda a yuwan ta̱ ma̱za̱nga̱ lon, ele ama a̱ yi a ɗa. Oo kototo le a̱tsuma̱ a mala ma akina shi, za na oꞌwoi ukwa̱ we ire. O to oꞌwo nan ganu a̱vu a yuwaan A̱sula̱ na̱ Zamawawa va̱ yi na u ɗangwai a̱ga̱nda̱, reve a yuwan tsugono oɓolo na̱ a̱yi hali aꞌwan ukpakukupa (1,000) o ndolo.

7-8 Nna aꞌwan ukpakukupaꞌa (1,000) o koto, malingataꞌa ma̱ ta̱ ba̱ɗa̱ Male uba̱ta̱ u na wu nla̱ niyi. Reve wu uta̱ a̱vu u pusa̱a̱n ama e iɗa aza a na a bazai a̱tsuma̱ o uvaɗi ugbozu. Iɗa i nda i ɗa a̱ tsu ɗe Gogu na̱ Magu. Maleꞌe mo to ɓoloto le uba̱ta̱ u ta̱, uba̱ta̱ u na aa yuwan uvon. A̱ ta̱ da̱na̱ a̱bunda̱ a na za lo aa gura kece le shi. 9 A baza ta̱ suru a̱tsuma̱ o uvaɗi reve a̱ ka̱nda̱ruwa̱ uva̱la̱ta̱ wa ama a̱ A̱sula̱ a̱yi ɗa lyuci na u cigai. Reve gba akina a̱ ta̱wa̱ diga zuva reve u kototo le. 10 A̱ shi ta̱ ɗe a vari a̱a̱dodoꞌo oɓolo na̱ vumava̱sula̱ ve epen va̱ yi a̱tsuma̱ a mala ma akina ma na ma̱ kulusa̱ na̱ farinwuta, reve waru a vari Mekerenkesuꞌu† pe, za na pusa̱yin ama a nda suru ugbozu. Akinaꞌa a ta zuwa suru nle o sowo a̱tsuma̱lima̱ ayin nu urana babu ukotu.

11 A̱vu me ene nda̱na̱ta̱ n tsugono n uri za na ri mgbain, reve me ene za na ri ɗe nden. Ana u rocoyi aciya̱yi, reve iɗa na̱ zuva puwa̱n waru ko za enishe le waru shi. 12 Waru me ene ta̱ aza a na a̱ kuwa̱i ɗe lo mishin a̱ ma̱ka̱ka̱n ma̱ nda̱na̱ta̱ n tsugonoꞌo, aza a na a̱ ri ama a gbagbain na akapi a ama a na a buwai. Reve a̱ kpa̱tuꞌwa̱ atagada a na a ɗanai ili i na vuma yuwain suru. Reve a̱ kpa̱tuꞌwisa̱ aatagada o ro, aatagada a na a ɗanai aza a̱ ri oɓolo na̱ A̱sula̱ kuci.* Idanshi ya aatagada i na a yuwayin ulinga u damma ta̱ “Aatagada a Ama a Wuma.” A yuwaan ta̱ aza a na a̱ kuwa̱i ɗe ugeꞌetosu e ili i na a yuwain, cine a̱ ri uɗanu a̱tsuma̱ a atagadaꞌa. 13 A̱vu ama a na a̱ kuwa̱i a̱tsuma̱ a mala e isawan a̱ ma̱ka̱ka̱n ma̱ nda̱na̱ta̱ n tsugonoꞌo, adama A̱sula̱ a yuwaan le ugeꞌetosu. Ukwa̱ oɓolo nu Ukwisa̱ a̱ ta̱wa̱a̱ na̱ a̱kwa̱kwa̱ a na a̱ ri pe a̱tsuma̱ e le, reve A̱sula̱ a yuwaan le ugeꞌetosu e ili i na a yuwain. 14 A̱vu a vari Ukwa̱ nu Ukwisa̱ a̱tsuma̱ a mala ma akina. (A̱yi mala ma akina ma nda, a̱yi ɗa ukwa̱ we ire.) 15 Reve a vari ama a̱tsuma̱ a mala ma akina,† ele ɗa aza a na a ɗanai ala e le a̱tsuma̱ a aatagada a ama a wuma shi.