12
Ka na aagangu
1 Reve me ene iroci i gbain ɗe zuva i na i zuwai za suru asalama. Ka da̱na̱ ta̱ lo, umuna u na gba wu nla̱i urana u ɗa. U kuru ta̱ ana a̱ yi o woto. Wo oto ta̱ ookokolo a na a̱ ri ni italyoꞌo kupa ne ejere a aaci. 2 U da̱nu ta̱ limatan, a̱vu mɓa̱la̱ na̱ a̱tsuma̱lima̱ a limataꞌan a zuwa yi yisaali. 3 A̱vu me eneshi iroci i ro zuva, aagangu a gbain a̱ shili na aci e cindere a na a̱ ri na avana kupa. Aaci suru u ta̱ na̱ mokokolo. 4 A̱vu wizan wa̱ yi u raɗa aaɓaci a̱ ta̱ a̱tsuma̱ a aɓaci e italyoꞌo a taꞌatsu suru diga e elesheꞌe, reve u vari le a̱ tyo o uvaɗi. A̱vu aaganguꞌu e isawan a̱ ma̱ka̱ka̱n ma kaꞌa adama u soɗushi mawuꞌun nu u matsan yi. 5 Reve u matsan mawun mo ulobo, za na ri nu ucira suru u na waa yuwan tsugono tsa ama o uvaɗi u nda. A̱vu malingata ma̱ A̱sula̱ ma usa yi mawuꞌun reve u tewee A̱sula̱ adama u da̱nu a̱ nda̱na̱ta̱ n tsugono tsa̱ yi. 6 A̱vu kaꞌa u suma u uwa o ogozo, uba̱ta̱ u na A̱sula̱ o foɓoo niyi. A̱ ta̱ ka̱lyuwa̱ yi pe ulobonu hali aꞌwan a taꞌatsu na akapi. ◊ Wen. 11:2.
7 Babu usa̱n a̱vu e temushi uvon ɗe zuva: zagbain vu nlingata ma̱ A̱sula̱ Mikaꞌilu na̱ nlingata ma̱ yi ma̱ A̱sula̱ a yuwan uvon na aaganguꞌu, reve aaganguꞌu na̱ nlingata ma̱ yi fo a̱ piri. 8 Agba aaganguꞌu u lyuwa aci shi, waru a̱a̱ da̱shi lyawa yi oɓolo na̱ nlingata ma̱ yi a̱ da̱nu zuva shi. 9 Reve Mikaꞌilu oɓolo na̱ nlingata ma̱ yi mu uta̱a̱ a̱ba̱jini a aaganguꞌu diga zuva reve a̱ ca̱co yi oɓolo na̱ nlingata ma̱ yi a̱ tyo e iɗa. Aagangu a nda a̱yi ɗa za na ri lo wuma nu ujimu. A̱yi ɗa za na a̱ tsu ɗe Mekerenkesu ko Male. A̱yi ɗa za na a̱a̱ lulumusa̱ ama suru.
10 A̱vu mu uwwa nanza a yuwusan adanshi diga zuva na̱ a̱ba̱jini o uɗyo adansa:
“Gogo A̱sula̱ a̱ tsu a ta wawa ama a̱ yi!
Gogo u ta yuwan ulinga nu ucira wa̱ yi,
reve u yuwan tsugono ana mogono!
Gogo Zamawawa† va̱ yi to roco ucira wa̱ yi a aci o uvaɗi!
Adama a na Mekerenkesu ma̱a̱ da̱shi isawan uba̱ta̱ u na A̱sula̱ a̱ tsu a̱ ri shi,
waru waa tawisaa a̱za̱ a̱ tsu agbashi na addama na ayin nu urana shi.
O uta̱a̱ ta̱ Mekerenkesu diga zuva!
11 Ama a̱ tsu a lyuwa ta̱ aci e Mekerenkesu
adama a mpasa m Ma̱giriꞌi,
oɓolo na alajiya e ikaka i na aa yuwusan.
Aa uwwusa wovon u na a̱a̱ kuwa̱ shi.
12 I yuwan ma̱za̱nga̱ suru nɗu a̱ɗu na i ri nden zuva.
Agba a̱ɗu na i ri nden a̱tsuma̱ o uvaɗi na a mala, i to sowo a̱tsuma̱lima̱ lon.
Adama a na Mekerenkesu ma̱ ka̱ra̱ ta̱ a̱ cipa̱ ya̱ꞌa̱ ɗu,
waru u tu utsutsu,
adama a na u revei waa jima shi a̱vu e isawaton yi.”
13 Ana aaganguꞌu we enei a vari yi ta̱ a̱ cipa̱ o uvaɗi, a̱vu u teme a saɓusa ka na matsain mawun mo uloboꞌo. 14 Reve kaꞌa u ushi evelu a̱ a̱ba̱jini a̱ a̱a̱kuru tsa̱ra̱ wu ꞌyawan a̱ ka̱mba̱ uba̱ta̱ wa̱ yi o ogozo. Uba̱ta̱ u na a̱a̱ ka̱lyuwa̱ yi ulobonu hali aꞌwan a taꞌatsu na akapi, ◊ Wen. 11:2. waru aaganguꞌu aa gura amaton yi shi. 15 Reve aaganguꞌu a̱ puvu mini tsu uɗolu adama u lyuwa kaꞌa u ka̱ra̱ na̱ a̱yi. 16 A̱vu gba iɗa i kamba kaꞌa, reve u kpa̱tuꞌwa̱ una̱ wa̱ yi reve u soɗu mini ma na aaganguꞌu u puvuyi. 17 Reve aaganguꞌu u yuwan upan lon na̱ kaꞌa, a̱vu u ka̱ra̱ a̱ ꞌya̱wa̱ u yuwan uvon na akapi a̱ muwun mu kaꞌa, aza a na o toniyi ili i na A̱sula̱ a dammai, waru o toniyi ikaka i na Yesu rito nle.
18 A̱vu aaganguꞌu e isawan a̱ ngeꞌen m mala.* Adanshi a̱ A̱sula̱ o ro a zuwa ta̱ guzu nda a̱tsuma̱ o uguzu wa 17, ozo o ro gba tsunda tsa ɗa a zuwa nle, cine uguzu wa 18 u ri. Akapi a Adanshi a̱ A̱sula̱ gba shi idanshi i nda a̱tsuma̱ a̱ a̱a̱ɗiva̱ a 13 uguzu wa 1 u ɗa a zuwa nle.