Wenu wa
Yahaya
Ucuɗuwu wa aatagada a nda
Aajiya Yahaya ɗa ɗanai aatagada a nda. U damma ta̱ ili i na we enei a̱tsuma̱ a alavu alavu adama e ili i na A̱sula̱ o foɓoi waru ni ili i na yaa fara o ukosu wu uvaɗi.
Ikakaꞌa u ta̱ na̱ pasu taꞌatsu. U damma ta̱ a na cira vi iwuya ta̱ pe a̱tsuma̱ o uvaɗi o ulinga, adama o ndolo a̱za̱ e Itoni o to sowo a̱tsuma̱lima̱ waru a̱ ta̱ kuwa̱. U yuwan ta̱ adanshi a̱ Ma̱giriꞌi ma̱ A̱sula̱, za na a̱yi ɗa Yesu. U ta lyuwa aci a ama e iwuya suru na̱ cira na ri a̱ nla̱ngi na̱ A̱sula̱. O ukosu, A̱sula̱ a̱ ta̱ ni iliyinkapa i saꞌani ya̱a̱ a̱bunda̱ i na waa ca ama a na aa lyuwa elime nu ucasu wo okolo ya̱ Kristi Zamawawa. Ikaka a̱tsuma̱ a̱ a̱a̱vuꞌun suru a̱yi ɗa A̱sula̱ a̱ ta̱ na akiza waru u ta̱ nu ulyuwu wa aci.
Aatagada a nda wenu wi ili i na ama aa gura ene ɗa shi. Yahaya yuwan ta̱ ulinga ni idanshi ya ama adama u damma cine ili ya zuva i ri. Re ta̱ lo na̱ a̱bunda̱ a na vaa gura reve ili i na i ri pe a̱tsuma̱ a aatagada a nda, amma a̱ba̱jini e ikaka u ta̱ a alanga eteshe waru u vadala shi. Apa a̱ba̱jini e ikakaꞌa: Yesu Kristi lyuwa ta̱ aci a̱ cuꞌun vi iwuya suru uba̱ta̱ suru. Urana u ta̱ lo a̱ ta̱wa̱ a na Male na̱ cuꞌun vi iwuya suru a̱a̱ tsun le a̱tsuma̱ a mala ma akina, reve zuva saꞌavu nu uvaɗi u saꞌavu u ta̱wa̱ uba̱ta̱ u na a̱za̱ a na o toniyi Yesu a̱a̱ da̱na̱ oɓolo na̱ a̱yi na asuvu nden.
Ili i na i ri pe a̱tsuma̱ a aatagada a nda
1. Adanshi o usokowu diga Yahaya (1:1-8)
2. Alavu alavu a̱ A̱sulazuva a Wuma (1:9-20)
3. Mpepelime a̱ tyo a̱ꞌisa̱ e cindere (2:1–3:22)
4. Alavu alavu a̱ a̱ga̱nda̱ ɗe zuva (4:1-11)
5. Aatagada ne erepu e cindere (5:1–6:17)
6. A̱ga̱nda̱ a̱ ma̱ka̱ka̱n ma̱ nda̱na̱ta̱ ma̱ A̱sula̱ (7:1-17)
7. Avana e cindere (8:1–11:19)
8. Aagangu na̱ A̱dodo e re (12:1–13:18)
9. Alavu alavu o ugeꞌetosu wa̱ A̱sula̱ na̱ mekeɗe (14:1–15:8)
10. Akwanu e cindere o upan wa̱ A̱sula̱ (16:1-21)
11. A lyuwa ta̱ aci a nꞌyuwatan ma̱ A̱sula̱ (17:1–20:10)
12. Ugeꞌetosu wu ukosu (20:11-15)
13. Zuva saꞌavu nu uvaɗi u saꞌavu (21:1-8)
14. Urishelima saꞌavu (21:9–22:5)
15. Kristi Zamawawa ta̱ ka̱mba̱ babu ujimu (22:6-21)
1
Yahaya yuwan ta̱ adanshi a aatagada a nda
1 Apa ili i na A̱sula̱ o rocoi Yesu Kristi Zamawawa, adama u damma agbashi a̱ yi ili i na A̱sula̱ aa yuwan nu ujimu shi. A̱vu Yesu lyungu malingata ma̱ yi u roco aagbashi a̱ yi Yahaya† iliꞌi. 2 Reve Yahaya damma ili i na we enei biti adama e ikaka ya̱ A̱sula̱ na adama e ili i na Yesu Zamawawa dammai ni ili i na u yuwain waru. 3 A̱sula̱ a ta zuwaa za na ee ɗewushe ama idanshi yi ikaka i nda nu una̱ abaꞌun, waru u ta zuwaa za na uwwai reve u yuwan tsutoni na̱ a̱yi abaꞌun. Adama a na mantsa ma yuwan ta̱ zuzu a na ili i nda yaa fara.
Yahaya ca̱sa̱ ta̱ a̱ꞌisa̱ a̱ a̱za̱ e Itoni e cindere
4 Apa mepepelime ma na Yahaya ɗanai a̱ tyo uba̱ta̱ wa̱ a̱ꞌisa̱ a̱ a̱za̱ e Itoni e cindere a na a̱ ri a Asiya.* “Asiya” e iɗa ya̱ Roma a̱yi ɗa akapi e iɗa ya Tukiya.
N ta avasa A̱sula̱ o roco ɗu isaꞌani na asuvu nden a̱ yi. A̱sula̱ a̱yi ɗa za na ri lo diga o ufaru, u ta̱ lo gogo, za na waru ri lo a̱ ta̱wa̱. Waru nan ruhu e cindere a na a̱ ri a̱ ma̱ka̱ka̱n ma̱ nda̱na̱ta̱ n tsugono tsa̱ A̱sula̱ o to roco ɗu isaꞌani na asuvu nden. 5 Ne ɗa waru Yesu Zamawawa za na a zuwayi ucira o udansa wa amayun adama a̱ A̱sula̱. A̱yi ɗa za na fara ꞌyoyin a̱tsuma̱ a̱ a̱kwa̱kwa̱. A̱yi ɗa mogono mo tsugono mo ngono mu uvaɗi.
A̱yi ɗa za na ciga ntsu, waru a̱yi ɗa u zuwa ntsu tsu laꞌa ucira wu unusu u tsu ana wo ocoi mpasa reve u kuwa̱ adama a̱ tsu. 6 Adama o ndolo reve wo oꞌwoto tsu mmaci ma̱ yi nan ganu a yuwusaan A̱sula̱ Dada va̱ yi a̱ga̱nda̱. Tsugbain nu ucira babu ukotu za va̱ Yesu Zamawawa ɗa! Ami.
7 Ka̱lyuwa̱i, a̱yi ɗa ndolo a̱ ta̱wa̱ e eleshe! Koyan ɗa te ene yi, hali na aza a na a zuwa a sapa niyi ni ibata, waru elentsu o uvaɗi suru a̱ ta̱ shon lon adama a̱ yi. Ne ɗa, u to oꞌwo ne! Ami.
8 A̱sula̱ Zagbain damma ta̱, “A̱mu ɗa Alfa† na̱ Omiga.† U ta dansa a̱mu ɗa Ufaru waru a̱mu ɗa Ukosu. A̱mu ɗa za na ri lo gogo, n ta̱ lo diga o ufaru, za na waru ri lo a̱ ta̱wa̱. A̱mu ɗa A̱sula̱ Mogono me Ili Suru.”† Alfa na̱ Omiga idanshi yu ufaru na̱ yu ukosu yi iɗani i Tsuheleni tsa ɗa, u ta dansaa tsu Yesu ta̱ lo kafu a yuwan ili i ro waru u ta̱ da̱na̱ lo babu ukotu.
Yahaya ene ta̱ Zamawawa na ꞌyoyin
9 A̱mu ɗa Yahaya, za ɗu a̱tsuma̱ e Itoni ya̱ Yesu† Zamawawa, waru o ɓongi mu ta̱ cine o ɓongi nɗu. N ta̱ a̱tsuma̱ o tsugono tsa̱ A̱sula̱ cine a̱ɗu fo i ri. Waru n ciga n ꞌyuwan n yuwan ankuri n kaɓa asuvu na̱ a̱tsuma̱lima̱ a̱ va̱ cine yaa yuwusan. A̱ ca̱co mu ta̱ nden mu uꞌwa wa ali a Batamusa, iɗa i memere ma̱ mini, adama a alajiya e ikaka ya̱ A̱sula̱ na amayun a na Yesu Zamawawa rocoi. 10 O urana wu Zagbain, reve Ruhu va̱ A̱sula̱ shiton wuma u va̱, reve mu uwwa a̱ba̱jini o uɗyo tse mesun ma aavana a̱ca̱pa̱ a̱ va̱. 11 A̱vu uɗyoꞌo u damma, “Ɗana a̱tsuma̱ a aatagada ili i na ve enei reve vu lyunguwa̱ a̱ꞌisa̱ a̱ a̱za̱ e Itoni a na a̱ ri e ilyuci i cindere i nda: Afisu, na̱ Simirina, na̱ Birigamu, na̱ Tayatira, oɓolo na̱ Sadisu, na̱ Filadalifiya na̱ Lawudikiya.”
12 Reve n vadala adama me ene za na aa yuwusan adanshi na̱ a̱mu, a̱vu me ene wisawatan wi ifitila i cindere i na a yuwain na̱ zinariya. 13 E memere ma wisawataꞌan, vuma da̱na̱ ta̱ pe na rotsoi vaɗilima̱. U da̱na̱ ta̱ wotowu na̱ a̱tugu a gbagbain a na a rawai a ana a̱ yi, na̱ mapaɗi mo umuna ma na a ɗavai na̱ zinariya uka̱nda̱ꞌu a̱ ma̱ka̱ka̱n ma̱ yi. 14 A̱nji a̱ yi uꞌuri puwu ana tsikilu, esu a̱ yi waru e ikanasa tse elentsu a akina. 15 Ana a̱ yi waru a madala tsu rumushili na aruma a tsu ruma reve o gboro yi, uɗyo wa̱ yi u rotso ta̱ ma̱gugwa̱ ma̱ mini ma̱ a̱bunda̱. 16 Reve u guza̱ italyoꞌo i cindere o ukere usaꞌani wa̱ yi, na̱ matsun me peꞌeni ma na e tewein ma̱ na̱ re o utusa̱ o una̱ wa̱ yi. Urewesu wa̱ yi a madala tse ekan o urana a aci.
17 Ana me ene niyi, reve n ka̱ɗa̱to a̱ ma̱ka̱ka̱n ma̱ yi n jinga̱ɗa̱ shi. A̱vu u kuruwa̱ mu ukere usaꞌani wa̱ yi reve u damma, “She vu uwwa wovon wan, a̱mu ɗa Ufaru nu Ukosu. 18 A̱mu ɗa za na aa casu wuma. N shi ta̱ n kuwa̱, amma gogo n ta̱ wuma u na u ri n koto shi. N ta̱ na̱ mkpa̱tuꞌutsu n na maa casu mu ucira u na ma̱a̱ kpa̱tuꞌwa̱ ko m ɓa̱ru uba̱ta̱ u na a̱kwa̱kwa̱ a̱ ri, reve n ka̱mba̱to le wuma.
19 “Vu ɗana a̱tsuma̱ a aatagada ili i na vee inda gogo suru ni ili i na ya̱a̱ ta̱wa̱ elime. 20 Nda ucuɗuwu wu usokowu wi italyoꞌo i cindere i na ve enei o ukere usaꞌani u va̱ꞌa̱, na̱ wisawatan u zinariya wi ifitila i cindere: Wisawatan i cindereꞌe a̱ꞌisa̱ a̱ a̱za̱ e Itoni e cindere a ɗa, ele waru italyoꞌo i cindereꞌe nlingata ma̱ A̱sula̱ n cindere n na ma̱a̱ ka̱lyuwusa̱ a̱ꞌisa̱ a̱ a̱za̱ e Itoni e cindere a ɗa.”