Mepepelime me Ire ma̱ Bulu a̱ tyo ya̱
A̱za̱ a̱ Korinti
Ucuɗuwu wa aatagada a nda
Bulu ɗana ta̱ mepepelime me ire ma nda a̱ tyo a̱ a̱za̱ e Itoni a̱tsuma̱ a̱ Korinti ana ama o ro a̱ ri ɗe a yuwusan adanshi a vama adama a̱ yi. Bulu lyungu ta̱ kambi va̱ yi Titu u ꞌya̱wa̱ u yuwan adanshi na ama adama e ili i na i ri amayun. Ana Titu ka̱mba̱i u damma ta̱ a na ama na̱ a̱bunda̱ a̱ usu ta̱ Bulu, amma hali n gogo ozo o ro a ꞌyuwan yi ta̱. A̱tsuma̱ e mepepelime ma nda Bulu godyoo ta̱ aza a na a kambusa yi, reve waru u yuwan adanshi adama a aza a na a ꞌyuwan niyi.
Bulu cuɗuwa ta̱ ama cine u shi u cigai u yuwan, ni ili i na i putsaa niyi a yuwan ne. Reve waru u yuwisan adanshi adama a̱ a̱ga̱nda̱ a amayun a̱ tyo a̱ A̱sula̱. U yuwan ta̱ adanshi cine a̱za̱ e Itoni aa kambulai. O ukosu u roco ta̱ a na a̱yi aajiya a amayun a Zamawawa a ɗa.
A̱yi mepepelime ma nda ma ta dansaa tsu cine a̱za̱ e Itoni a anaꞌan aa yuwan ulinga oɓolo, waru na̱ cine aa kamba azagbain a amayun na̱ munlu n na maa yuwusaan Zamawawa ulinga anaꞌan. U yuwan ta̱ adanshi cine aa kamba ni ikebe ni ili ya̱ a̱ɓula̱ a̱ tyo a̱tsuma̱ o ulinga wa̱ A̱sula̱. U roco tsu ta̱ zagbain va amayun tsu linga ta̱ adama ama suru a̱ tsura̱ ili i saꞌani. U damma ta̱ na a yuwan ili i ro babu ucira ko icigi ya̱ Yesu Zamawawa, ili ye pere i ɗa, amma ili i na a yuwain nu ucira ni icigi ya̱ Yesu, ili i nda i tsu zuwa ta̱ A̱sula̱ a uwwa uyoꞌo reve waru a̱ da̱na̱ nu ucira wa amayun a̱tsuma̱ o uvaɗi u nda.
Ili i na i ri pe a̱tsuma̱ a aatagada a nda
1. Bulu godyoo ta̱ A̱sula̱ (1:1-11)
2. Ulinga wa aajiya adama a ama a̱ A̱sula̱ (1:12–2:17)
3. Ugoloɓu ni icigi ya̱ Kristi Zamawawa (3:1–7:16)
4. Uneꞌe adama a alambi (8:1–9:15)
5. Bulu aajiya a amayun (10:1–13:10)
6. Ica̱su yu ukosu (13:11-13)
1
Bulu ca̱sa̱i a̱za̱ e Itoni a̱ Korinti
1 A̱mu ɗa Bulu, Timoti za tsu ta̱ pa oɓolo na̱ a̱mu. A̱mu ɗa n ɗanaa nɗu mepepelime ma nda. A̱sula̱ a ɗangwa mu ta̱ mo oꞌwo aajiya e Yesu Kristi Zamawawa.
N ta ɗanasaa ɗu a̱a̱ꞌisa̱ a̱ a̱za̱ e Itoni a̱ A̱sula̱ a̱tsuma̱ a̱ lyuci va̱ Korinti oɓolo na ama a̱ A̱sula̱ suru upasu wa Akataya.
2 Lyawa A̱sula̱ Dada tsu na̱ Yesu Zagbain Zamawawa roco ɗu isaꞌani na asuvu nden.
Bulu godyoo ta̱ A̱sula̱
3 Tsu yuwusayin A̱sula̱ ica, za na a̱yi ɗa Dada vu Zagbain tsu Yesu Zamawawa! A̱sula̱ a̱yi ɗa Dada na ri tapu ni isaꞌani waru a̱yi ɗa u tsu casu adanshi suru. 4 U tsu ca tsu ta̱ adanshi a mantsa ma na tsu ri a̱tsuma̱ a̱ a̱tsuma̱lima̱, adama a̱tsu fo tsu ca ama o ro adanshi. Na̱ a̱ ri a̱ a̱tsuma̱lima̱ tsu ta gura ca le adanshi cine A̱sula̱ a ca ntsu. 5 Amayun a ɗa tsu to sowuso a̱tsuma̱lima̱ lon adama a Zamawawa. Waru amayun a ɗa tsu ta̱ tsurusa̱ ucasu wa adanshi adama a Zamawawa. 6 Na̱ tsu sowo a̱tsuma̱lima̱, uzuwu wo okolo a̱ tsu a̱yi ɗa A̱sula̱ a ta ca ɗu adanshi ni iwawi adama o ndolo. Na̱ A̱sula̱ a ca tsu adanshi, adama tsu ca ɗu adanshi i kaɓa asuvu a ɗa. Ne ɗa yaa gura kaɓa asuvu na ankuri a̱tsuma̱ e ili i na a̱tsu fo tsoo sowuso a̱tsuma̱lima̱. 7 Tsu ta̱ no okolo ugbamu adama a na tsu reve ta̱ ni i sowo a̱tsuma̱lima̱ tsa̱ tsu, i ta̱ tsura̱ ucasu wa adanshi cine tsu ushiyi.
8 Ama a̱ va̱, tsu ciga ɗu ta̱ i reve ununa tsu sowoi a̱tsuma̱lima̱ e iɗa ya Asiya. A ca tsu ta̱ a̱tsuma̱lima̱ a na a laꞌai ucira u tsu, hali tsu jiyan na tsaa laꞌa shi. 9 Amayun a ɗa, tsu jiyan ta̱ tsu ta̱ kuwa̱. Agba ili i ndolo i zuwa tsu ta̱ tsu zuwa ucira uba̱ta̱ wa̱ A̱sula̱ amma o ucira wa aciya̱tsu shi, adama a na a̱yi ɗa za na tsu ꞌya̱sa̱n a̱kwa̱kwa̱. 10 A̱sula̱ a wawa tsu ta̱ diga a mantsa ma na tsu shi a̱ kuwa̱, waru tsu reve ta̱ u ta lyuwa elime na̱ mawawa ma̱ tsu. 11 U ta wawa tsu adama a na yaa kambusa tsu a mantsa ma na yaa yuwusan avasa adama a̱ tsu. Adama o ndolo, A̱sula̱ a̱ ta̱ usu avasa a̱ a̱bunda̱ a̱ ɗu. U ta zuwaa tsu abaꞌun, waru ama na̱ a̱bunda̱ o to godyoo yi adama e ili i na u yuwaan ntsu.
Bulu bula̱i mabura neꞌen
12 Tsu ta gura damma na̱ tsu cuwan ili i na tsu yuwain, tsu ta̱ a̱ ma̱za̱nga̱ na asuvu a̱ tsu a̱ ri cece. Mantsa suru tsu yuwan ta̱ nden ma̱ a̱ɓula̱, agba a̱tsu tsu soko ɗu ko ili i ta̱ shi. Isaꞌani ya̱ A̱sula̱ i ɗa i zuwai tsu yuwain ne, urevu wu uvaɗi u nda u ɗa shi. Tsu yuwan ta̱ nden ma̱ a̱ɓula̱ uba̱ta̱ u na tsu da̱nuyi suru bele a̱tsuma̱ a muwwulai n tsu na̱ a̱ɗu. 13 Ana tsu ɗanaa nɗu, tsu yuwan ta̱ adanshi mejege a̱ tyo ya̱ꞌa̱ ɗu, agba tsu soko ikakaꞌa shi. Adama o ndolo a ɗa, i gura revei ili i na tsu ɗanai. 14 Gogo i gura ta̱ reve ili i na tsaa dansa lo ne, agba tsu ta zuwusa okolo a na ya̱a̱ ta̱wa̱ i reve ili i na tsaa dansa mejege, adama o urana wu Zagbain Yesu i yuwan ma̱za̱nga̱ adama a̱ tsu, reve a̱tsu waru tsu yuwan ma̱za̱nga̱ adama a̱ ɗu.
15 N reve ta̱ ne ulobonu, waru adama o ndolo, n shi ta̱ n ciga m bura ɗu neꞌen o ufaru. Ne ɗa A̱sula̱ a zuwaa ɗu abaꞌun adama a na n ta̱ ta̱wa̱ ya̱ꞌa̱ ɗu ure. 16 N shi ta̱ n ciga mi isawan n ka̱lyuwa̱ ɗu ana n temei mmalu a̱ tyo e iɗa ya Makidoniya na̱ n ka̱mba̱ waru. Reve i kamba mu n ꞌya̱wa̱ upasu wa Yahuda. 17 I ta yuwan yeci yi ili i na i zuwai n yuwain ili i na n foɓoi shi. N shi a yuwusan adanshi o una̱ goon shi. N rotso ta̱ ama o uvaɗi a na a̱ tsu usu a ta yuwan ili i ro reve waru a ꞌyuwisan a yuwisan iliꞌi?
18 Amma ni i tara ili i na A̱sula̱ aa yuwusan amayun a ɗa, i te ene ili i na tsaa dansaa ɗu “Ee” ko “Oꞌo” ɗa shi a mantsa ma̱ ta̱. 19 Ne ɗa u ri adama a na Mawun ma̱ A̱sula̱, Yesu† Zamawawa usu reve waru u ꞌyuwan a mantsa ma̱ ta̱ shi. U tsu usu ta̱ kuci no okolo a̱ ta̱. A̱yi ɗa za na a̱mu na̱ Sila na̱ Timoti tsu yuwaan ɗu adanshi a̱ yi. 20 Adama a na a̱yi ɗa za na shitoyin nzuwulai ma̱ A̱sula̱ suru. A̱yi ɗa i zuwai tsaa dansa “Ami”† na̱ tsaa casu A̱sula̱ tsugbain a̱tsuma̱ a aala a Zamawawa. 21 I cuwan, A̱sula̱ a ɗa za na aa gbamatosu tsu na̱ a̱ɗu suru a̱tsuma̱ a Zamawawa. Waru A̱sula̱ a ɗa a ɗangwa ntsu. 22 U zuwaa tsu ta̱ urotsu† wu za vi ili adama u roco a na a̱tsu a̱za̱ a̱ yi a ɗa goon. Waru u zuwa ta̱ Ruhu va̱ yi o okolo a̱ tsu tsu uzuwa adama u rocosu tsu ili i ro i ta̱ lo a̱ ta̱wa̱.
23 Ana n damma nɗu n ꞌyuwan ta̱ a̱ ka̱mba̱ Korinti adama n da̱na̱ ɗu usuɗuwu wan. Ne epen a ɗa maa yuwusan ndeɗe A̱sula̱. 24 Tsaa yuwusan afalu a dansaa ɗu ili i na ni i ciga i ꞌyuwan i usu ɗa shi. Tsu reve ta̱ i ta̱ nu ucawu wo okolo lon waru yi isawan nu ucira ne. Tsu ciga ta̱ tsu yuwan ulinga na̱ a̱ɗu adama i da̱na̱ tapu na̱ ma̱za̱nga̱.