Mepepelime mo Ufaru ma̱ Bulu a̱ tyo ya
Aza a Tasalonika
Ucuɗuwu wa aatagada a nda
Bulu ɗa ɗanai mepepelime ma nda waru u ɗana ta̱ mepepelime mo ro a̱ tyo a̱za̱ e Itoni a Tasalonika. Tasalonika lyuci gbain ɗa a̱ ngeꞌen m mala ne eden a̱bunda̱. Waru uba̱ta̱ u ɗa a na ama a̱bunda̱ a̱ ri oo tono a̱ma̱li. Bulu ta̱wa̱ ta̱ a̱tsuma̱ a Tasalonika reve u rito ama adama e Yesu. A̱yi pe u ɗavusa ta̱ amuna o ogodo adama u tsura̱ ikebe. A̱za̱ e itoni ya̱ a̱ma̱li na̱ a̱bunda̱ o oꞌwo ta̱ a̱za̱ e Itoni ya̱ Yesu. Aza a Israꞌila fo a̱tsuma̱ a̱ lyuciꞌi o oꞌwo ta̱ a̱za̱ e Itoni.
A mantsa waꞌa, reve azagbain a̱ lyuciꞌi a uwa tsushuꞌun, a̱vu o loso Bulu uba̱ta̱ꞌa̱. A̱ tyo ɗe, reve Bulu lyungu kambi va̱ yi Timoti u ꞌya̱wa̱ u ta̱wa̱a̱ yi ni ili i na yaa farasa na̱ a̱za̱ e Itoni a na u lyawai ɗe Tasalonika. Timoti ta̱wa̱a̱ yi ta̱ na adanshi a saꞌani, a mantsa ma na wu uwwai adanshi a saꞌani a nda a ɗa Bulu ɗanai mepepelime ma nda.
A̱ba̱jini o uritosu a̱tsuma̱ e mepepelime ma nda a̱yi ɗa, cine ili ya̱a̱ da̱na̱ a mantsa ma na Yesu a̱ ka̱mba̱ a̱tsuma̱ o uvaɗi u nda. Ili na̱ a̱bunda̱ i ta fara a mantsa mo ndolo. Tsaa gura reve urana u na ili i ndolo yaa fara shi, adama o ndolo tsu ꞌyuwan tsu ciga a̱tsu e ipiri tsu yuwan wuma cine A̱sula̱ a cigai. Bulu cuɗuwa ta̱ ili i nda suru a̱tsuma̱ e mepepelime ma nda.
Ili i na i ri pe a̱tsuma̱ a aatagada a nda
1. Ica̱su (1:1-3)
2. Ucawu wo okolo wa aza a Tasalonika ni iroci i le (1:4–3:13)
3. Wuma u na u tsu yoꞌonoto A̱sula̱ okolo (4:1-12)
4. Ili i na a zuwusa yaa fara na̱ Zagbain ka̱mba̱ (4:13–5:11)
5. Ili yu ukosu i na aa yuwan ni ica̱su (5:12-28)
1
1 A̱mu Bulu, na̱ Sila na̱ Timoti, a̱tsu ɗa tsaa ɗanasaa a̱za̱ e Itoni a̱tsuma̱ a Tasalonika mepepelime ma nda. U ta̱ a̱ tyo uba̱ta̱ a ama a na a̱ ri a̱za̱ a̱ A̱sula̱ waru aza a na a̱ ri aza a Zagbain Yesu Kristi Zamawawa a na a̱ ri ɗe uba̱ta̱ꞌa̱.
N ta yuwusan avasa A̱sula̱ o roco ɗu isaꞌani ya̱ yi waru u zuwaa ɗu abaꞌun a asuvu nden!
Ama a Tasalonika a̱ ta̱ nu ucawu wo okolo
2 A̱tsu tsu godyusho ta̱ A̱sula̱ adama a̱ ɗu. Waru a mantsa suru na̱ tsaa yuwusan avasa, tsu yuwaan ɗu ta̱ avasa. 3 Na̱ tsu yuwan adanshi na̱ A̱sula̱ na̱ Dada tsu adama a̱ ɗu, tsu yuwan ta̱ adanshi e ili i na yaa yuwusan adama o ucawu wo okolo a̱ ɗu. Waru tsu yuwan ta̱ adanshi a̱ ɗu adama o ulinga wu ucira u na i yuwain adama a na i cigai ama. Waru tsu yuwan ta̱ adanshi a̱ ɗu adama o ulyuwu we elime u na ya̱a̱ ka̱lyuwusa̱ Zagbain Yesu Zamawawa nni i ri pe a̱tsuma̱ a̱ a̱tsuma̱lima̱.
4 Nꞌutsa̱ n va̱, A̱sula̱ a̱ ta̱ na̱ a̱ɗu o okolo, waru a̱tsu tsu reve ta̱ a na u ɗangwa nɗu yo oꞌwo ama a̱ yi. 5 Ana tsu damma nɗu Alabari a Saꞌani, ni idanshi i ɗa goon shi, amma nu ucira, adama a na Ruhu va Akiza ca ɗu ta̱ urevu lon ana tsu damma nɗu amayun. Ana tsu da̱na̱i oɓolo na̱ a̱ɗu, ye ene ta̱ cine tsu yuwain nden n tsu o rocosu amayun e ikaka i tsu. 6 Ne ɗa i ritoi i yuwan cine a̱tsu tsu yuwain nden, waru cine Zagbain Yesu yuwain nden ma̱ yi. Ko na a̱tsuma̱ a̱ a̱tsuma̱lima̱ a̱ a̱bunda̱ i ushi ta̱ ikakaꞌa, Ruhu va Akiza zuwa ɗu ta̱ i yuwan ma̱za̱nga̱.
7 Ne ɗa fo yo oꞌwoi iroci e ekere a ama a na o toniyi Zagbain a̱tsuma̱ a Makidoniya na̱ Akataya. 8 Waru adama a̱ ɗu a ɗa ikaka yi Zagbain i bazai a̱tsuma̱ e iɗa i ndolo, hali u ka̱ra̱la̱i uba̱ta̱ u ndolo suru. Ama ko te ɗa a uwwa ta̱ adama o ucawu wo okolo a̱ ɗu. Adama o ndolo tsaa ciga tsu da̱shi yuwan adanshi o ndolo shi. 9 Amaꞌa na aciyele a lyuwa ta̱ elime a yuwusan adanshi cine i ushi ntsu. Waru a yuwan ta̱ fo adanshi cine i vadalai i lyawai a̱ma̱li a̱ ɗu na̱ cine yaa yuwusaan A̱sula̱ a amayun a̱ga̱nda̱ za na ri wuma. 10 Waru a ta dansa cine i ri ufoɓu a pura ma̱ka̱mba̱a̱ ma Mawun ma̱ yi Yesu u ta̱wa̱ diga zuva. A̱sula̱ a̱ ꞌya̱sa̱n ta̱ Yesu a̱tsuma̱ a̱ a̱kwa̱kwa̱, waru Yesu ɗaɗa aa wawusa tsu a̱tsuma̱lima̱ o ugeꞌetosu u na wa̱a̱ ta̱wa̱.