1 Aꞌayin a ɗa Bituru n Yahaya aꞌa̱ri uyanka ama kadyanshi, aku aɗara̱kpi n azapige, n uzapige u ada̱ga̱ri a Kuwa ku Kashila̱, n aza a Sadusi* Aza a Sadusi yi, azapige a aza a Yahuda a ɗa aza ɗa bawu a wushuki n uꞌya̱nga̱ u ukpa̱. a tuwa̱i ara le. 2 A yain upan kpaci asuki yi a ka wenishike ta̱ ama, a danai akushe a ka ꞌya̱nga̱ ta̱ a ukpa̱ tyoku ɗa Yesu ꞌya̱nga̱i. 3 A ka̱na̱ le a gbagirya le hal kain ka wansai, kpaci n kuvuli ka. 4 Shegai ama ushani aza ɗa a panai kuɓari ki a pityanangu ta̱, pini nala, kakuma̱ aza ɗa a pityanangi vi ka doki ushani hal ka rawai ama azu a tawun (5,000) aꞌali.† A kece aka na̱ mmuku aza ɗa aꞌa̱ri atoni wa.

5 An kain ka wansai, aku azapige a aza a Yahuda yi, na̱ nkoshi n le, n awenishiki a Mele a ɓolomgbonoi a Urishelima. 6 Hanana Magono ma Aɗara̱kpi wa̱ ta̱ kaɓolo n Kayafa n Yahaya n Alizanda n gba̱ aza ɗa aꞌa̱ri kumaci ku te n Magono ma Aɗara̱kpi mi. 7 A zuwai Bituru n Yahaya a mere ma le, a wece le, “N ucira u eni u ɗa ko kpam n kala ka eni ka i yain ili i na yi?”

8 Shegai Bituru an wa̱ri ushaɗangi n Kulu Keri u tonuko le, “Eɗa̱ azapige na̱ nkoshi ma ama, 9 wece ɗa ya wece tsu ara a kaci ka ukuna u shinga u ɗa a yankai vuma na vi, kpam ya ciga i reve uza ɗa u ta̱na̱sa̱ yi vi? 10 Tsa ciga ta̱ gba̱ ɗe i reve hal n aza a Isaraꞌila dem, a asuvu a kala ka Yesu uza u Nazara uza ɗa i wandamgbanai kpam Kashila̱ ka ꞌya̱nga̱sa̱ yi a ukpa̱ vi, a asuvu a kala ka nala ka vuma na wa̱ri kushani n alafiya a kapala ka ɗe. 11 Tagara̱da u Kashila̱ u dana ta̱ aya

12 “Yesu nala vi ɗa koshi wa̱ri n ucira u wauwa uma. Gba̱ a asuvu a likimba, kala ka ne ka koshi ama a ka fuɗa a isa̱ aku a tsa̱ra̱ iwauwi.”

13 Azapige yi a yain majiyan cika an a wenei Bituru n Yahaya bawu a panai uwonvo u kadyanshi, kpaci a reve ta̱ ama a na yi aꞌa̱ n ureve u roku wa. Kpam a reve le ta̱ aꞌayin a ɗa aꞌa̱ri kaɓolo n Yesu. 14 An kpam azapige yi a wenei vuma ɗa a ta̱na̱sa̱i vi kaɓolo n asuki yi, aku a nambai ili iꞌya a ka dana. 15 A tonukoi asuki yi a wuta̱ pini a asu u Asheshi a Pige yi, ele kpam a sheshei.

16 A danai, “Ndya tsa yan n ama a na yi? Kpaci gba̱ aza ɗa a ka rongo a Urishelima a reve ta̱ an a yain iryoci i pige a akere a ama a na yi, tsa̱ tani n tyoku ɗa tsa dana nala wa̱ri wa. 17 Shegai tsa̱ra̱ kotsu ukuna vi u tambura a asuvu a ama wa, a̱sa̱ka̱ tsu ɓarana le a doku a tonuko uza ukuna a asuvu a kala ka nala ki wa.”

18 Pini nala, a isa̱i asuki yi, a ɓarana le kotsu a doku a tonuko uza ukuna ko a wenishike a asuvu a kala ka Yesu wa.

19 Shegai Bituru n Yahaya a wushunku le, “Mai ɗa wa̱ wa̱ri a asu u Kashila̱ tsu lai upana kadyanshi ka ɗe n ka ka Kashila̱? Kondoi ve i wene. 20 Kpaci a̱tsu gai tsa fuɗa tsa paɗa bini a kaci ka ili iꞌya tsu panai kpam tsu wenei wa.”

21 An a doki a ɓarana le, aku a a̱sa̱ka̱ le. A nambai tyoku ɗa a ka yan a yan le mavura, kpaci gba̱ ama a ka cikpala ta̱ Kashila̱ adama a ili iꞌya i gita̱i. 22 Vuma ɗa a matsai kawunu ki kpam a ta̱na̱sa̱ yi n ukunosavu vi, ayen a ne a la ta̱ amangare.

23 An a a̱sa̱ka̱i Bituru n Yahaya, a banai a asu u aza a le, a yanka le alabari a ili iꞌya aɗara̱kpi a pige n azapige yi a tonuko le. 24 Ele kpam an a panai nala aku a ꞌya̱nga̱sa̱i ala̱ga̱tsu a le ubana a asu u Kashila̱ n katakasuvu ka te a danai, “Ashekapige, uza ɗa u yain zuba n likimba n kushiva̱ n gba̱ ili iꞌya iꞌa̱ri a asuvu a le. 25 A asu u Kulu Keri, vu yain kadyanshi n kagbashi ka vunu; wata, akaya a tsunu Dawuda, vu da,

27 “Mayun ɗa ili i na yi i gita̱ ta̱ pini na a Urishelima. Hiridu† magono n Bontu Bilatu a ɓolomgbono ta̱ kaci n Awulawa n aza a Isaraꞌila n a yanyi tsilala n kagbashi ka vunu Yesu Uza u Uwulukpi, uza ɗa vu gonukoi Kawauwi. 28 A ɓolomgbonoi tsa̱ra̱ a yain ili iꞌya vu foɓusoi ya gita̱ a asuvu a ucira u vunu n tyoku ɗa va ciga. 29 Gogo‑na Magono ma Zuba, kondo ve tyoku ɗa a ka ciga a ɓishinka tsu manyan. A̱tsu agbashi a vunu a ɗa, ne tsu ucira u ɗa tsa yan kadyanshi ka vunu bawu uwonvo. 30 Rongo usukusu kukere ku uta̱na̱sa̱, vu yansa iryoci n ikunesavu a asuvu a kala ka kagbashi ka vunu Yesu Uza u Uwulukpi.”

31 An a kotsoi kavasu, aku asu u ɗa a ɓolomgbonoi vi u gba̱ɗa̱i. A shaɗangu le n Kulu Keri, a rongoi udansa kadyanshi ka Kashila̱ bawu uwonvo.

32 Gba̱ kaɓolo ka atoni ki katakasuvu ka te ka le, uyawunsa u ɗa le dem u te, uza wa̱ la u danai ili iꞌya wa̱ri n iꞌya vi i ne iꞌya koshi wa, shegai i gba̱ le. 33 N ucira u pige u ɗa asuki yi a danai ukuna u uꞌya̱nga̱ u Yesu Asheku a ukpa̱. Ukuna u shinga u Kashila̱ ushani wa̱ ta̱ a kaci ka ya dem a asuvu a le. 34 Kpam uza wa̱ la u nambai ili a asuvu a le wa, kpaci gba̱ aza a uyamba ko aꞌuwa a rongo ta̱ udengishe n a tukusi ikebe yi, 35 a ka zuwusa a kapala ka asuki yi. Kpam a ka pecishike iꞌya ko ya wa tyoku ɗa mɓa̱la̱ n le ma̱ri.

36 Nala uza roku uza u kala Isuhu yain, eyi uza u Levi u ɗa, kumaci ku uyamba u Sayipuru, uza ɗa asuki yi a tsu isa̱ Bara̱naba; (wata, Uza ɗa wa Gbamatangu Asuvu.) 37 U denge ta̱ uyamba u ne u roku, u tukoi ikebe yi a kapala ka asuki yi.