3
Yesu la ta̱ Musa
1 Ama a va̱, Kashila̱ ka ɗanga̱sa ɗa̱ ta̱ i woko ama a uwulukpi a ne. Adama a nala u gan ta̱ i rongo a uciɓusa tyoku ɗa Yesu wokoi kasuki ka Kashila̱, kpam u wokoi Magono ma Aɗara̱kpi ma uwushuku u ɗa tsa dansa. 2 U yan ta̱ ko ndya baci Kashila̱ ka tonuko yi u yain. Kashila̱ ka ɗanga̱sa yi ta̱ u yain manyan ma na mi, tyoku ɗa Musa yain manyan ma Kashila̱ ka tonuko yi u yain gba̱ a asuvu a Kuwa ku Kashila̱. 3 Tsupige tsa Yesu tsa̱ra̱i tsu la ta̱ tsa Musa tsa̱ra̱i, tyoku ɗa tsupige tsa kamai ka tsu tsa̱ra̱ tsu tsu la tsu kuma ki. 4 Mayun ɗa an kuwa dem uza roku u ɗa u tsu ma ka, shegai Kashila̱ ka kamai ka ko ndya wa. 5 Musa kagbashi ka Kashila̱ ka wushunki kuwa ku ne ka, kpam manyan ma ne ma woko ta̱ iryoci i ili iꞌya Kashila̱ ka wenike naha a kapala. 6 Shegai Kawauwi Maku ma Kashila̱ ma, kpam aya Kashila̱ ka wushunki kuwa ku ne. A̱tsa kuwa ku ne ki, tsu lya baci kelime n ugbama asuvu, kpam tsu lya baci kelime n uwushuku n ili iꞌya tsu zuwai uma.
U ka̱na̱ ta̱ tsu lyai kelime n utono Kashila̱
7 Tyoku ɗa Kulu Keri ku danai ɗa,
“I pana baci kala̱ga̱tsu ka Kashila̱ ara,
8 kotsu i ryagbaja wa,
tyoku ɗa nkoshi n cau n ɗe n yain.
A kpatala̱ka ta̱ Kashila̱ kucina̱,
an a kondoi Kashila̱ a kakamba.
9 Kashila̱ ka dana ta̱,
‘A ꞌyuwunka mu ta̱ cika
tsa̱ra̱ a kondo mu,
ko an u wokoi a wene ta̱
ili iꞌya n yain a asuvu a ayen a amangare yi.
10 Adama a nala n pana le ta̱ upan, aku n danai:
‘Atakasuvu a le a tsu kpatala̱ka mu ta̱ kucina̱ maco,
a ꞌyuwain uyan ili iꞌya n tonuko le a yain.’
11 N yan ta̱ upan hal n tsinai,
‘A ka uwa a asu u uwunvuga u va̱ wa, ko kenu.’ ” ◊ Ishp. 95:7-11.
12 Ama a va̱, kiranai kotsu ko uza a asuvu a ɗe u yain n katakasuvu ka ka̱ri n tsicingi ka kpam bawu ka wushuki wa. Icun i katakasuvu ka nala ka zuwa ɗa̱ ta̱ ukpatala̱ka Kashila̱ Uza u Uma kucina̱.
13 U ka̱na̱ ta̱ i gbamatangu atoku a ɗe kain dem, kpam u ka̱na̱ ta̱ i lyai kelime n uyan nala hal aꞌayin a buwa baci a ɗa a ka isa̱ “Ara.” I yan baci nala wa, unyushi u cingi wa yinsa̱ ta̱ aza roku a ɗe u zuwa le uryagbaji. 14 Tsu woko ta̱ atoku a asuvu a Kawauwi tsu lya baci kelime n upityanangu u ucira u ɗa tsa̱ri n u ɗa tun a kagita̱ hal ubana a makorishi. 15 Tagara̱da u Kashila̱ u dana ta̱,
“I pana baci kala̱ga̱tsu ka Kashila̱ ara,
kotsu i ryagbaja tyoku ɗa nkoshi n cau n ɗe n ryagbajai wa.
A kpatala̱ka ta̱ Kashila̱ kucina̱.”
16 An ya a panai kala̱ga̱tsu ka Kashila̱ aku a kpatala̱ka yi kucina̱? Alya aza ɗa Musa tonoi n ele u wutukpa̱ le a Masar. 17 An ya kpam a zuwai Kashila̱ ka panai upan hal ayen a amangare? Alya aza ɗa a yain unyushi u cingi kpam a kuwa̱i a kakamba, n ele ɗa u yain upan. 18 An ya Kashila̱ ka dansa̱ka an u tsinai u da a ka uwa a asu u uwunvuga u ne wa, ko kenu? Aza ɗa a ꞌyuwan yi upana̱ka, alya wa dansa̱ka. 19 Tsu tuwa̱ ta̱ tsu revei adama a ukpa̱ɗa̱ u uwushuku u le u ɗa a kpa̱ɗa̱i uwa vi.