Malasi
Ná-sɛʋɛi
Eɓulu wooi zu Malasi laaseigi ʋoluʋɛ ɠa ga «nà-keelai.» Naama laaseigi ɠila nɔ ɠa sɛʋɛai gaaɠwɛsu saʋagɔi zu, puuzu ɠilagi zu, é dɛɛzu ga: Ɠɔoɠɔ GALAGI ná-keelai ɠa é ʋaazu é ná-pelei ɓɛtɛ.
Ti ɠɛni ɠɛɛzu ɓalaagi GALA goo wo nuiti ta zalaɠa ɠula nuiti ma: «GALA Keelaiti» (2:7, ta Azee 1:13 zu). Naa ɠa é kɛɛzu, tanigaa ti ɠɛɛzu Malasi laaseigi ɠa ga daaseigi ta ti pɛɛni ba, kɛlɛ nu la ɠɛni nɔnɔ ma laasei kitei ɠwɛɛ.
Malasi ná-sɛʋɛi ɠɛɛni kona undɔɔlugɔi ma ɠaaɠwɛsu mɔungi ma ziɛgiti su, Yesu Klista zɔlɔɔ foloi yeeluɠɔ. Siagizu, Izelayɛle nuiti ti ʋaai ma la ta-yooi zu, ti zeɠe zou ɠiligiti su ʋɛti ti ɠɛni naati pela ʋelei zu, ti ɠaalɛini, ti iɲɔ ge leʋe, Malasi ná-GALA goo wo wotii ɠɛɛni Zuda nuiti saama, GALA sei ʋɛlɛi lo fai ʋolu, ta GALA dɛbi ʋelei ma wotiiti ti lɔɔzeini ʋolu, Pɛls masadai ma ziɛgi zu. (Mal 1:7, 8, 12-14; 3:10) Fai tanigaani ti wogai Sɛʋɛi zu, ti ɠɛɛʋɛ nɔ eɠɛ Esedelase ta Neemi nii ta-voloi nɔ. Vulu vaiti ti ɠɛni kɛɛzu ta kidaaleʋelala nuiti, ta ti zɔlɔɔganii ma ʋuusiɛiti kulalalai. Esedelase ta Neemi ti deveiti boni naama vaiti daalɔɠɔma. (Esd. 10:3; Nee. 13:23-27; 13:1-3).
Tɔɔzei ba ga nuɓusɛiti ti la ɠɛni GALA ná-minazeɠegiti daazeeliai ɠaani fala, ti ɠigiti maaɠoozaa ɠɛni de Ɠɔoɠɔ GALAGI ʋa. Zuda nuiti ti ɠɛni ziɛzu ga GALA ná-pelei, kɛlɛ ti la ɠɛni ma leveiti sosu ga pagɔ.
Zɛnvu su ƓALAGI ɠwɛɛ fai la ɠɛni ti yiima ga ɠiteɠite. Zalaɠa ɠula nuiti ti la mɔ ɠɛni ziɛzu ta-wotii wu, Izelayɛle nuiti ɓalaa ti la ɠɛni luazu GALA ná-tɔgi ʋa. GALA keelai ná-kisiɛi zu, naama vaiti maaʋele ma ti ɠɛni ɠɛɛzu, kɛni é wuzeɠe é zalaɠa ɠula nuiti iɲɔdɔ, ta é bo Izelayɛle nuɓusɛiti ma ga kɛni ti valibo ti-yiimaʋɛti. É ɓena GALA ná-nɛɛbɛi ma vai loo ti ɠigiti su, é bo ti ma ga: «GALA ná-tukpɔɠaaleʋei ta paa voloi maaɓuɠaa. (Mal. 2:17-3:5; 3:13-24). Malasi ɠa Ɠɔoɠɔ GALAGI ná-keelai ʋaa vai wosu (3:1), nii é ga: Eli niinɛi (3:23, 24). Naa ɠa ʋaazu Maliɠi ɓɔɠɔgoi luɠɔ, nii é ga: Minazeɠegi ma ɠeelai nuiti ti maaɓɔunsu ga ɠiteɠitegi (3:1). Anɛɛ kitogi kpein ge ɠɛni ná, Izelayɛle nuɓusɛiti ti ʋaai ma ti zeɠe zou ɠiligiti su, ti zei ta-yooi zu, ti ɠɛʋele la ɠɛni dɛ ɓɛtɛni, kɛni nii é ga Eli niinɛi, naa ʋaa é nuɓusɛiti kigi ɠɛʋele ɓɛtɛ ta-ƓALAGI laaɠomi fai zu. Yesu Klista ɠa é ga: Minazeɠe niinɛi ma ɠeelai, naa laaɠomi fai ɠa é daazeelizu ade ma, é ade loli ma mɔnɔ za.
1
Nuɓusɛiti ta-vaanɛ wuuɠwɛɛtalai
1 Ɠɔoɠɔ GALAGI ná-keela wooi, é boni Izelayɛle nuiti ma, é ɠula Malasi la.
2 Ɠɔoɠɔ GALAGI ɠɛ ma: «Nɔ̀un, gè wo nɛɛʋɛ ʋɛ. Kɛlɛ wa gàazaɠasu, wo ɗa ɠɛ ma: ‹Lee ɠa gá kwɛɛ ba ga è gi nɛɛʋɛ ʋɛ?› » Ɠɔoɠɔ GALAGI gooɠaaʋotegi veeʋɛ, é ɠɛ ma: «Ezawu la ɠɛni ga Zakɔɓe kɛɛɠɛloin ɓaa? Anɛɛ naa ʋe, gè yiimazeɠeʋɛ ga Zakɔɓe, 3 gè Ezawu likpi. Gè ná-gize yooi ɠɛa ga fuagi, gè ná-poganiiti kwɛa koʋeiti ma teʋebai zu.» 4 Ezawu mavofodai, Edɔme, ɠa zoo, é ɠɛ ma: «Gi ɠoloɠologa, kɛlɛ gá ada woloaiti tosu ʋolu.» Kɛlɛ Ɠɔoɠɔ GALAGI Fai-Pɛ-Maliɠii ɠɛ ma: «Ti náti to, nà náti toka nɔ, ta-yooi ɠa loli ga zooi nii faa ɲɔi masadai ɠɛɛzu su, ta nuɓusɛiti niiti Ɠɔoɠɔ GALAGI ti laalɔɠɔma yeenɔpɛ. 5 Izelayɛle nuɓusɛiti, wo-ɠaazuʋɛ ɠa naati pɛ ka, wo ɗa ɠɛ ma: ‹Ɠɔoɠɔ GALAGI wɔɔlɔʋɛ Izelayɛle nà-zou ɠwɛpelegiti pɛ polu ʋeleiti!› »
Lɛbiyai nii maanɛai é ve Ɠɔoɠɔ GALAGI ʋɛ
6 Ɠɔoɠɔ GALAGI Fai-Pɛ-Maliɠii ɠa é nii wosu zalaɠa ɠula nuiti ma: «Doin ɠa ɗa kɛɛɠɛ lɛbi, botiɠɛ nui ɓalaa maliɠii lɛbi. Ni nà ga ɠɛɛɠɛi, lɛbiyai ɓɛgele ɠa é veezu bɛ̀? Ni nà ga maliɠii, unfemai ɓɛgele ɠa é bɛ̀? Wa dàaseigi ʋɛlɛʋilisu. Kɛlɛ wa gàazaɠasu, wo ɗa ɠɛ ma: ‹Leeni ɠa gi è-laaseigi ʋɛlɛʋilisu da?› 7 Wa ʋaazu ga kɔzɔba laamianigiti nà-zalaɠa ɠulazuʋɛti. Kɛlɛ wa gàazaɠasu, wo ɗa ɠɛ ma: ‹Leeni ɠa gi è ɠɔzɔa la?› Wo ɠɛɛ vai zu ma: ‹Ɠɔoɠɔ GALAGI ná-taɓalii ɠa ga fuun gani.› 8 Siɛgi zu wo ʋaazu la wo gaazuɠole logani ɠula ga zalaɠai, faa ɲɔu la ga naa ɓaa? Siɛgi zu wo ʋaazu la ga dɛkpu gelei ta seeɓɛ geleiti, faa ɲɔu la ga naa ɓaa? Naa ve lɛɛ ɗa-you ɠundiɠii ya! Toɠa yeezei nɛi è wu, é è zuzo ga pagɔ?» Ɠɔoɠɔ GALAGI Fai-Pɛ-Maliɠii ɠa é boga. 9 «Niima ziɛgi zu, à kɔɠɔ mu ga wo màanɛɛnɛ, nɛ̀i gè ga wa-ƓALAGI, nii a kɛ gè nà-nuɓusɛiti wo maawɔinɠa! Naati fea ʋoluma, wa kaazu ga nà wo zuzo ga pagɔ ɓaa?» Ɠɔoɠɔ GALAGI Fai-Pɛ-Maliɠii ɠa é boga. 10 «Fizɔgɛ mu ga wo zaama, nu ɠila ge sèi ʋɛlɛi ma ɓogiti daaɠulu, nii a kɛ wo mina abui ɠaazo wafuun nà-zalaɠa ɠulazuʋɛ.» Ɠɔoɠɔ GALAGI Fai-Pɛ-Maliɠii ɠɛ ma: «Zìima nɔpɛ ge la ga woye, gè la yeezeizu wa-vebɛani nɔpɛ bu. 11 Mazɔlɔɔ tɔ̀ɠɔi wɔɔlɔʋɛ zii ɠiligiti saama, é zo folo ɠulazu, é li folo liizu. Mini-o-mini, ta ani maku nɛɛnɛgiti galazu dɛ̀bi vai ma, ti ɗa ʋa ga vebɛani ɲadegaiti, mazɔlɔɔ tɔ̀ɠɔi wola ɠa wɔɔlɔ zii ɠiligiti saama.» Ɠɔoɠɔ GALAGI Fai-Pɛ-Maliɠii ɠa é boga. 12 «Kɛlɛ wɔun, wa bɛ̀lɛlalazu, wa ɠɛna ɠɛa ma: ‹Maliɠii ná-taɓalii ɠɔzɔʋɛ, daamianigi é zɔlɔɔsu gaa, kulanuma nɔpɛ ge la naa ʋa.› » 13 Ɠɔoɠɔ GALAGI Fai-Pɛ-Maliɠii ɠɛ ma: «Wa laaɓeluzu ga ze, wo ɗa ɠɛ ma: ‹Ɓɔɠɔ ɓɔlɔ vaa ɠa ga nii!› Wo ɗa ʋa ga toganii niiti ti unmaai, niiti ti lɛkpuzu, ɓa ti zeeɓɛzu, vebɛaniiti kana wo ti veezu! Wa kaazu ga nà yeezei nɛi naati bu ɓaa?» Ɠɔoɠɔ GALAGI ɠa é boga. 14 «Foovooi ɠa yaava nui ʋɛ, nii togani zinɛ ʋagɔi ta zea ná-togani ɓulugi zu, é minazeɠeai la GALA bɛ, é naa yɛ ná, é zɛba é ʋa ga taɠili nii daa la zeelini, é naa ɠɛ ga zalaɠai Maliɠii ʋɛ! Mazɔlɔɔ nà ga masa gola, dàaseigi maayikiai zii ɠiligiti saama.» Ɠɔoɠɔ GALAGI Fai-Pɛ-Maliɠii ɠa é boga.