1  Kwin Esta i beten i stap inap tripela de. Na bihain em i kirap na i rausim ol klos bilong sori na em i pasim gen ol naispela klos bilong kwin.

2-3  Em i luk smat moa na em i prea gen long God i save lukim olgeta samting. Na em i sanap nais tru long pasin bilong ol kwin, na em i lusim rum bilong em, na tupela wokmeri i poromanim em na ol i go. 4  Narapela meri i holim han bilong Esta, na narapela i karim hap klos, long wanem, klos bilong en i longpela tru. 5  Pes bilong Kwin Esta i nais tru na i lait olgeta. Em i luk olsem meri i belgut na i amamas i stap. Tasol bel bilong en i guria nogut tru. 6  Em i wokabaut i go lusim planti rum na em i kamap long bikpela rum bilong king. Na em i sanap i stap long ai bilong king. King i putim ol bilas gol na ol ston i dia tumas na em i sindaun i stap long bikpela sia bilong em. Sapos yu lukim em, skru bilong yu bai i guria. 7  Pes bilong en i lait olgeta. Tasol taim em i lukim Esta i kamap, pes bilong en i kamap tudak tru. Na Esta i pret nogut tru. Pes bilong en i go waitpela olgeta na ai bilong en i raun. Olsem na em i slipim het bilong em antap long sol bilong wanpela wokmeri i sambai long em. 8  Na God i tanim bel bilong king. King i lukim Esta na em i kirap nogut na i wari long em. Kwiktaim em i lusim sia king bilong em na em i ran i go na em i holim Esta long han bilong em bai Esta i no ken pundaun. Na em i mekim sampela switpela toktok bilong strongim Esta. 9  Em i tok olsem, “Olsem wanem na yu pret, Esta? Mi man bilong yu. Yu no ken wari. 10  Dispela bikpela tambu i karamapim ol manmeri nating tasol. Yu no inap i dai. Nogat tru. 11  Yu kam long mi nau.” 12  Na king i litimapim dispela stik em i save holim, em i mak bilong pawa bilong em, na i putim long nek bilong Esta. Na em i givim kis long Esta na em i tok olsem, “Yu tok nau. Yu laikim wanem samting?”

13  Orait kwin i bekim tok olsem, “King, taim mi lukim yu, mi ting mi lukim wanpela ensel bilong God. Olsem na mi pret na mi guria nogut tru. 14  Yu luk narakain olgeta, na pes bilong yu i lait moa yet.”

15  Na taim Esta i wok long toktok yet, em i airaun gen na em i pundaun. 16  King i kirap nogut na em i wari moa yet. Na olgeta man i sanap was long king ol i wok long kirapim bek Esta.

17  Orait Mk 6.23 king i tokim Esta olsem, “Kwin Esta, yu laikim wanem? Sapos yu laik bai mi givim yu bikpela samting inap olsem hap bilong kantri bilong mi, mi inap givim long yu.” 18  Na Jdt 12.18 Esta i bekim tok olsem, “King, inap yutupela Haman i ken kam long wanpela bikpela kaikai nau long nait? Long wanem, nau em i wanpela bikpela de long laip bilong mi.”

19  King i orait long dispela tok na em i tokim Haman long kam kwik bai tupela i ken i go long Esta. Olsem na king wantaim Haman i go long bikpela kaikai Esta i redim. 20  Ol i dring wain i stap na king i askim Esta, “Yu tokim mi, yu laik bai mi givim wanem samting long yu?”

21  Orait Esta i bekim tok bilong king olsem, 22  “King, sapos yu laik orait long olgeta samting mi askim, orait yutupela Haman i mas kam bek gen tumora long narapela kaikai mi bai redim bilong yutupela.”

23  Haman i lusim rum kaikai na em i amamas na i belgut tru. Em i wokabaut i go na em i lukim Mordekai i sindaun i stap klostu long dua bilong haus king. Na Haman i belhat nogut tru. 24  Em i go kamap long haus bilong em, na em i singautim ol pren bilong en i kam na em i askim meri bilong em Seres long sindaun wantaim ol tu. 25  Ol i kamap pinis na Haman i litimapim nem bilong em yet long ai bilong ol. Em i tokim ol long em i gat planti mani na planti samting. Na em i tok long king i bin givim bikpela namba na bikpela wok tru long em. Na olgeta arapela ofisa bilong king ol i stap aninit long em. 26  Na Haman i tok moa olsem, “Kwin Esta yet i bin mekim wanpela bikpela kaikai bilong king na bilong mi tasol. Em i no singautim narapela man i kam. Nogat tru. Na em i tok bai mitupela i mas i go kaikai wantaim em gen long tumora. 27  Tasol mi lukim Mordekai, dispela man bilong lain Juda, i sindaun i stap klostu long dua bilong haus king na bel bilong mi i paia nogut tru. Na mi ting ol dispela gutpela samting i olsem samting nating tasol.”

28  Meri bilong em na ol pren bilong en i tokim em olsem, “Maski wari. Yu tokim ol man long sanapim wanpela longpela pos, antap bilong en inap 20 mita. Na tumora long moning yu go askim king long hangamapim Mordekai long nek bai em i dai. Bihain bai yu belgut na yu ken i go kaikai.” Haman i laikim dispela tok, olsem na em i tokim sampela man na ol i sanapim wanpela pos bilong hangamapim Mordekai.