1 Quermano jumasa, meran ni oj to jacuc ja Cajualtic Jesucristo ba oj stzomotic ba oj huajtic soc ja yeni pero aa cuidadoex. 2 Mi xa huaa bajex ba oj jomjuc ja hua pensarexi. Mi la xiuyex yuj ja ma' huax yala que jacum xa ja Cajualtiqui, anima huax yala que ja' alubal yab yuj ja Espíritu Santo. Bob ta jel tzamal ja jas huax yala, pero moc ni lom oja huaex casoa. Ma oj yale que sc'ulane recibir ja jcarta ja quenticoni, que ti xa bi jacum ja Cajualtiqui, xyutajoticon ja Pablo, anima jach oj yala huabyex. 3 Pero chican jas modo oj yala huabyex, moc ni lom oja huaa bajex lolajela porque ay to jas oj iljuc bajtan mi tox jac ja Cajualtiqui. Ja ora jahui, mi ni ja sbiil ja Dios oj bob yab ja cristiano, ti oj see sbaj jun huinica. Ja yeni, but'el juntiro puro mulal. Mi oj bob ajyuc toj, jayuj oj ni ch'ayjuc snaajela. 4 Pero ja huinic jahui, coraja xta juntiro oj yab ja sbiil ja Diosi, ma chican jas huas sc'uan ja cristiano, mi ni oj bob yaba. Hasta que oj huaj culan ja ba yoj stemplo ja Diosi. Ti oj yal ja huinic jahui: ―Quena mero Diosoni, oj chiuc. 5 ¿Mi xa ma xa naahuex ja jas cala huabyex ja yora ti ajyiyon amoquex ba? Ch'ac ni cala huabyex spetzanil ja ita. 6 Pero ja huinic jau ja it but'el soc mulali, macubal to masan huas staa stiempo y huan ni xa naahuex jasyuj ja mi tox bob jacuqui. 7 Ja mulali, naca ti ni ay ja ba mundo ja huego. Tzatz ni leca pero mi to huax chijcaji juntiro porque ti to ay ja ma' macan yuji. Pero cuando x'el ja yen ja ma' huan to scomjel ja maloili, 8 Ti oj see sbaj ja tan mal huinic jahui, jaxa Cajualtic Jesusi, malan soc oj su soc ja stii, soc ja yijlab oj jac soqui, soc ja jahui, oj xch'ay el snaajel huego. 9 Pero cuando huas sea sbaj ja huinic jahui, jel juntiro oj ajyuc ja yipi. Oj bob sc'ul milagro. Jel ja jas oj sei. Lajan soc Dios meran ja jas oj sc'uluqui, pero mi ni Diosuca. Ja' ni ja yip ja tan Satanasi. 10 ¡Xihuel ja sbaj ja yeni, jayuj chican jas modo oj slola ja cristiano, pero ja' ni ma' huane ch'ayeli! Mi ni modo huax c'ocxiye ba oj sc'uuque ja mero smeranili ba oj bob aaji eluque libre soc ja smulei. 11 Jayuj ja Diosi ti xa oj yaa ba oj lolajuque yuj ja tan mentiroso jahui. 12 Tzatz ni lec ja scastigo oj aajuc yilei, yuj ja mi ni huas sc'uane ja smeranili. Ja' ni toj huajel sc'ujole ja maloili.

13 Quermano jumasa, ja Cajualtiqui jel yaj huax yabyex. Sbej ni tola vida huax c'anaticon yi stz'acatal ja Dios yuj ja huenlexi porque stzaahuex ja yora mi tox cujlaji ja satq'uinali ba oj bob elanic libre soc ja hua mulexi. Elyex nia, pero ja' ni yuj ja Espíritu Santo, ja ma' scoltayex ba oja huaa can ja hua mulexi y ja' ni ac'uanex ja smeranila. 14 Dios ni sleahuexa jayuj jac ni ac'ujolex ja yora jloiltaticon ahuabyex ja abal it jel tzamali. Sleahuex ba oj yaex ja ba huax lijpi yuj ja Cajualtic Jesucristo. 15 Quermano jumasa, c'ulanic seguir ba tzatz oj ajyanic soc ja Diosi. Moc ch'ay ac'ujolex ja jas jeaticon ahuilex ja yora ti ajyiticon amoquexi, soc jach ni ja jas calaticon ja ba jcartaticoni. 16-17 Ja jTatic Diosi jel ja yutzil sc'ujoli, jayuj jel yaj huax yabyotic. Ja yeni huan nix yaa quitic jnihuanc'ujoltic tola vidaa. Mix quilatic ora oj quiltic sat ja jas oj ni yaa quitiqui. Ja Cajualtic Jesucristo soc ja jTatic Diosi, ja' ni yip ja hua c'ujolexi. A scoltayex tola vida ba toj oj ajyanic soc toj oj c'umananic.