1 T am hahawa ni-chehgi g akimel hegai anghil. K id ab daꞌiwuni heg amjed kownal daikud mo g Jiosh an daha heg wehm mo kahwalkaj ab e chehgidch. K hab d ahga ihda mo g Jiosh ab t-mahkch g pi ha huhugedam doakag. Shuhdagi o si tohonnod hab masma mo g tondam hodai 2 ch an si eda med g kahya. K g doakag uhs ge aꞌaijed shohshon ch an aꞌai kehk ihda akimel ch an babhe hemho wehs mashad ab. K g hahhagaj d ha-kulaniga g nahnko mahs hemajkam wehsko jewed dahm. 3 K pi an hu haꞌichug hegai mo pi hohhoꞌidachud g Jiosh.

Am at wo haꞌichugk g Jiosh kownal daikud. Kut an wo dakad hegai mo kahwalkaj ab e chehgidch. T g piongaj ab wo si has elidad 4 ch wo neidad g wuhioshaj. T g chehgigaj an wo oꞌohadagk ha-koka ab. 5 Pi at dahm ep wo s-chuhugamk nat pi g tonlig aꞌai wo wuhshanid ab amjed g Jiosh. Kut pi an hu wo haꞌichugk g tash. T pi wo e tatchuad g lalampa. T g Jiosh hemajkamga am d wo kokownalk chum hekid.

6 K hab hahawa ep kaij g anghil ab ni-wui, “Idam haꞌichu ahga o woho. Kut wehsijj ab wo chum s-wohoch. Jiosh o wa ab ha mahkch g haꞌichu i e-tashogiddam g Hekia S-apꞌekam Gewkdag mat am wo haꞌichu ha chehgi ch am ep ni-chehani mant am wo em-chehgi hegai mat haschu has wo e juh s-hohtam.” Neh, bo kaij g anghil.

7 K g Jesus hab kaij, “Ab g wo i ni-kaiham. S-hohtam ant wo jiwia. Jiosh at wo wa s-ha hoꞌigeꞌel hegam mat ab wo s-wohog el wehs ihda gam hu baꞌich haꞌichu ahga mo in oꞌohanas.” Neh, bo kaij.

8 Kuni ahni John wehs kah ch wehs neid ihda mani in oꞌohan id eda oꞌohana. Am o wa kehk hegai anghil mo ab ni-wui neok. Nt ab i gei wecho k ab chum si has elid am i neidok k kaiok ihda wehs. 9 K wabshaba hab kaij ab ni-wui, “Pi g am hab e juhni. Dani wabsh em-wehm pion ahpim Jiosh haꞌichu i tashogiddam ch wehs hegam mo ab s-wohog elid mo haschu an oꞌohadag id eda oꞌohana. Ab g has i elid g Jiosh.”

10 K hab ep kaij ab ni-wui, “E o aihim mat wehs am hab wo e juh ihda map neid ch kah ch an oꞌohan. Pi g am ehsto.

11 “Pi at hedai wo shaꞌi e nako mas am gawul wo e juh mat hekid wo e ai ihda. Hegam mo d p apꞌekam at d wabsh wo pi apꞌekamk. T hegam mo d s-apꞌekam am hab wabsh wo i chuꞌigkad ch am hab wo wa junihid g s-apꞌekam.”

12 K g Jesus hab kaij, “Ab g wo ni-kaiham. S-hohtam ant wo jiwia k wo uꞌad g ni-mahkigdag mant ab wo i ha mahkhi haꞌas mat hedai heꞌes haꞌichu hab i juh. 13 Ahni ani d alpha ch d omega. Id o hab d ahga ‘si wehpegkam ch si oidchkam’ ch hab d ep ahga ‘i shonkam ch i kuhgkam.’ ”

14 Neh, no hig pi woho mat wo si s-ap e tahtkk ch pi wo si e el hegai mat g wehschugaj s-kehg wo wakonask, Pegih, mt hab wa masma wo si s-ap e tahtkk matp gam hu hab wo i e juh g pi ap em-chuꞌijig. Jiosh at ab wo em-mah g apꞌedag mamt ab wo koꞌad g bahidaj hegai doakag uhs ch ab wo i wahp kolhai kihjeg t ab heg eda Wechij Jerusalem. Kumt wo si s-hehgigk. 15 K wabshaba am jeg ed hab chuꞌig hegam mo s-uam haꞌichu hab wua ch hegam mo hab wua g hihoina ch s-totontomkam ch ha muꞌakam ch hegam mo jijoshchud g hemajkam haꞌichu ha-nahtoi ch hegam mo s-hohhoꞌid g haꞌichu iattogi ch haꞌichu ha iattogid.

16 K hab kaij g Jesus, “Ahni ant am cheha g ni-anghiliga mat am wo em-ahgi ihda wehs ahpim mam am kawod e nanmek ch ab has ni-elid. Ahni ani d Davidbad amjedkam ch wepo masma mo g si s-mahs siꞌalig huꞌu.”

17 Hekia S-apꞌekam Gewkdag o ab i ha waid g hemajkam am gai ha wuhshanim hegam mo ab si has elid g Jesus Christ, Idam o hab kaij, “Ab g wo behꞌi g pi ha huhugedam doakag.”

Kut wehsijj hegam mat ab wo kah ihda at hab waꞌap wo chei, “Ab g wo behꞌi g pi ha huhugedam doakag.”

Pegih, ab g wo behꞌi wehsijj ahpim mam hedai i tatchua. Bo wa masma am em-wehhejed mo g shonkam shuhdagi am ha wehhejed g tonkkoi.

18 S-e g wo nenꞌoidk ahpim mamt ab wo i kah mamt pi am hu gawul wo juh ihda gam hu baꞌich haꞌichu ahga mo in hab chuꞌig id eda oꞌohana. Muꞌi o haꞌichu in oꞌohadag g shoꞌigdag. Kut id ab wo i wehnad g Jiosh g s-koꞌok em-namkidadag mamtp ab haꞌichu wo i wehnad hegai mo in oꞌohadag. 19 K in oꞌohadag mach apꞌedag matt am wo i wahp Si Hekia S-apꞌekam Kihhim ed k wo huh g bahidag hegai uhs mo ab t-chehgidch g pi ha huhugedam doakag. T wabshaba g Jiosh gm hu hab wo i juh g em-apꞌedag mamtp ahpim haꞌichu gam hu hab wo i juh id amjed oꞌohana.

20 Hegai mo am s-mahch ch ahg wehs ihda o hab kaij, “Woho o wa. S-hohtam ant ab wo i hih.”

Pegih oi g. Ab g i hihm, t-kownalig Jesus.

21 T wo wa s-em-hoꞌigeꞌel g t-kownalig Jesus k am wo em-wehmajk.