1 T amjed hegam hema wewaꞌak anghil mo an uhꞌukch g wewaꞌak hohas-hahaꞌa am jiwia ni-wui k hab kaij, “Ab g i hihm k neid ihda geꞌe kihhim mo am miabidch kehk g muꞌi aꞌakimel ch heg wepogidas mo g si pi apꞌekam chehpaꞌawi. Id at wehsko wo maꞌish g jewed g pi apꞌekamkaj. 2 Kokownal wehsko jewed dahm at heg hekaj hab wo juh g pi apꞌekam. T g hemajkam wehsko jewed dahm wo noda hab juhkch g s-tohntom haꞌichu hab masma mamt wo nawkk iꞌok g nawait. Neh, nt am wo m-chehgi mat has masma ab wo bei g s-koꞌok e-namkidadag ihda pi apꞌekam kihhim.”

3 T g Hekia S-apꞌekam Gewkdag ab si i ni-wehmt. Tki g anghil am i ni-bei tohono jewed wui. Ni am g uwi neid. Kuki id an daichug s-wegi s-ta ehbidamakam haꞌichu doakam ab. K id wewaꞌak mohmi ch wehst-mahm aꞌag. K g pi apꞌekam chechgig an oꞌohadag wehsko ab. 4 Ihda uwi o si s-ihbhaimagim ch s-wegima e enigadadch ch g ohlakaj ch s-kehg hohodaikaj e hehosidch. K an nowij ed hab chuꞌig g ohla tahsa ch shuhdags g si s-uam haꞌichu. Id o hab d ahga mo d wabsh tohnto ihda kihhim.

5 Ab koaj ab o oꞌohadag g chehgig. K id s-aꞌagi has d ahga ch hab chuꞌig, “Si Geꞌe Babylon kihhim o hab sha masma mo d ha-jeꞌe g wehs chechpaꞌawi ch totonto id dahm jewed.” 6 Neid ani mat shaꞌi si s-ap e taht ihda uwi mat e koꞌij hegam mat pi dagito g Jesus. Heg o wa wepo mat nawm iꞌok g ha-ehꞌed.

Kunt am i neidok wabsh wohoꞌi si has ni-taht.

7 K ab ni-kakke g anghil ch hab kaij, “Shahchu apt ahgk si has e taht. Am ant wo m-ahgi mo has d ahga ihda map s-neidma. 8 Ihda s-ta Ehbidamakam mo wewaꞌak mohmi ch wehst-mahm aꞌag o d chum doakamkahim ch hahawa e muhkid k wabshaba ep wo e chegito k ab wo i wuhsh s-juhk wag t amjed k hahawa ep wo e muhkid. T heg hekaj wo si has i e taht g pi e doꞌibiakam. Idam o g ha-chechgig pi an hu oꞌohadag heg eda oꞌohana mo an g ha-chechgig oꞌohadag g e doꞌibiakam.

9 “K d ha-wuikam g Jiosh hemajkamga mat wo s-amich ihda. Hegam wewaꞌak mohmi o d wewaꞌak kaꞌakwulk. K idam ha dahm daha ihda uwi. Idam mohmi o d ep wewaꞌak kokownal. 10 Hetasp idam at im hu hab i e juh. K hemako d wabsh kia kownal. Kut hemako koi am hu i dahiwua k hekid am wo i dahiwua k pi shaꞌi tash am hu wo dakad. 11 Hegai s-ta Ehbidamakam mat e muhkid at d wo gigiꞌikkokam kownalk. Id o ha wehm chikpan hegam wehpeg wewaꞌak kokownal ch gam hu wo him k wo e muhkid.

12 “Hegam wehst-mahm aꞌag map neid o hab d ahga mat wehst-mahm kokownal ab ep wo i wuwha. Idam at heꞌes ab wo i wehmt hegai s-ta Ehbidamakam 13 k ab wo mah g e-gewkdag no pi wehsijj e wepo masma haꞌichu hab elid. 14 Idam at wo cheggia hegai mo kahwalkaj ab e chehgidch. T oi wa heg wo ha gewito no pi d geꞌe kownal am ha dahm g kokownal. T hegam mo si s-gewkam am oid ihda mo kahwalkaj ab e chehgidch am wehmaj wo ha gewito nat pi ab i ha waid k am i ha chuhcha.”

15 K hab ep kaij g anghil ab ni-wui, “Am ap neid mo ihda uwi am muꞌi ha dahm daha g ge shuhshugi. K id hab d ahga mat g geꞌe pi apꞌekam kihhim am wo dahmkad muꞌi jejewed ch muꞌi nahnko mahs hemajkam. 16-17 Kut g Jiosh hab wo ha juh hegam wehst-mahm kokownal mat ab wo wechokad g s-ta Ehbidamakam. Kut e wehm wo si s-kehꞌidad hegai geꞌe kihhim mo wepogidas g pi apꞌekam uwi ch wehs haꞌichu wo wohppoꞌi. T heg gam wabsh wo i dahpkad. T idam wo huh g chuhkugaj k wo hugio g meikaj. Neh, bat wa masma am oidk hab wo e juh mo has i kaij g Jiosh. 18 Ihda uwi map neid o d hegai geꞌe kihhim mat s-gewkam an wo ha uꞌukch g kokownal aꞌai jewed dahm”