1 Am ma daanale, Yesus ayo tunum dinim bokon kawu bomda God ami beten kamaan-balala, almi daang bakaalin tunum kiili, aso maakup bom-bilip kemin, ami beten keba ayo disa kelule, kulaa daang bakaalin tunum maakup ma tal Yesus ayo dik-daala-lomda: Kamokim kapyo, beten kemin kukup kaali, nuli dok kano-lomdupla, beten ke-mokomup i? Sawaalak kaali, oksam ukayin tunum Jon ami daang bakaalin tunum ata-kup kukuyin-bam bokoya-lomda, God ami beten kamaalin kukup tambal namti kalabuu no, kal-bomda kukuyinsa ultap ke, kapkal God ami beten kamaalin kaami kukup kaali, kukuyan o, kala bokolale, 2 Yesus ayo bokoya-lomda: God ami beten kamaalin kaali, kalanola bakaalalip ko:

Numi Aatumen God kapyo, Nuli kapni win kaa, atin ti tambal kemin kaata, nuli kufop-tum o, kalup kemin, Kabi alik nuli yim-tama tam kapni miit tem daa-lom tiin molokomap kaali, talak o, kala-somla ko. 3 Am kala daan-bulula ilup kaa, nuli ima kaa kukaayin-balawa, tiika-bomdup, inan una-buluwa yo. 4 Kayak kayak ita, numi kukup kanuyilip kaa, kukan-tiiyila-yaabup kemin, kanola ti kapkal numi ban wakamin kukal kukan-tiiyin-balawa yo, kala-somla ko. Mafek mafek mafak kaa tiltam numi yam-kukulon o kalbu namti, dukum-kup dong dakaayim-balapla, ban kemin kaa uktayuluk o, kalalip, beten kamaalin kaami kukup kaali, kutal-fuku-bomdiwa yo, yaka ko.

5-6 Kemin, Yesus ayo asuk beten kamaalin kaami sang kaali, faldak-tiimin weng kusnum ma boko-lomda: Am malang tini-lom am iip yaknule, tunum ma yak aba din almi aptum am din-ilomda almi aptum ayo dik-daala-lom bokola-lomda: Nak-tunum kapyo, am kamala kutamiip kulawu nalmi naktum ma tal nalmi am kawu sindila unon o, kalala tala. Katale, nali ima dinim o, kalalila tili. Kemin, tam tiin-ilomdap kapta dong dokop-na bret asuumano ma kup-napla, kulii-din daali ayo ina sinda unala, kawu ilom nasiik maan kaa tiip-ton o, akale, 7 Tunum am kaptam akanba ayo bokola-lomda: Saal kaltam talalu lii-lom alimal akanbup. Kemin, tam tiin-laa-bamdi, man imi tiin yak dakel-yilami kemin, nali tam tiin ima kaa ma kup-tokomi disa; kabi duluum-alomdap baan ti kep-na unan o, akase. Lale, 8 nali kabak-ami sang kaali bokoyon o, kalalila kemin, weng san iliwa! Am kayaakim ali utama yi, Tunum abip tola-bomda bakaba kaa nalmi nak-tunum u, kalalaya, kaata fan tam tiin-somdala, ima ayo kolokoma disa. Ti atamala, tunum abip kaptam tola-bomda naanba, ali suun-daa-yaamin disa; ti naanin-kup kema kala, kala-somdala kawu, akal tam-tiin tam ap-tunum ami weng alik kanu bokoba kaali, maan tela ima kaa kolaya, kuliila unokoma.

9 Kanolin kemin, nami weng bokoya-lomdi kaata, ibi kanumin o, yokokomi kabak-ata kanu-malip kayi! Kibi dok kanolin mafek mafek kaata ma iibup o, kalip namti, suunkup God ami dik-dakaan-bilipla, ayo kukaayilama ko! Kanola suunkup fen-tal-une-bilipla, God akal dong dokoyilaya utamalip te! Aa, ti saal dok-dok kemin ultap ke, ti suunkup God kaa ti dik-dakaan-bilipla, dong dakaayin-balaya yo, kala-somla ko. 10 Kanola ili mafek mafek sang ayo ma God ami dik-daalip namti, akal tunum alik dik-dakaanbip imi kuyokoma le, kuno tunum imi mafek mafek fen-tal-unebip namti, kanola God alta dong dokoyila fen-bam uta-mokomip. Aa, tunum saal dok-dok ke-mokomip kakal ti, saal busuu-yinba-kup, im-taldang almi miit tem ayo daalokoma no!

11 Awil-fakal kipyo. Kibi nami weng kalawu weng sanalip ko. Kanola kapni man ayo dik-daap-ta-lomda: Aatumen kabi aniing ma inamnon o, kebi kemin, kup-nokomap e disa ye? kala dik-daala kaali, inap kaata kolokomap ema? Disa te! Ti aniing kaata-kup kolokomap. 12 Aa, ti asuk dik-daap-ta-lomda: Awon win ma inamnon o kebi kemin, kup-nokomap e disa ye? kala dik-daala kaali, kaa keng mafak malepkan kuuta, kuluu kolokomap ema? Disa te! Ti awon win kuuta-kup, kolokoma no. 13 Kibi ti ban-kemin tunum-kup bom-bilip. Lale, kibi mafek mafek tambal kii, kaltipni man kii kukaayila-yaabip tap kanola, iltipni Kaalap abiil tikiin kayaak God akal ti tunum kemin, alta mafek mafek tambal iyo almi man kipni kukaaya-laaba; ami kukaayin kukup kaa ti, uta uta kesu. Kemin, kipkal ami dik-daalokomip kaa, akal almi Sinik Tambal ayo dibii-tildaak dong dokoyokoma kayi! kala Yesus ayo kanum bakayila ko.

14 Tunum ma sinik mafak ta dap-mafak-daalaya, weng abat kesa. La, Yesus ata sinik mafak ayo fotabamna yak banala kulu, tunum ayo tambal ke-lom asuk weng bakan-tabale, unang tunum iyo atam-ilomdip, fanang alik tam baneyilu. Katale, 15-16 malo ma ili boko-lomdip: Yesus ami diim kawu, sinik mafak imi kamokim Belsebul o kala, Setaan ata bomda tiin mo-bom dong dakaan-balala, ali unang tunum sinik mafak im-buusip imi fotaba yak banebip o, ke-balale, malo ma imi aket fukunin kaata, Yesus ami dik-daaluwa, kukup akal alik ma nolaya kawu atamuwa yi, Kaa kukup mafak ema! kanuba kaa kalum i, kala-lomdip bokolip ko: Kabi kukup ukol alik ma numi kukuyap nokol utamuwa yi, God ata dong dokop-talala, yak kanolin kukup kaa kanubap kala, tukum o, kala bakamip. 17 Lale, Yesus ali kanubip kiimi aket fukunin kaali, utam-ilom bokoya-lomda: Kiwe! Mep faldak-tiimin weng kala bokoyokomi kaali, talalu weng selin! Abip maakup ma kaptam-ali biki-kutii dinan-kulii-tabip namti, imi titil foko-laabip namti, kulaata mafak-nokomu no. Kanumin ultap kemin, kanola unang tunum am maakup kaptam bom-bilip ili, weng aal-kup diki-bam suunkup dinin-kup, ilip namti, kaa maakup ilokomip disa; biki-lom una-tala-ke-lokomip. Kemin, ultap o. 18 Kibi bokop-na-lomdip: Setaan ayo titil so ma kup-tala, almi kayaak sinik mafak imi fotabam-napla, yak banen-umbip o, ninbip kaali, tifan dinam Setaan so, almi kayaak sinik mafak iso, alimal yakal biki-kutii miit alep ke dinan tabolip kaa, alimal kii titil-fokolamip disa; (Lale, Setaan ali kanu-mama disa kawi! Ibi kulaali, babonin weng bakabip te!) 19 Nali sinik mafak iyo fotabi yak banen-yaabip kanolin kemin, ultap Juda daang bakaalin tunum yakal sinik mafak iyo fotabamnip yak banebip o. Ibi bokop-na-lomdip: Setaan ata Yesus kaali, dong dokolala, sinik mafak fotabe-balala, yak banen-umbip o, nakan-kaan-umbip. Yale, kipni okok kemin tunum iyo sinik mafak fotabam-niwa yak banen-umbip kiili utamipla, Tunum kaa ma Setaan ami titil kaata kuluu-lomda sinik mafak kii ma yak banoma disa yo, kalalip utam-silip. Kemin, ili kabak-ata utamiwa yi, Kibi nami sang bakap-nambip kaali, ibakap-nambip o, kala-lomdip Juda okokmin tunum ita kanum bokoyokomip ko. 20 God alalta nali titil kup-nalala, mep sinik mafak kii fotabamni yak banen-umbip kaali, tifan namti, ibi utamiwa yi, Awu, faneng God ayo unang tunum imi yim-bi-din nalmi miit tem tii-lomdi tiin molokomi no kalsa kaali, kuluwu tiltam tabu no kala, kalik o kala, Yesus ayo kanum bakama ko.

21 Kemin, Yesus ayo almi titil dukum kaata, uta uta ke Setaan ami titil kaa wela kabaak bansu. Kemin, kaami sang kaali, weng ma faldak-tii bokoya-lomda: Tunum ma titil soyim ayo tam almi bung kiiyo, talalbi kutam almi am tii kambola, waasi dinin mafek mafek iyo foko miki-lomda, almi am bung ayo tiin mo bom-balala, almi bung uyo ti tambal-kup tiin-bilipla, 22 kulaali tunum ma ayo disa akal titil ta akal ma kesa ata tal atamala, aso alep din-bi-lomdip ata ata ke-lomda, aptum am kayaak ami waasi dinin ami mafek mafek kii mikilom faksa-lomda, Tal nelamu disa yo, keba so, aptum ami mafek mafek dotu kutam am tiiba so, kiiyo alik dik-duu-lom almi waasi tunum ami kolokoma kaali, tunum am kayaak ami titil kaali kulu dinim-nokomu.

23 Kulaa, dok kanolin unang tunum ita nami ok ayo ma nuumin disa, aa yang aptum kusal iyo dong dakaayin-bilip tildang nami miit tem talemin disa, kemip namti, kiili nami waasi unang tunum ililtap ke unang tunum imi oko-takayim-bilipla yang banen-umbip ililtap ke-lom kanun-umbip o, kala Yesus ayo kanum bokoya ko.

24 Yesus ayo asuk weng faldak-tiimin weng kusnum ma bokoya-lomda: Sinik mafak ma tunum ma ami diim kawu laaba. Kemin, sinik mafak ayo tunum kela din ok dinim-kup bokon kawu yang aba tildang aba ke-bam baan diim uyo ma utam-somdila ilon o, kalala, fen-tal-tal kema yi, Baan diim ayo ma atamin disa keli kala, kalba-kup, ayo bokola: Yi! nami am baan kaa, fen-bili disa keba kemin, asuk umbilin nalmi tunum kela talsii ami diim kawu bomdila ilon o, kalale, 25 kulaali asuk umbilin ulala, Ami tunum ami iipyak tem kaa am kaptam-ami sung ilol aye, saak yak bung mafek mafek kiiyo atin diliit mo-lom tambal ma kela-lomda, tunum disa am-kup bombuu tap keba kalale, 26 kulaali din sinik mafak ilmi-kup fetkal kiita, itam-ilom, iso kulii-tal tunum ami diim tiilala, alik maakup bomdipla, kamasi sinik mafak maakup kaami ilsa kulaali, kulaak banin, ale mulo kaami sinik mafak fetkal kaa tiltam tilip kiita, ita ita ke-lomdip kulu tunum kulaami aket fukunin mafak kaali, atin mafak-alom, uta uta kelula, kamasi aket fukunin mafak utale, kabaak banu kewansu no, kala Yesus ayo faldak-tiimin weng kaa kanum bokoyila ko.

27 Yesus ayo weng ma unang tunum yaapkan imi tem kawu bokoyilale, kulaa unang ma usiik Yesus ami dukum-kup bokola-lomdu: Kapyo, tambal kemin kapni kawak uyo tamu-lomdu muuk ayo kukaap-tam-bamdu tiin molu bom bii fasuu-lom tunum dukum ke-salap. Kemin, God ata kawak umi kukup tambal-kup kuka-um-balala, fiyaap duu-buluya yo, aku. 28 Lale, Yesus ayo bokowa-lomda: Fan bakabap. Katale, unang tunum ili kawanta ma God ami weng kaa weng san-kaa-bamdip, God ami kukup tambal kaata kutal-fuku kulii-tabe-bam kem una namti, kaata fan God ayo kukup tambal kaa, maso ma ti kukaayin-kup kem-unokoma no, kalala, Yesus ayo unang umi weng kanum bokolula maan tiiwa ko.

29 Unang tunum yaapkan iyo din Yesus ayo ata-buluwa, kukup akal alik uyo ma nolaya, nuyo atamum o, kalalip tal falala duuliple, bokola: Ibi aket fukunin mafak kaali fukun-ilom ibi bokop-na-lomdip: Mirakel o, kala kukup akal kusnum kaata ma, kukuyapla kawu, atamuwa yi, Kabi fan God alta tam-baala tal-salap kala kalum o, kala-lomdip dukum-kup dik-dakamin-kup kebip. Lale, nili kanolin kukup kaali ma kanumila, kaami fiyaap kaali ma, duu-mokomip disa. Kemin, sang maakup ma kaata-kup kukuyokomi kaali, Jona ami toop aniing dukum kaami mat tem tiin ilsa kaami sang kaata-kup kukuyokomi. 30 Siin sawaalak kawu, God ami weng tem bakayin tunum Jona ayo almi abip kaa kela umbilin tunum miit kusnum ma imi abip win finin dukum Niniva yo, kala-laabip kawu, Niniva kayaak iyo bokoya-lomda: Kibi kukup mafak kulu kanun-umbip kuluu kulaalin o, kal-bomda bokoya bokoya ke-bisa ultap, Dukum Ami Man Nali tal kamala kulaami unang tunum bom-bilip kiita bokoya-lomdi: Kibi kukup mafak kula kanun-yaabip kuluu kewin o, kalalila bakayon o, kala talsi no. 31 Sawaalak kaa, Seba bokon kaptam-ami unang tunum imi tiin molin unang kamokan Kwin uyo Solomon ami weng tambal kaata ma weng selon o, kalalula, ulmi abip kaali kela-lomdu, yakyak umbital Israel-miin imi bokon kawu talsu. Kanola am mafiing diim daanokomu kaali, God ata unang tunum alik iyo yim-tama din weng talalmin baan diim daale, yim-bak-saanokoma kaa unang kuluuta tam tola-lomdu, kamala kulaami unang tunum bom-bilip kipni sang ayo bokolule, Solomon ami weng tambal kaata, kabaak banule, Yesus ami weng tambal kaata, uta uta kesuu. Lale, unang tunum kalawiili, ma weng san-silip dinim o, kalalula, God ami diim kawu, kanum bokolokomu. 32 Kanumin ultap kemin, am mafiing diim daanokomu kaali, God ata unang tunum alik yim-tama din weng talalmin baan diim kawu daale, yim-bak-saanokoma kaa, Niniva kayaak iyo tam tola-lomdip, kamala kalawaami unang tunum bom-bilip kipni sang kaata boko-lomdip: Nuli Jona ami weng tambal kaata, weng sandupla, aket fal-siki-lom, nulmi ban wakamin kuluu kewasup. Kemin, Jona ami weng tambal kuluu kulaak banula, Yesus ami weng tambal kaata, uta uta kesuu. Unang tunum kalawiili, Yesus ami weng tambal kuuta, weng san-silip. Lale, nuli aket fal-siki-lom nulmi ban kemin, kaa kulaalokomup disa yo, kala-silip o, kala, Niniva kasel ili kipni sang kaata, God ami kanum bokolokomip o, kala, Yesus ayo kanum bakayila ko.

33 Yesus ayo asuk faldak-tiimin weng ma bokoya ko: Ibi ilaam kaa iilfo-lomdip kulii-daak kabuk tem tiile, baket kuuta kuluu-lomdip ilaam kuumi kulaak tinilokomip ema? Daa; iilfo kuyak alami baan diim kawu tiiliwa, unang tunum talokomip iyo tal kaali ata-mokomip te! 34 Kemin, kipni tiin kiili, amitom ultap. Kemin, amitom saal ayo busuulip namti, falala-kalin ayo am ba talokoma. Kanolin tap kemin, kipni tiin kaa baalip namti, falala-kalin ayo tal kipni tiin ayo tulu ata-mokomip. Kemin ale, kipni tiin kaa mafak ilu namti, atin ti malang tinilin diim kawu ilomdip mafek mafek kii ma ita-mokomip dinim o. 35 Kemin, ibi kaa talalu utafii-bamdipla! Ibi tiin mafak ililtap ke babon-bamdip, kipni aket fukunin ayo malang tinilin tap ke ilin disa yo; tiin tambal-kup baa-bomdip mafek mafek itam-laabip tap ke, ti tambal-kup bomdiwa kayi! 36 Ibi God ami falala-kalin kaa kuno kewip, talaba daak kipni aket tem ayo un iilfolokomu kawu, kipni aket tem malang tini-yinsu uyo alik falala-kup kala-lom ibi falala-kup kala-lom, ilaam iilfolin tap ke, ibi tambal-kup ilokomip o, kala Yesus ayo kanum bakayila ko.

37 Yesus ayo kanum bakamsi bokoyila disa kelule, kulaa Falosi ayo ma tal Yesus ami bokola-lomda: Kapyo, talapla, naso alep din nami am kawu ima inum o, akale, fan Yesus ayo aso alep din Falosi ami am kawu tiinip. Kemin, 38 Falosi ayo Yesus kaa atama yi, Yesus kaa Juda numi kukup kaata kuluu-lomda sikil kaa diing-nama dinim ke-lom kambola ima imba kala, atam-ilomda aket dukum fukuna ko. 39 Kanolale, Kamokim ayo ami kanola kaali, atam ale bokola-lomda: Lotu kaami lo fukumin kaali, Falosi ibi wok ket inin kaap so, falet so, ili disa tiltam saak lo angtiil diim kulaata-kup diinga-laabip. Katale, yak iipyak tem kabak-alile, diinga-laabip dinim. Kemin, kanolin tap o. Kipni aket fukunin ayo ti God ami tiin diim kawu tiinum tambal o, kala-lomdip suunkup wok-sam kaa waka-bam ken-umbip. Lale, yak kipni aket fukunin mafak dukum so, unang tunum imi moni kaami aket-kup tiin nen-bam kuluu-yaamin kaaso, iyo ma keya-laamin disa ken-umbip. 40 Kipni aket fanang kaali ti, babonbip kemin, ibi ti talalu utamin! God ami mafek mafek talalu kutiisa kaa, saak lo kaata-kup talalusa nema? Disa; ali tildak ipnaal diim so, iipyak tem kabak aso, maakup talalu kutiisa te! Kemin, ibi ipnaal diim so, iipyak tem kabak aso, kiili tiin saan-bamdiwa yo, kala-somla ko. 41 Ibi aket fukunin ayo ti fal-siki-lom unang tunum mafek mafek iibip iyo olen-daayinbip-kup, kipni inin-inin kaali, falet diim bombuu aye, yak ket tem kabaaku wok so, bombuu aye, kiiyo kuyokomip kaali, ibi God almi tiin diim ayo atin tambal-kup ke-lokomip te!

42 Falosi kipyo, kibi weng senin! Kibi maang aa, kuut aa, yak mafek mafek inin-inin katip katip atul-kup tabasip kii, duula kutii sikip nakalkal keliple, sikip maakup ma kabaak-ata tii God ami kukaala-yaabip tap, ibi kukup katip katip kiimi aket kaata yan-buluya, kanu-bam ale, yak kukup sengkan dukum kaami aket kaata lukuuya-laaba. Kemin, kaali ti ibi God ami aket yelula, dukum-kup ma kolin dinim ke-bamale, iltipni kaptum kusal iyo alik maakup ti kukup tambal kaata-kup kukaayin dinim; kemin, God ali ipni fiyaap kaa duun-umba disa. Am ma daanokomu kaali, kaami kalan kaata, God ayo angtiil yol kaali kukaayokoma. Kemin, ibi kukup dukum kaami aket-kup yelula, kanu-mokomip kaata, God ayo fiyaap dukum duulokoma. Kemin, yak kukup katip katip ita-kup kanumin disa; ti kukup dukum kaso kanu-bam kemin o, kala-somla ko.

43 Falosi kipyo! Kibi din lotu am unokomip kaa, Nuli tunum kamok te! kala, din abiin tambal kawu tiinupla, unang tunum alik iyo itamik i! kalalip tiin-laabip. Aa, din ima waan saanin baan diim unokomip kaakal, kipni aket fukunin kaali ti, Nili fatap diim kawu tola-bilila, unang tunum alik iyo tal bakap-nam-bamdip: Kamokim kaa balap o? Kukuyin tunum kaa salap o? nakan-kaamik i, kalalapla, kabi kanun-umbap. Katale, ilom am ma daanokomu kaali, God ali kanun-umbip kaami kalan kaata, kibi angtiil yol kaa kuyokoma no.

44 Kayak kayak kiimi titafiibip kaali, angtiil diim kaata, Kabi tunum tambal o, tinbip. Katale, kapni iipyak tem kabak-ami aket mafak so, fanang mafak so, fukunbap kaali, tunum taana dibii-din dawaalip tawaal tem kabaaku foma-sing-daka-balala, unang tunum iyo atamin disa ke-bomdip disa tiip diim kulu tal-unebip. Ultap kemin ale, ilom am ma daanokomu kaali, God ayo kaami kalan kaata, kabi angtiil yol ayo kup-tokoma no, kala Yesus ayo Falosi imi itafiimin weng kaata kanum bakayinsa ko.

45 Kemin, kanum bokoyilale, kulaa lo utamsa tunum ma tiltam Yesus ami bokola-lomda: Kukuyin tunum o! kabi kanolin weng bokolap kaa, nuli kaa itafiimin weng bakabap kala, kalbup o, akale, 46 Yesus ayo bokola-lomda: Ayo, faneng, bakabap te! Lo utamsip tunum kibi unang tunum iyo bokoya-lomdip: God ami weng kuka-daasa kaata ti fukulin o! kala, kaata-kup bakan-umbip disa; kaltipni saak weng sawaa kusnum kusnum iyo kulii tam God ami weng kutiisa umi tiip diim kaa daka-bamdipla, unang tunum iyo bokoya-lomdip: kutal-fukulin o! yakan-kan-umbip. Kemin, unang tunum ili kaa utamiwa yi, Lo yaapkan iyo kutal-fuku-bam nuyo fiitbup o, kalaliwa, aket uluum kaa tabeyila-yaabu. Lale, ibi olen-daayila dong dakaayin-bilipla, iyo lo fukumin disa ken-umbip. Kemin, am ma daanokomu kaa, God ali kabak-ami kalan kaata, lo utamsip tunum kipkal, ti kanola angtiil yol kaa kuyokoma kayi!

47-48 Kipni kawil-fakal ili, God ami weng ku-fatap-daa bakayin tunum kiiyo, yan-fakabi imbii din kuwakamsip. Kemin, ibi kasen-foko God ami weng tem bakayinsip imi aket kaata, fukunbup o, kalalipla, imi dibim diim kaayo, tambal-nuk o, kalalipla, tuum uyo kuluu ilaka-bamdip, aa as tes san kiiyo, diki-bam ken-umbip. Katale, kipni aket tem ayo, Tambal-kup ke, kawil-fakal ita taba kiiyo anu-silip o, ken-umbip. Kemin, kibi iltipni kawil-fakal ililtap kayi! Kiili anulip imaa-silip ale, kipta imi dibim diim uyo tiin mosip. Kemin, am ma daanokomu kaali, God ata kaami kalan kaata, ibi angtiil yol kaa, kuyokoma. 49 Kemin, God ali yak aba kunolin mafek mafek bombuu kuluu utamsa. Kemin, ali kipni kukup kaami sang ayo boko-lomda: Nali nalmi weng ku-fatap-daa bakayin tunum so, aa daang bakaalin tunum iso, ili yim-baali din unang tunum imi diim abokomip. Yale, tunum ita tam taba malo ma anu kuwaka-bam ale, kuno malo ma kiita, disa angtiil yol-kup kukaayin-bam, ke-mokomip o, kalala, God ayo kanum bokosa no. 50 Siin sawaalak God ami tawaal so, abiil so, talalusa kawu, kipni kawil-fakal iyo God ami weng ku-fatap-daa bakayin tunum iyo yan-fakan yakyak kulii umbital kula diilu kemin, tunum unang kama kula bom-bilip yakal ti kanola, nami daang bakaalin tunum ye-bamale, kuwaka-bam ke-mokomip. Kemin, kabak-ami kalan kaata, kawil-fakal iyo kaami maan kaata kuluusip. La, God akal kipni kawil-fakal imi ban so, iltipni ban kiiso, kuyaku-diyaku ke-lomda, ban kuumi maan kaata, God ayo angtiil yol kaa kipni kuyokoma. 51 Kamasi kaptoop-ali Kein asiik taba-lom niing Abel aala taanala, kulaali God ami ok tabuulin tunum iyo kayak kayak ita yan-talan-umbipla, yan yakyak kutama tal awem tunum ma Sekaraya namti am awem kaldak ale, mafek mafek fuulip kiin-aba-laamin baan diim kabaaku an-ku kabaak tiilipla saaksa. Lale, kabak-ata asuk bokoyokomi kemin, weng san bom-ilipla! Kipni kawil-fakal kanola ban ke-biliwa, kanola kaami ban kuluuta tal man loop kipni diim abamnula, God ali kabak-ata angtiil yol kaa, kuyokoma ko.

52 Lo utamsip tunum kipyo! Kibi utamiwa yi, God ami Sukon Tem kaali, God ami aket fukunin weng kaata, kukuyin-bulu utafiibup kala, kalbip. Yale, ti kipkal God ami aket fukunin kukup kaa, kanu-malup dinim o, kal-bom ale, yak kaptum kusal imi God ami aket fukunin kukup kaata, kanumum o, kal-biliwa, kipta yim-tal yim-tal ke-bam ken-umbip. Kemin, ilom kawu, God ayo kaami kalan kaata ibi angtiil yol dukum uyo kuyokoma no, kala Yesus ayo lo utamsip tunum imi kanum bakayila ko.

53-54 Kanum bokoyinba-kup, Yesus ayo am kula kela tam daak abip unale, alik maakup yak ami daang aba un-bomdipla, lo utamsip tunum so, Falosi iso, iyo Yesus ami aket atul dukum kaayo kola-lomdip, Yesus ami bon tem ayo talalu tiin dik-yak-dela dik-dakaalin-kup ke-bulupla, ayo weng mafak ma bokola kala kalale, kulu ti dibii-din weng talalmin baan diim kawu daalum o, akan-kaa-bamdip atafiimin weng so, kasen-fakaalin weng so, dik-dakamin weng so, kiili ti yaapkan Yesus ami bakaalip ko.