1 Ti na yel Abraham one aa tinam bane a Jew dim yaab la yela ye bo? O da nye bo? 2 On da niŋid siꞌem la yaꞌa keen ka o a popielim sob Winaꞌam tuon, o da naan moren siꞌel na nweꞌe nyoꞌog, ka lee ku nyaŋe nweꞌed nyoꞌog Winaꞌam tuone. 3 Li sob Winaꞌam gbauŋin ye, “Abraham da niŋ Winaꞌam yadda, ka Winaꞌam geligi li ka yel ye o ane popielim sob o tuon.”

4 Nid yaꞌa tum tuuma, o diꞌed yood. Ka ba lee ku geligi li ye li ane piinii, amaa li lee ane dine nar ye o diꞌe. 5 Niŋkane tiaꞌ o yadda niŋir ka kaꞌane o tuumsoma, ka niŋ yadda ye o na di buod Winaꞌam tuon o yadda niŋir zug, Winaꞌam na gelig niŋkan yadda niŋir ka o lieb popielim daan o tuon. 6 David me da yel ninsaal sumalisim yela ka li be Winaꞌam gbauŋin ye, Winaꞌam gelig ye o ane popielim sob, ka li kaꞌane o tuuma zugo. Ka ye,

9 Sumalisim line ka David pianꞌ li yela la, kaꞌane nimbane kpenꞌe baŋo la din maꞌanee. Li me ane nimbane pu kpenꞌe baŋo la din. Ti deŋim sob ye, “Abraham da niŋ Winaꞌam yadda, ka Winaꞌam geligi li ka yel ye o ane popielim sob o tuon.” 10 Tenꞌesimi saŋkan ka li da niŋ la yela. Li da ane Abraham daa nam pu kpenꞌe baŋo la, ka kaꞌ li nyaꞌaŋa. 11 Abraham da siak baŋo kpenꞌeb la, ka li ane zanbin, ka paꞌal ye saŋkan ka o nam pu kpenꞌe baŋo laa, Winaꞌam da gelig ka o a popielim sob o tuon, o yadda niŋir la zug. Dinzugo, Abraham ane bama yiiga, bane wusa niŋ Winaꞌam yadda ka Winaꞌam gelig ka ba a popielim dim o tuon, ka pu kpenꞌe baŋo la. 12 Abraham me a nimbama ni yiiga nimbane kpenꞌe baŋo, ka li kaꞌane kpenꞌeb la maꞌanee, ka ane ban niŋ Winaꞌam yadda wuu Abraham da niŋ siꞌem, ka da nam pu kpenꞌe baŋo laa.

13 Winaꞌam da ziꞌel noor tis Abraham ne o yaas, ye bane na ti soꞌ dunia. Ka li kaꞌane Abraham da dol wada la zug ka o da ziꞌel noor laa, ka ane on da niŋ Winaꞌam yadda ka o gelig ka o a popielim sob o tuon la zug. 14 Ka li yaꞌa aan bane dol wada la n diꞌedin Winaꞌam yelsum la, ninsaalib yadda niŋir Winaꞌam ni, ne o noor ziꞌelug la na aan zaalim. 15 Wada la ket ka Winaꞌam supeen lut na. Ka wada la yaꞌa kaeꞌ wadasaꞌuŋ me ku bee.

16 Linzug ninsaalib bane niŋ Winaꞌam yadda la diꞌed o noorziꞌelug ka li yine o popielim ni na, ye Abraham yaas wusa sid na diꞌe o noorziꞌelug la. Ka li kaꞌane o yaas bane dol wada la gullimnee, ka me ane bane niŋ Winaꞌam yadda wuu Abraham da niŋ siꞌem la. Abraham aa ti wusa yaab. 17 Li dolne Winaꞌam da yel siꞌem o gbauŋin ye, “M na ke ka fu a buudi bedego yaab.” Noorziꞌelug la sid ane siꞌel Winaꞌam tuon, on ka Abraham niŋ o yadda la, ka o ket ka kum vuꞌug, ka o noyelug ket ka line kaeꞌ na be la.

18 Abraham n da gos ka li a siꞌem la, tiꞌir da kaeꞌ ne biig nyeebo. Ka o da niŋ Winaꞌam yadda ka mor tiꞌir. Ka linzug o da a buudi bedego yaab. Li dolne Winaꞌam da yel o ye, o yaas na ti a anwa bedego. 19 Ka o da gos o meŋi kudug n a wuu yuma kobuga la, dinzug ka o da pu mor potenꞌer ne biig duꞌam yela yaꞌasa, ne Sara da a kunduꞌar men la, laꞌam ne wala, Abraham yadda niŋir Winaꞌam ni pu bukee. 20 O da pu bas o yadda niŋir ne Winaꞌam, ka me pu biꞌesid o noorziꞌelugo. O yadda niŋir ke ka o nye paŋ. Ka o tis Winaꞌam naꞌasi, 21 ka miꞌ suꞌuŋa ye Winaꞌam na nyaŋe maal siꞌel wusa o noorziꞌelug ni. 22 Ka linzug ka o yadda niŋir ke ka Winaꞌam gelig ka o a popielim sob o tuon. 23 Lin da sob siꞌem la ye Winaꞌam siak ka o a popielim sob la kaꞌane on zug gullimnee, 24 ka li me ane tinam zug men. Winaꞌam me gelig tinam ka ti a popielim dim o tuon, tinam bane niŋ Winaꞌam yadda la, one vuꞌug ti Zugsob Yesu kumin la. 25 Winaꞌam da ke ka Yesu kpi ti tuumbeꞌed zug, ka vuꞌug o kumin ye o ke ka ti a popielim dim o tuon.