1 Fu yaꞌa kati fu taaba saria ka koosi ba beꞌed, fun pun koos ne fu meŋ beꞌed bozugo fun me tum ne ala. 2 Ti miꞌ ye Winaꞌam ane yelsida sob ka na kad nimbama nwa tuumbeꞌed saria n koos. 3 M zua, fu yaꞌa yel sieba bane tum tuumbeꞌed bama ye ba niŋ beꞌed, ka fu meŋ tum ala, fu tenꞌes ye fu na nyaŋe pons Winaꞌam n kad tuumbeꞌed saria la bee? 4 Ka fu neꞌes Winaꞌam n niŋ siꞌem n naꞌasi ti suꞌuŋa ka mor sumotir bedego ne ti la bee? Ka ziꞌ ye Winaꞌam naꞌasi ti ye o ke ka ti tiak ka bas tuumbeꞌed la bee?

5 Fu mor zugkpiꞌeuŋ ka zanꞌas ye fu tiake bas tuumbeꞌed. Dinzugo fu paasi fu meŋ ne namisug line ka fu na ti nye daar kan ka Winaꞌam na kad saria ne yelsida, ka o supeen na nie paalo ni la. 6 Winaꞌam na tis soꞌ mekama nyood wuu on tum siꞌem la, 7 ka na zaŋ nyovur line kaꞌ naare n tis bane modig n tum tuumsuma, ka bood naꞌasi Winaꞌam saꞌan ne nyovur line kaꞌ naar la. 8 Ka o supeen na lu bane boodi ba meŋ, ka zanꞌas yelsida, ka siak tuumbeꞌed la zut. 9 O na zaŋ namisug ne daamug n tis ninsaalib bane wusa tum tuumbeꞌed. Jew dim la na nyee li yiiga, ka bane kaꞌ Jew dim la me tiaꞌal. 10 Ka o na zaŋ naꞌasi ne sumalisim n tis nimbane wusa tum tuumsuma. Jew dim na nyee li yiiga men, ka bane kaꞌ Jew dim la tiaꞌal. 11 Winaꞌam pu mor baragaŋ ne nidibaa.

12 Nimbane kaꞌ Jew dim la pu mor wada line ka Moses diꞌe Winaꞌam saꞌan laa. Amaa ba tuumbeꞌed la zug ka ba na kpi, laꞌam ne ban pu mor wada laa. Jew dim la mor Moses wada la, ka lee tum tuumbeꞌed. Ka Winaꞌam na kadi ba saria ne wada la. 13 Li kaꞌ bane wum wada la a popielim dim Winaꞌam tuone, ka lee ane bane niŋid wuu wada la yel siꞌem la. 14 Nimbane kaꞌ Jew dim la pu mor Moses wada laa. Ka li yaꞌa aa ba meŋ boodim ka ba niŋid wuu wada la yel siꞌem la, ba meŋ tenꞌesug ane wada ba saꞌan, laꞌam ne ban pu mor Moses wada la. 15 Ba niŋir paꞌal ye wada la yel siꞌel la be ba sunfin, ka ba potenꞌer line miꞌ suꞌum ne beꞌed la me paꞌal ye li a sida. Ka ba tenꞌesug yiti yeli ba daasiꞌer ye ba pu niŋ suꞌum, ka yiti lem yiisi ba. 16 Li na ane anwa. Daakan ka Winaꞌam na kad nidib potenꞌesuaꞌada saria, ka li yi Yesu Kiristo ni na. Ala ka labasuŋ kane ka m moon la paꞌan.

17 Ka fun kane buol fu meŋ ye Jew dim yinni la, fu yela a bo? Fun mor Moses wada la zug, ka fu tenꞌes ye Winaꞌam na diꞌe uf bee? Fu nweꞌed nyoꞌog ye fu ane Winaꞌam nid, 18 ka miꞌ Winaꞌam boodim. Ka wada la paꞌal uf fun na gaŋ line a suꞌum. 19 Ka fun mor wada line ke ka fu baŋ miꞌilim ne sida wusa la zug, ka fu tenꞌes ye fu ane ninkane na nyaŋe zamis bane ziꞌ Winaꞌam wada, ne bane be likin, 20 ka tenꞌes ye fu na zamis bane a zon la, ne bane a biis, ka paꞌane fu taaba, 21 bo ka fu pu zamisi fu meŋa? Ka moon ye nidib da zuuda, ka fu meŋ lee zuuda? 22 Fun kane yel ye ba da saꞌam poꞌab la, fu meŋ saꞌam poꞌab bee? Ya pu siak ye ba maalim baꞌare, amaa ya meŋ zuud baꞌar laꞌad. 23 Ka nweꞌed nyoꞌog ne Winaꞌam wada, ka me saꞌami li ka diis Winaꞌam nyan. 24 Li dolne lin da sob Winaꞌam gbauŋin ye, “Yanam Jew dim zug, ka bane kaꞌ Jew dim la pianꞌad beꞌed n saꞌamid Winaꞌam yuꞌur.”

25 Fu yaꞌa siak wada la, fu baŋo kpenꞌeb line paꞌal ye fu ane Winaꞌam nid yinni la mor nyood. Ka fu yaꞌa saꞌam wada la, fu baŋo kpenꞌeb la ane zaalim. 26 Ka bane kaꞌ Jew dim, ka pu kpenꞌe baŋo la, yaꞌa siak wada la noyelug, Winaꞌam na gosi ba wuu bane kpenꞌed baŋo. 27 Yanam Jew dim mor wada la gbauŋin, ka kpenꞌed baŋo, ka lee saꞌam wada la. Ka bane pu kpenꞌe baŋo ba niŋgbina ni, ka lee siak wada la, na paꞌal yanam yela ye ya tum tuumbeꞌed.

28-29 Li kaꞌane niŋkane mor Jew dim zanbin o niŋgbina ni sid a Jew nida. Li ane one dol Winaꞌam o sunfin. Ka baŋo kpenꞌeb line a sida la, kaꞌ o niŋgbina ni, ka lee be o sunfin. Ka Winaꞌam Siig Suŋ maali li. Ka li kaꞌane wada la maali lii. Ninkane sid a Jew nid la, diꞌe zunꞌor Winaꞌam ni, ka kaꞌ ninsaalibinee.