1 Ba gaŋ maalmaan kpeenm ninsaalib buudi wusa soogin ye o ziꞌeni ba noba zug, ban ne Winaꞌam soogin n tis piini ka maal maan n tis Winaꞌam ba tuumbeꞌed yela. 2 Ka o na tunꞌe zo ba nimbaanlig ne bane pu baŋi ne bane yidig la, on meŋ pu kpiꞌem ka lut tuumbeꞌedin la zug. 3 Ka li nar ye o maal maana tis Winaꞌam o meŋ tuumbeꞌed zug laꞌam ne nidib la tuumbeꞌed. 4 Ka soꞌ pu duꞌosidi n gaŋidi o meŋ ye o a maalmaan kpeenm, amaa Winaꞌam gaŋid o wuu on da gaŋ Aaron siꞌem la.

5 Ala mene Kiristo da pu duꞌosi o meŋ ye o lieb maalmaan kpeenm, amaa ka Winaꞌam da gaŋ o, ka yel o gbauŋin ye,

7 Ka Yesu n da be dunia nwa ni saŋsiꞌa la, o sos ka belim Winaꞌam one mor paŋi na tunꞌe faaenn o kum zinꞌigin, ne tansug bedego ne nintoꞌom. Ka on naꞌas Winaꞌam la zug ka o wumi o sosug la. 8 Hale baa on a o Biig la, o zamis noyelug siakiri o namisugin. 9 Ka on lieb suꞌum naae la zug ka faangir line kaꞌ naar la yiti o saꞌan na, n tisid bane wusa siakidi o noyelug la, 10 ka Winaꞌam nok o paꞌal ye o a maalmaan kpeenm one ledig Melkizedek zinꞌig.

11 Ti mor pianꞌad bedego yelkan yela, amaa li toe ne man na paꞌali ya siꞌem ka ya baŋ nyain, bozugo ya maꞌas ne zamisug. 12 Ka saŋa paaeya ka li nar ka ya a paꞌanib, ka ya nan kpelim bood ye ba lem paꞌani ya Winaꞌam yela yiiga paꞌala la, wen wuu biise bood binꞌisim ka kaꞌ diganꞌalug la. 13 Ka one mekama muꞌad binꞌisim ane biig ka nan kaꞌ yaꞌam na baŋ yelsida yela. 14 Ka bane biꞌ la dit diganꞌalug, bozugo ba zamisne n miꞌ line a suꞌum ne beꞌed.