1 Ka ti keesi ba ka kpenꞌ aaruŋ n kpaꞌa tituꞌaa keŋ paae Kos teŋin. Ka beog nie ka ti paae Rodes teŋin, ka naami anina keŋ Patara teŋin. 2 Ka anina ka ti nye aaruŋ ka li waꞌae Fonisia teŋin. Ka ti kpenꞌ keŋ. 3 Ka ti paae zinꞌisiꞌa na ka gosi nye Saipuros teŋ tuon sa ka bas teŋ la dagobug ka luak gaad Siriya soꞌolim n sig Taya teŋin, zinꞌikan ka ba ye ba sigis aaruŋ la laꞌad la. 4 Ka ti ie nye yadda niŋidib anina ka zinꞌin ne ba daba ayopoi. Ka ba yel Paul ne Siig Suŋ la paŋ ye o da keŋ Jerusalem. 5 Ka ti dabisiri daa paae la ka ti keesi ba ka waꞌae. Ka ban ne ba poꞌab ne ba biis wusa bieli ti yi teŋ la kpukpeŋ. Ka ti wusa igin teŋin ateuk noorin n puꞌus Winaꞌam ka kees taaba. 6 Ka tinam kpenꞌ aaruŋin. Ka ban me lebidi kun.

7 Ka ti yi Taya teŋin n keŋ Tolemais teŋin n puꞌus yadda niŋidib bane be anina, ka gbenn ba saꞌan daar yinni. 8 Ka beog nie ka ti yi anina keŋ Sizerea teŋin n kpenꞌ Filip yin n zinꞌini anina. O daa ane one moon Winaꞌam labaar, ka a kpeenmnam ayopoi la ni yinni, ban ka ba daa gaŋ Jerusalem ni ye ba tot diib la. 9 O daa mor poꞌayuos anaasi ka ba a yiwies ka me a Winaꞌam nodiꞌesidib.

10 Ka tiname daa be anina dabisa biꞌela la ka Winaꞌam nodiꞌes on yuꞌur buon Agabus, yi Juuda paae na 11 ka kenn ti saꞌan na n fue Paul sialoodiŋ n lo o meŋ noba ne o nuꞌus ka yel ye, awana ka Winaꞌam Siig Suŋ la yel, ye, “Sialoodiŋ kaŋa nwa daan, Jew dim na lo o awana Jerusalem teŋin n nok o niŋ bane kaꞌ Jew dim la nuꞌusin.”

12 Ka tiname wum neꞌe la ka tinam ne nimbane be anina la belim Paul ye o da keŋ Jerusalem. 13 Amaa ka o lebis ye, “Bo ka ya kaasid n saꞌamidi m sunfo? M pu tiꞌeb ye ba lo m Jerusalem ni maꞌanee, amaa m laꞌam na kpi ti Zugsob Yesu yuꞌur zug.” 14 Ka ti pu nyaŋ o ka o siaki tisi tii. Ka ti bas o ka yel ye, “Zugsob boodim niŋim.”

15 Ka ti daa be anina dabisa biꞌela ka nyaan tiꞌeb keŋ Jerusalem. 16 Ka Sizerea teŋ nyaꞌandolib sieba bieli ti more ti keŋ Mason yin, zinꞌikan ka ti na zinꞌin. Mason daa ane Saipuros nid one daa a nyaꞌandol pinꞌilugin sa.

17 Ka ti paae Jerusalem na ka yadda niŋidib diꞌe ti ne sumalisim. 18 Ka beog nie ka Paul doli ti keŋ Jemes saꞌan. Ka yadda niŋidib kpeenmnam wusa be. 19 Ka Paul puꞌusi ba ka tuꞌasi ba Winaꞌam n maal siꞌel wusa bane kaꞌ Jew dim ni o tuuma poogin.

20 Ka ban wum la ka duꞌos Winaꞌam yuꞌur suꞌuŋa ka yel Paul ye, “Ti baꞌabiiga, gosim lin a siꞌem. Jew dim tusa bedego niŋ Yesu yadda, ka mor wada kan ka Winaꞌam tis Moses la suꞌuŋa. 21 Ti wum ye fu paꞌal Jew dim wusa bane zinꞌin bane kaꞌ Jew dim teensin ye ba basim Moses wada, ka da kpenꞌes ba biis baŋo bee dol Jew dim malimaa. 22 Ba sid na wum ye fu kena. Bo ka ti na niŋe? 23 Niŋim tinam na yel uf siꞌem la. Nidib anaasi be ti saꞌan kpela n po ye ba na maal siꞌel n tis Winaꞌam. 24 Doli ba laꞌase pies fu meŋ ba maluŋ la zug, ka yoo ba sama, ka ba nyaŋe pun ba zuobid. Neꞌeŋa na ke ka soꞌ wusa baŋ ye lin ka ba pianꞌ fu yela wusa kaꞌ sidaa, ka fu dol Moses wada la. 25 Amaa bane kaꞌ Jew dim ka niŋ yadda la, tinam daa sob gbauŋ n yeli ba ye, ‘Ba da di baꞌar diib ne niꞌim kane mor ziim. Ka da onb bunkonbug kane ka ba sianki kuu. Ka dap ne poꞌab da saꞌam taabaa.’ ”

26 Ka beog nie ka Paul nok nidib la ka ba pie ba maluŋ dianꞌad ka keŋ Winaꞌam puꞌusum yin n kpenꞌ ziꞌel dabis kan ka ba na pie naae ka ba soꞌ wusa maali o maan n tis Winaꞌam.

27 Ka li kpelim biꞌela ka daba ayopoi la naae ka Jew dim bane yi Asia soꞌolim na nye Paul Winaꞌam puꞌusum yin, ka ba ke ka nidib la sunya pelig ne Paul ka gbanꞌ o, 28 ka tans ye, “Israel dima, suŋimi ti. Dau kaŋa nwa giligid teens wusa n paꞌan nidib ye ba da dol Israel dim ne Moses wada ne Winaꞌam puꞌusum yir maluŋ laa. Hale o mor bane kaꞌ Jew dim la n kpenꞌ Winaꞌam puꞌusum yin la na n miligi li.” 29 Ban daa nye Trofimus one yi Efesus na n dol Paul teŋin la zug, ka tenꞌes ye o dol o ne kpenꞌ Winaꞌam puꞌusum yin.

30 Ka teŋ la daa dam ka nidib wusa zo laꞌas taaba gbanꞌe Paul n teeg o yiis puꞌusum yin la. Ka yo zaꞌanoya toꞌoto. 31 Ka ba bood ye ba ku Paul. Ka labaar paae Room sogia kpeenm saꞌan na ye Jerusalem teŋ dim wusa dam ne. 32 Ka o due toꞌoto dol sogianam ne ba kpeenmnam ka ba zo keŋ nidibin la. Ka ban nye sogia kpeenm ne sogianam la ka bas Paul buꞌub.

33 Ka sogia kpeenm la keŋ gbanꞌe Paul ka tis sogianam noor ye ba loom o ne bana ayi. Ka buꞌos on a soꞌ ne on niŋ siꞌel. 34 Ka sieba nidibin la lebis n tansid konꞌob konꞌob ka tukpeedug zuꞌe. Ka o ku nyaŋe wum line maale, ka tis sogianam noor ye ba nokim o du n kpenꞌ ba yititaꞌarin la. 35 Ka ba mor o paae bane dut siꞌel kpenꞌed doogin la ka sogianam la ze o, nidib bugusum la zug. 36 Ka ba wusa kenna n tansid ye, “Kuumi ne o.”

37 Ka ban ye ba kpenꞌes Paul sogianam yin la, ka o yel sogia kpeenm la ye, “M mor siꞌel ye m yel.”

Ka kpeenm la buꞌos o ye, “Fu wum Greek dim pianꞌade? 38 Ala fu kaꞌ Egipiti nid one daa zigid ye o kad gomena ka daa dol niŋkuudib tusa anaasi n keŋ moogin laa?”

39 Ka Paul lebis ye, “M ane Jew nid n yi Tarsus teŋin Silisia teŋgbauŋin na. M ane teŋtitaꞌar nid. M sos uf ye fu ke ka m pianꞌ tis nidib la.”

40 Ka kpeenm la bas o noor. Ka Paul ziꞌe bane dut siꞌel kpenꞌed doogin la zug, ka uk o nuꞌug. Ka nidib la sin. Ka o pianꞌ tisi ba ne Hibiru pianꞌad ye: