1 Ka Yesu Tumtumnib ne yadda niŋidib bane be Juuda soꞌolim la wum ye nidib bane kaꞌ Jew dim buudi me diꞌe Winaꞌam pianꞌad la. 2 Ka Piita n leb Jerusalem na ka Jew dim yadda niŋidib bane bood ye yadda niŋidib wusa kpenꞌe baŋo la daa poꞌog Piita, 3 ka yel o ye, “Bo niŋ ka fu laꞌas ne nidib bane pu kpenꞌe baŋo la n dit ne ba?”

4 Amaa Piita daa pinꞌil n paꞌali ba bun line daa maal hale pinꞌilugin sa ye, 5 “M daa bene Joppa teŋin n sosid Winaꞌam ka li wenne zaansuŋ ne, ka m nye ka siꞌel sigid na n wenne pientitaꞌar ne n lo luas anaasi yi arazana ni n sigid na n paae mam be siꞌel la. 6 Ka mam gosid li la, m nye yinkonbid ne sianꞌarkonbid ne bunvuuda ne niis. 7 Ka m wum kukor ka li yel ye, ‘Piita, duom kuu li n di.’

8 “Amaa ka m yel ye, ‘Ayei, Zugsoba, bun line kis ka a dianꞌad nam pu kpenꞌ m noorine.’

9 “Ka kukor la lem pianꞌ tisi m yi arazana ni yaꞌas ye, bun lin ka Winaꞌam yel ye li a bunsuŋ la m mit ka m yel ye li kis. 10 Neꞌeŋa daa niŋ ne ala noor atanꞌ, ka ba lebis li wusa arazana ni yaꞌas.

11 “Saŋkan la ka nidib atanꞌ ban ka ba daa tum m saꞌan na la yi Sizerea teŋin n paae yir kan ka m daa be la. 12 Ka Winaꞌam Siig Suŋ la yel m ye m doli ba n keŋ ka da biꞌese. Ka yadda niŋidib ayuobu bama biel m ka ti keŋ kpenꞌ dau la yin. 13 Ka dau la yeli ti on daa nye malek la ka o ziꞌe o yin ka ye o tum Joppa teŋin n buol Simon Piita na. 14 Ka on na tuꞌas o labaar kane na tilig o ne o yidim wusa.

15 “Ka man pinꞌil ye m pianꞌ la ka Winaꞌam Siig Suŋ la sigi ba zutin na, wuu lin daa niŋ tinam siꞌem pinꞌilugin la. 16 Ka m tienn Zugsob la daa yel ye, ‘Joon daa suud nidib ne kuꞌom amaa ba na suu ya ne Winaꞌam Siig Suŋ.’ 17 Alazug Winaꞌam sadigim tisi ba piini kan ka o daa tisi ti la, tiname daa niŋ Zugsob Yesu Kiristo yadda la, mam aa anoꞌone na kiꞌis Winaꞌam?”

18 Ban wum neꞌeŋa la ka sin, ka lee duꞌosid Winaꞌam yuꞌur suꞌuŋa n yet ye, “Alazugo Winaꞌam me tis nimbane kaꞌ Jew dim buudi la suer ka ba na tiake ba sunya ka nye nyovur.”

19 Ka bane daa widig n keŋ zinꞌig wusa ban nye namisug bedego Sitivin yela nyaꞌaŋ la, ba daa keŋ hale n paae Fonisia ne Saipuros ne Antiok teensin n moon Winaꞌam labaar la n tisid Jew dim buudi gullim. 20 Amaa dap sieba bane daa yi Saipuros ne Sairene soꞌolim daa keŋ Antiok teŋin n tuꞌas ne Greek dim ka mool Zugsob Yesu labaar la n tisi ba. 21 Ka Zugsob la paŋ daa bee ba saꞌan. Ka nidib bedego niŋ Zugsob yadda ka fendigi dol o.

22 Winaꞌam nidib bane be Jerusalem la n wum labakaŋa nwa, ka tum Barnabas Antiok teŋin. 23 Ka on paae n nye Winaꞌam bareka la, li niŋ o malisim hale. Ka o saꞌali ba wusa ye ba kpelim dol Zugsob ne sida ka da basi. 24 O daa ane ninsuŋ ka Winaꞌam Siig Suŋ ne yadda niŋir bee o ni bedego. Ka nidib bedego me niŋ Zugsob la yadda.

25 Ka Barnabas babes Saul Tarsus teŋin. 26 Ka on nye o la o dol o leb Antiok na. Ka yuum mum wusa, ka ba laꞌased ne Winaꞌam nidib la n paꞌan nidib bedego. Antiok ni ka ba daa kieb n buon nyaꞌandolib la ye Kiristo nidib.

27 Saŋkan ni ka Winaꞌam nodiꞌesidib daa yi Jerusalem n keŋ Antiok. 28 Ka ba nid yinni yuꞌur buon Agabus. Ka o due n ziꞌe n tuꞌas yel kane be tuon sa yel ne Winaꞌam Siig Suŋ paŋ ye, koꞌomtitaꞌar na ti lu dunia wusa zug. Li daa niŋne naꞌab Klaudius zumaana ni. 29 Ka nyaꞌandolib la siak ye, soꞌ wusa yiisim on mor siꞌel o paŋ ben n tis, ka li suŋ yadda niŋidib bane be Juuda soꞌolim ni. 30 Ka ba daa niŋi ala, ka zaŋi li n niŋ Barnabas ne Saul nuꞌusin ye ba kem n tis yadda niŋidib kpeenmnam bane be Juuda soꞌolimin la.