1 Diꞌem ninkane yadda pood, ka da nwaꞌasid ne o, o tenꞌesug la yelaa. 2 Ninsoꞌ yadda niŋir tunꞌe ke ka o di siꞌel wusa, ka one yadda pood la kis niꞌim. 3 Ka niŋkane dit siꞌel wusa la da neꞌes niŋkane kis niꞌim laa. Ka one pu kis siꞌela da yel one kis siꞌel ye o niŋ line kaꞌa suꞌum, bozugo Winaꞌam diꞌe o. 4 Fu a anoꞌone na kadi soꞌ tumtum saria? O yaꞌa ziꞌe bee lu ne, li ane o meŋ Zugsob na yel ye o di buod bee o luya. Ka o sid na di buod ka ziꞌe kiŋ kiŋ, Zugsob la n na tunꞌe ke ka o ziꞌe kiŋ kiŋ la zug.

5 Ninsoꞌ gosid ka dabis siꞌa a suꞌum gaad dabis sieba. Ka soꞌ gosid ka dabisa wusa zem ne. Soꞌ wusa kel ka o potenꞌer a yinni. 6 On mekama gosid ka dabis siꞌa a suꞌum, niŋidi li ye o naꞌas Zugsob la. Ka on mekama pu kis siꞌela, diti li ye o naꞌas Zugsob la, on puꞌusid Winaꞌam bareka diib la yela la zug. Ka one me kis disieba diib la, niŋid ala ye o me naꞌas Zugsob la, ka me puꞌusid Winaꞌam bareka. 7 Soꞌ kaeꞌ voe o meŋ yela, bee kpiid o meŋ boodim maꞌanee. 8 Ti yaꞌa voe, ti vone ye ti tum Zugsob boodim. Ka ti yaꞌa kpi, li ane ti Zugsob boodim ka ti kpi. Aa to, ti yaꞌa voe bee ti yaꞌa kpi ne, ti ane Zugsob la nidib. 9 Kiristo da kpi ka len vuꞌug kumin la ye o a bane kpi ne bane voe la Zugsob.

10 Ka fune, bo ka fu kati fu baꞌabiig saria? Bee bo yela ka fu neꞌesidi fu baꞌabiiga? Ti wusa na ziꞌen Winaꞌam tuon ka o kadi ti saria. 11 Li sob Winaꞌam gbauŋin ye,

13 Dinzugo, keli ka ti bas, ka da kati ti baꞌabitaaba saria, ka lee gbanꞌe ka da nok siꞌel niŋ ti baꞌabiig sueren line taꞌasid o luuga. 14 Mam a yinni ne ti Zugsob Yesu la ke ka m baŋ sida ye diid kaeꞌ a dianꞌade. Amaa soꞌ yaꞌa tenꞌes ye diid be a dianꞌad, li ane dianꞌade o saꞌan. 15 Fu baꞌabiig sunf yaꞌa saꞌam fun dit disiꞌa la zug, fu pu len tum noŋilim tuuma. Da ke ka diib kane ka fu di la saꞌam fu baꞌabiig one ka Kiristo kpi o zug laa. 16 Ka da ke ka line ka fu gos ka li a suꞌum la lieb beꞌed nidib pianꞌadinee. 17 Diib bee nuub kaꞌ dine pak Winaꞌam soꞌolim nii, ka lee ane popielim ne sumalisim kan ka Winaꞌam Siig Suŋ tisid la. 18 Ka on mekama dol Kiristo anwa na malisne Winaꞌam ka nye naꞌasi nidibin.

19 Dinzugo ti moomi ka yiti niŋ dine na mor sumalisim ka na suŋi ti baꞌabitaaba. 20 Da saꞌam line ka Winaꞌam niŋ la diib zugo. Diib wusa nare ba di. Amaa li kaꞌa suꞌum ka fu di siꞌel line na ke ka fu taaba lu tuumbeꞌedinee. 21 Lini a suꞌum ye fu niŋ ane ye fu da di nimme bee nu daam bee niŋ siꞌel line na ke ka fu baꞌabiig luu.

22 Mori fun tenꞌes neꞌe yela siꞌem fu ni ne Winaꞌam saꞌan maꞌaa. Niŋkane niŋ siꞌel line ka o gos ka li a suꞌum, ka pu tenꞌes ye o mor gbaꞌar li zug la mor sumalisim. 23 One biꞌesid siꞌel yela ka dii li la, tum taal. Bozugo o pu di li ne yadda. Ka lin wusa pu dol ne yadda ane tuumbeꞌed.