1 Dinzugo, ti na yel ye bo? Ti na yel ye, ti na kpelim tum tuumbeꞌed ye Winaꞌam popielim piini la nobug bee? 2 Ayei, baa biꞌelaa. Li wenne ti daa kpi ne, ka linzug tuumbeꞌed pu len soꞌe tii. Dinzugo ti ku kpelim niŋ wuu tuumbeꞌed nan soꞌe tii. 3 Ya sid miꞌ ye tinam bane diꞌe Winaꞌam kuꞌom suub ka lieb yinni ne Yesu Kiristo la, me lieb yinni ne o kuꞌum la. 4 Kiristo da kpiya ka ba mum o, ka Winaꞌam vuꞌug o kumin ne o paŋ. Ka ala men, ti daa diꞌe kuꞌom suub, ka li wenne ti daa kpi ka ba mumi ti ne o, ye ti vuꞌug n diꞌe vumpaal ka kpelim bee li ni.

5 Li yaꞌa a sida ye ti daa lieb yinni ne Kiristo n kpi wuu on niŋ siꞌem, ala men ti sid na a yinni ne o, n vuꞌug kumin wuu on me niŋ siꞌem la. 6 Ti miꞌ ye tinam meŋ daa a beꞌed siꞌem la, ti daa kpi ne o dapuudir zug, ye ti tuumbeꞌed yaꞌamleog paŋ saꞌam, ka tuumbeꞌed ku len soꞌe ti wuu ti aa li yamugo. 7 Nid yaꞌa kpi, o nye yolisim ne tuumbeꞌed paŋ.

8 Ka tiname sadigim kpi ne Kiristo la, ti siak ye ti me na voe ne o. 9 Ti miꞌ ye Winaꞌam sadigim vuꞌug Kiristo kumin la, o kudum ku len kpii. Kum len kaꞌ paŋ o saꞌane. 10 O da kpi vuguri ti tuumbeꞌed zug ka li ku len daam oo. Ka o nan voe, ka voe ye o naꞌas Winaꞌam. 11 Ka ala men, ya meŋ tenꞌesimi ye yaname a yinni ne Yesu Kiristo la zug, ya meŋ kpi ka tuumbeꞌed ku len soꞌe yaa, ka ya me voe ye ya naꞌas Winaꞌam.

12 Da ke ka tuumbeꞌed len soꞌe ya niŋgbina ye ya siak yaꞌamleog beꞌed bane ka ya niŋgbina bood la. 13 Da pesigi ya niŋgbina luas wusa n tis tuumbeꞌed ye tuumbeꞌed more ba n tum beꞌede, ka lee pesigi ya meŋ n tis Winaꞌam; ka ya ane nimbane ka o more ya yi kumin n keŋ vumin. Pesigimi ya niŋgbina luas wusa n tis Winaꞌam ye o more ba n tum popiel tuuma. 14 Wada la pu soꞌe yaa, ka Winaꞌam popielim lee soꞌe ya. Linzug tuumbeꞌed pu soꞌe yaa.

15 Aa to. Wada la pu soꞌe tii, ka Winaꞌam popielim lee soꞌe ti. Linzug ti na kpelim tum tuumbeꞌed bee? Ayei, baa biꞌelaa. 16 Ya yaꞌa pesigi ya meŋ ka a soꞌ yamis ka siak o noor, ya sid ane one ka ya siak la yamis. Ya yaꞌa siaki tum tuumbeꞌed, ya ane tuumbeꞌed yamis, ka lin dol kuꞌum. Ka ya yaꞌa siak Winaꞌam noor, ya ane o yamis, ka lin me ke ka ya a popielim dim Winaꞌam tuon. 17 Ka ti puꞌus Winaꞌam bareka yanam yuꞌun siak paꞌalug kane ka ya diꞌe la ne ya sunya, hale laꞌam ne yaname daa a tuumbeꞌed yamis la. 18 Winaꞌam daa ke ka ya soꞌe ya meŋ tuumbeꞌed saꞌan, ka me ke ka ya a popielim yamis.

19 Ya ninsaalib yaꞌam kaꞌ paŋ la zug, m pianꞌad wuu ninsaalib yiti pianꞌad ba yela siꞌem la. Ya daa yiti pesigi ya meŋ n tis tuumyood ne tuumbeꞌed ka li nobugid bedego. Ala men, nannanna pesigimi ya meŋ me tis popielim, ye ya niŋ line a suꞌum nyain. 20 Yanam daa a tuumbeꞌed yamis la, ya daa soꞌe ya meŋ popielim saꞌan. 21 Ka tuumbane ka ya daa tum ka li mor nyan ya saꞌan nannanna la, daa tisi ya bo nyoode? Tuumban la dolne kuꞌum. 22 Ka nannanna Winaꞌam ke ka ya soꞌe ya meŋ tuumbeꞌed saꞌan, ka lieb o yamis. Ka li nyood ane ye ya aa o nidib gullim. Ka lin dol nyovur dine kaꞌ naare. 23 Tuumbeꞌed yood ane kuꞌum. Ka Winaꞌam piini ane nyovur dine kaꞌ naare. Ka ti diꞌe li tinam a yinni ne ti Zugsob Kiristo Yesu la.