1 Ka soꞌ daa tisi m makir dibir, ka yeli m ye, “Duom mak Winaꞌam puꞌusum yir la ne maan maalug zinꞌig la, ka kaal bane puꞌusid Winaꞌam puꞌusum yin la. 2 Amaa da mak puꞌusug yir saman laa, bozugo ba zaŋi li tis bane kaꞌ Winaꞌam nidib ka ba na noodi giligid Jerusalem Teŋsuŋ la n saꞌamidi li, nwadis piisnaasi ne ayi. 3 Ka m na tumi m nidiba ayi bane na sid pianꞌad m yela la, ka ye boto fuud, ka tisi ba paŋ ka ba diꞌes Winaꞌam pianꞌad n tis nidib dabisa kobus piiga ne ayi ne piisyuobu.”

4 Nidib ayi bama ane Olive tiis ayi ne fitla ayi bane ziꞌe dunia Zugsob la tuon la. 5 Ka soꞌ yaꞌa zig ye o poaꞌalimi ba, bugum yitne ba noya ni na saꞌami ba dataas la. Ka ala ka ba kuud one zig ye o poaꞌalimi ba. 6 Ka ba mor paŋ na gbanꞌe saa, ka saa ku ni saŋa kam ka ba tumi ba nodiꞌesug tuuma, ka lem mor paŋ na ke ka kuꞌom kilim ziim, ka me mor paŋ na zaŋ yeltood buudi wusa poaꞌalim dunia dim saŋa kan ka ba bood.

7 Ba yaꞌa ti naae labaar la moolug, bunyua one yi bumbok dine kaꞌ ben ni na la na zab ne ba ka nyaŋe kuu ba. 8 Ka ba niŋgbina na dig teŋtitaꞌar kan ka ba da kpaꞌa ba Zugsob dapuudir zug la sueren. Yuda line paꞌal teŋ la a siꞌem ane Sodom ne Egipiti. 9 Ka nidib bane yi buudi ne pianꞌad ne teŋgbana wusa ni na, na gosi ba niŋgbina daba atanꞌ ne pusuk, ka ku ke ka ba mumi baa. 10 Ka dunia nidib sunya na maꞌae nidib ayi nwa kuꞌum la yela. Ka ba na maal sumalisim ka tis taaba piini, bozugo nodiꞌesidib ayi nwa la ke ka nidib namisid dunia ni.

11 Ka daba atanꞌ ne pusuk la nyaꞌaŋ, vuꞌusum line tisid nyovur la daa yi Winaꞌam saꞌan kena kpenꞌe ba ni ka ba vuꞌug. Ka dabiem bedego kpenꞌ bane nyee li la. 12 Ka nidib ayi la wum ka kukotitaꞌar yi arazana ni na yeli ba ye, “Dumi kpenꞌ na.” Ka ba dataas la gosidi ba ka ba kpenꞌed saŋgbauŋin dut arazana ni.

13 Ka saŋa kan yim, ka teŋ daa dam hale. Ka Jerusalem teŋ la pudug zinꞌis piiga la, yinni daa lu n saꞌam. Ka nidib tusa ayopoi daa kpi teŋ la daa dam la yela. Ka dabiem kpenꞌ nimbane kpelim la, ka ba naꞌas Winaꞌam one be arazana ni.

14 Susaꞌaŋ dine peꞌes ayi la gaadeya. Amaa gosimi, susaꞌaŋ dine peꞌesid atanꞌ na kenn nannanna na.

15 Malek one peꞌes ayopoi la pieb o naꞌatan la, ka kukotitaꞌar vuud arazana ni n yet ye, “Dunia soꞌolim kilim ti Zugsob ne o Kiristo la din, ka o a naꞌab saŋa dine kaꞌ ben la.” 16 Ka kpeenmnam piisi ne anaasi bane zinꞌi ba naꞌam gbana zut Winaꞌam tuon la, vabin teŋin n zunꞌod Winaꞌam yet ye,

19 Ka Winaꞌam puꞌusug yir dine be arazana ni la yoꞌog ka ba nye daka dine paꞌal nonaar dine ka Winaꞌam ziꞌel o nidib la. Ka sayanꞌasug ne vuud ne satansug ne teŋdamug ne sakuga bedego daa naam.