1 “Dinzugo saŋkan la Winaꞌam soꞌolim na a wuu poꞌasada piiga bane zaŋ ba fitlanam n keŋ ye ba tuꞌos poꞌadit la. 2 Ka anu mor yaꞌam. Ka anu kaꞌa yaꞌam. 3 Ka bane kaꞌa yaꞌam la, mor ba fitlanam, ka pu mor kpaam. 4 Amaa bane mor yaꞌam la, mor kpaam ne ba laas. 5 Ka poꞌadit la yuug la zug ka ba wusa zoonsim gbis.

6 “Ka yuꞌuŋ tisoos, ka kuŋ kaas ye, poꞌadit la kenna, duom n yi n tuꞌos o.

7 “Ka poꞌasada la wusa due n maali ba fitlanam lauŋ. 8 Ka bane kaꞌa yaꞌam la, yel bane mor yaꞌam la ye, ‘Buꞌomi ya kpaam la n tisi ti; ka ti fitlanam kpigidne.’

9 “Ka bane mor yaꞌam la lebis ye, ‘Ayei, ti yaꞌa niŋ ala, kpaam la ku siak tinam ne yanam wusa. Kemi bane kuosid kpaam saꞌan n daꞌe na.’

10 “Ka ban ken ye ba daꞌ la, ka poꞌadit la paae na, ka bane tiꞌebi naae la, dol o kpenꞌ diꞌema la zinꞌigin. Ka ba yoꞌ zaꞌanoor la.

11 “Ka bane kpelim la, paae na n buon n yet ye, ‘Zugsoba, zugsoba, yoꞌogum n tisi ti.’

12 “Ka o lebis ye, ‘Li ane ameŋa ka m yeti ya ye, m ziꞌ yaa.’ ”

13 Ka Yesu ye, “Dinzugo yanam me guꞌusimi, bozugo ya ziꞌ daakan ka Ninsaal Biig la na kenaa.

14 “Yelkaŋa yaꞌas na wenne dau soꞌ one daa tiꞌebid ye o nwie. Ka buol o tumtumnib n zaŋ o arazaꞌas niŋi ba nuꞌusin, 15 ka tis yinni ligidi yon anu, ka tis yinni yon ayi, ka tis yinni yolug yinni. O tisne soꞌ wusa on na tunꞌe siꞌem ben, ka nwie. 16 Ka one diꞌe yon anu la pu yuuge, ka due nok o ligidi la n tolum n nye yon anu nyood. 17 Ala men ka one diꞌe yon ayi la, nye yon ayi nyood. 18 Amaa ka one diꞌe yolug yinni la keŋ n tu bok n pinꞌ o zugsob ligidi la.

19 “Ka li yuug hale, ka ba zugsob leb kul na ye o gelig ban tum siꞌem. 20 Ka one diꞌe yon anu la, kena ne yon anu n paas n yel ye, ‘M zugsoba, fu daa tisi m yon anu. Gosima, m nye yon anu n paas.’

21 “Ka o zugsob yel o ye, ‘Li a suꞌum. Fu ane tumtumsuŋ one tum ne sida. M tis uf bun biꞌela, ka fu tum sida ne li. Dinzugo m na ke ka fu soꞌe bunam bedego. Zinꞌinim n maal sumalisim ne fu zugsob.’

22 “Ka one diꞌe yon ayi me kena n yel ye, ‘M zugsoba, fu daa tisi m yon ayi. Gosima, m nye yon ayi n paas.’

23 “Ka o zugsob yel o ye, ‘Li a suꞌum. Fu ane tumtumsuŋ one tum ne sida. M tis uf bun biꞌela ka fu tum sida ne li. Dinzugo m na ke ka fu soꞌe bunam bedego. Zinꞌinim n maal sumalisim ne fu zugsob.’

24 “Ka one diꞌe yolug yinni la, kena n yel ye, ‘M zugsoba, m miꞌ fu ane sukpiꞌeuŋ daan. Ka fu bunne zinꞌig kan ka fu pu bude, ka kuꞌon zinꞌig kan ka fu pu yadige. 25 Din ka m zo dabiem, ka keŋ pinꞌ fu ligidi la teŋin. Diꞌemi fu bun.’

26 “Ka o zugsob lebis ye, ‘Tumtumbeꞌed nwa. Fu ane gbanyaꞌa. Fu miꞌ ye m bun zinꞌig kan ka m pu bude, ka kuꞌon zinꞌig kan ka m pu yadige. 27 Li suꞌum ka fu daa naan zaŋin m ligidi n digil banki ni. Ka m yaꞌa kena la, man naan diꞌen m ligidi la ne nyood. 28 Diꞌem o ligidi la n tis one mor yon piiga la. 29 Bozugo ban wusa mor la, ba na nye paas, ka ba morem zuꞌe. Amaa one pu mor la, ba na diꞌe on mor siꞌel wusa la.’ 30 Ka o zugsob yel ye, ba yiisimi dau beꞌed kaŋa n bas likin. Anina ka ba na ti kaasid ka gaꞌadi ba nyina.

31 “Saŋkan ka man, Ninsaal Biig la, na ti kena ne m naꞌam titaꞌar ne m maleknam wusa la m na zinꞌi m naꞌam gbauŋ venliŋ la zugin. 32 Ka dunia soꞌolim wusa na laꞌas m tuon, ka m na baki ba ben ben wenne konbkem bakid o peꞌes ne o boos ben ben siꞌem la, 33 ka ziꞌel peꞌis m datiuŋ ka ziꞌel boos m dagobug.

34 “Ka naꞌab la na yel bane be o datiuŋ la ye, ‘Kemi na yanam bane mor m Baꞌ Winaꞌam yelsum la. Ya na diꞌe soꞌolim kan ka Winaꞌam pun tiꞌeb ye o tisi ya, hale ka dunia nam pu pinꞌil la. 35 Bozugo m koꞌom daa zabid, ka ya tisi m diib. Kuꞌonuud daa more m, ka ya tisi m kuꞌom ka m nu. M daa ane saan, ka ya diꞌe m. 36 M daa ane biel, ka ya tisi m fuud, ka daa benꞌed, ka ya kaae m, ka daa be sarega ni, ka ya kenn m saꞌan na.’

37 “Ka bane a tuumsuma dim la na lebis ye, ‘Zugsoba, saŋkan ka ti nye uf, ka fu koꞌom zabid, ka ti tis uf diibo? bee kuꞌonuud mor uf, ka ti tis uf kuꞌom? 38 Bee saŋkan ka ti nye uf ka fu ane saan, ka ti diꞌe fo? Bee saŋkan ka fu a biel, ka ti tis uf fuude? 39 Bee saŋkan ka ti nye uf, ka fu benꞌed, bee fu be sarega ni, ka ti kaae uf?’

40 “Ka naꞌab na lebisi ba ye, ‘Li ane ameŋa ka m yeti ya ye, yanam daa niŋ ala n tis m baꞌabiig one kpelim kpaar la, li ane mane la ka ya niŋ tis.’

41 “Ka o na yel bane be o dagobug la ye, ‘Kemi sa, yanam bane ka Winaꞌam po noor n tisi ya la. Kemi kpenꞌ bugum kane pu kpiigida la, bugum line ka Winaꞌam tiꞌeb ye o kpenꞌes Sutaana ne o nyaꞌandolib la. 42 Bozugo m koꞌom daa zabid, ka ya pu tisi m diibo. Kuꞌonuud daa mor m, ka ya pu tisi m kuꞌom ye m nu. 43 M daa ane saan, ka ya pu diꞌe ma. M daa ane biel, ka ya pu tisi m fuude. M daa benꞌed bee m daa be sarega ni, ka ya pu kaae ma.’

44 “Ka ba na lebis o ye, ‘Ti Zugsoba, saŋkan ka ti nye uf, ka fu koꞌom zabid, bee kuꞌonuud mor uf, bee fu a saan, bee fu a biel, bee fu benꞌed, bee fu be sarega ni, ka ti pu suŋi fu?’

45 “Ka o na lebisi ba ye, ‘Ameŋa ka m yeti ya ye, yanam daa pu niŋ ala n tis m baꞌabiig one kpelim kpaar la, li ane mane la ka ya pu niŋ tise.’

46 “Ka ba na keŋ kpenꞌ namisug line kaꞌ ben la ni. Amaa tuumsuma dim la na diꞌe nyovur line kaꞌ naare.”