1 Ka Alasidaar ka Meeri Magdalene isigi keŋ yaugin la, ka li nam pu nie naae, ka o nye ka kugir line ligil yaug la bilig. 2 Ka o zo keŋ Simon Piita ne o nyaꞌandol siꞌa saꞌan, on ka Yesu noŋ la, ka yeli ba ye, “Ba zaŋ Zugsob la yaugin la yi ka ti ziꞌ ban niŋ o siꞌela.”

3 Ka ba zo keŋ yaugin, 4 ka nyaꞌandol oŋa la zo gaad Piita n paae yaugin la yiiga, 5 ka kuni gos ka nye fuud la, ka lee pu kpenꞌe. 6 Ka Simon Piita paae n kpelim kpenꞌ, ka nye fuud la digi, 7 ne pien line ka ba da viligi o zug la. Li pu be ne fuud la, amaa li meŋi daꞌe keŋ n dig zinꞌisiꞌa. 8 Ka nyaꞌandol one paae yiiga la, me kpenꞌ yaugin la n nye li ka siak. 9 Lini sob Winaꞌam gbauŋin ye, asee ka o vuꞌug kumin la, ba da nam ziꞌ li gbin ne.

10 Ka nyaꞌandolib la lebi kul ba yaan.

11 Ka Meeri ziꞌe yaug la yiiŋ n kum, ka sunne gos yaug la poogin, 12 ka nye maleknam ayi ka ba ye fupiela n zinꞌi zinꞌikan ka Yesu daa be la. Ka yinni be zug baba ka yinni me be noba baba.

13 Ka ba buꞌos o ye, “Poꞌaa, bo ka fu kaasida?”

Ka o lebisi ba ye, “Ba noki m Zugsob la ka m ziꞌ ban niŋ o siꞌel la.” 14 On pianꞌ neꞌeŋa la ka giꞌe nye Yesu ka o ziꞌe ka o lee pu baŋ ye li ane one.

15 Ka Yesu buꞌos o ye, “Poꞌaa, bo ka fu kaasida? Ka anoꞌon ka fu ieda?”

Ka o tenꞌes ye o ane one gur lombonꞌog la ka yel o ye, “M diema, li yaꞌa ane fune zaŋi o niŋgbiŋ la, fun yeli m fun niŋ li siꞌel, ka m keŋ noki li.”

16 Ka Yesu buol o ye, “Meeri.”

Ka o giꞌe gos o ka pianꞌ o ne Jew dim pianꞌad ye, “Rabboni.” Li gbin ane ye, Paꞌana.

17 Yesu yeli o ye, “Da siꞌisi ma; ka m nan pu du m Baꞌ la saꞌane. Amaa kemi m baꞌabiis la saꞌan n yeli ba ye, m dutne one a m Baꞌ ne ya Baꞌ ni ka a m Winaꞌam ne ya Winaꞌam la ni.”

18 Linzug ka Meeri Magdalene keŋ yel Yesu nyaꞌandolib la ye, “M nye Zugsob la.” Ka o yel ba lin wusa ka Yesu yel o la.

19 Ka daakan yuꞌuŋ sisobir, line a Alasidaar, ka Yesu nyaꞌandolib la laꞌas taaba doogin, ka kpar zaꞌanoya, bozugo ba da zotne Jew dim la dabiem. Ka Yesu kena ziꞌe ba sisoogin, ka yeli ba ye, “Sumalisim na be ne ya.” 20 Ka on daa yeli ba wala la, ka paꞌali ba o nuꞌus ne o lugir. Ka nyaꞌandolib la mor sumalisim ban nye Zugsob la zug.

21 Ka Yesu yeli ba yaꞌas ye, “Sumalisim na be ne ya. Wenne m Baꞌ tum man na la, ala men ka man me tumi ya.” 22 Ka on yeli ala naae la, ka o vuꞌusi niŋi ba ni, ka yeli ba ye, “Diꞌem Winaꞌam Siig Suŋ. 23 Niŋkan wusa ka ya niŋ suguru ne o ka yiis o tuumbeꞌed n bas la, Winaꞌam me na yiisi li bas. Ka niŋkan wusa ka ya pu niŋ o suguru ka yiis o tuumbeꞌed base, Winaꞌam me ku yiis o tuumbeꞌed n basi.”

24 Ka Tomas one ka ba buon Liibir ka a Yesu nyaꞌandolib pii ne yi la nid yinni la daa kaꞌ ba saꞌane Yesu n daa kena laa. 25 Ka nyaꞌandolib la sieba yel o ye, “Ti nye Zugsob la.”

Ka o yeli ba ye, “M yaꞌa pu nye bane kpaꞌ o nuꞌug la isa, ka siꞌisi li ne m nuꞌubil, ka siꞌisi o lugire, mam ku siake.”

26 Ka daba anii lem paae, ka nyaꞌandolib la laꞌas doogin yaꞌas, ka Tomas be ne ba. Ka laꞌam ne ban kpar zaꞌanoya la Yesu kena ziꞌen ba soogin, ka yeli ba ye, “Sumalisim be ne ya.” 27 Ka o yel Tomas ye, “Zaŋimi fu nuꞌubil n siꞌis m nuꞌus, ka zaŋ fu nuꞌug n siꞌis m lugir. Da biꞌesida amaa niŋim yadda.”

28 Ka Tomas lebis n yel o ye, “Fu ane m Zugsob ne m Winaꞌam.”

29 Ka Yesu buꞌos o ye, “Fu niŋ yadda fun nye man la zugoo? Yelsum be ne bane pu nyee, amaa ka lee niŋ yadda.”

30 Yesu da tum tuumnyalima sieba bedego ka o nyaꞌandolib la be ani. Ka tuumnyalima ban pu sob gbauŋ kaŋa nii. 31 Ka m sob neꞌenam ye ya siak ye Yesu a Kiristo la, one a Winaꞌam Biig la, ka ya yaꞌa niŋ o yadda, ya na nye nyovur o yuꞌur zug.