1 Ka Yesu n pianꞌ pianꞌabama naae la, o yi ne o nyaꞌandolib la n keŋ loꞌoŋ Kidron bonꞌog n paae lombonꞌog siaꞌa ni n kpenꞌ.

2 Ka Judas one zam o la miꞌ zinꞌig la, bozugo Yesu ne o nyaꞌandolib la yiti laꞌased anina. 3 Ka maalmaan kpeenmnam ne Farisee dim tis Judas ba tumtumnib ka sos Room dim sogianam n paꞌas o zug, ka ba keŋ anina ne fitlanam ne mood bugum ne zaba laꞌad.

4 Ka Yesu n miꞌ lin wusa na niŋ o la, o yi tuon na ka buꞌosi ba ye, “Anoꞌon ka ya ieda?”

5 Ka ba lebis o ye, “Ti iedne Yesu one yi Nazaret na la.”

Ka Yesu ye, “Mane nwa.” Judas one zam o la, laꞌam ziꞌe ne ba. 6 Ka Yesu n yel ye, “Mane nwa” la, ka ba leb nyaꞌaŋi n lu teŋin.

7 Ka Yesu lem buꞌosi ba ye, “Anoꞌon ka ya ieda?”

Ka ba lebis ye, “Ti iedne Yesu one yi Nazaret teŋin la na.”

8 Ka Yesu lebisi ba ye, “M yeli ya ye mane la. Dinzugo ya yaꞌa iedne mane, lee keli ka nimbama keŋ.” 9 Neꞌeŋa ke ka pianꞌakan ka o pianꞌ la niŋi ameŋa ye, “Nimbane ka fun Winaꞌam tisi m la, m pu ke ka soꞌ bodige.”

10 Ka Simon Piita fue suꞌug n kia maalmaan kpeenm tumtum ka o yuꞌur buon Malkus la tobiri fiꞌig.

11 Ka Yesu yel Piita ye, “Lebisimi fu suꞌug la li teongun. Nwam kane a namisug ka m Baꞌ tisi m la, m da diꞌe lii?”

12 Ka sogianam ne ba kpeenm la ne Jew dim tumtumnib gbanꞌe Yesu n lo o, 13 ka mor o keŋ Annas saꞌan yiiga, one a Kaifas diem dau la. Kaifas n da a maalmaan kpeenm yuum kan la. 14 Li ane Kaifas one da saꞌal Jew dim ye, li ane ba suꞌum ye nid yinni n kpi nidib wusa zug.

15 Simon Piita ne nyaꞌandol yinni daa be nyaꞌaŋ n dol Yesu. Ka maalmaan kpeenm la n miꞌ nyaꞌandol yinni la zug ka nyaꞌandol la laꞌam dol Yesu n kpenꞌ maalmaan kpeenm la zakin. 16 Ka Piita on ziꞌe zaꞌanoor la yiiŋ, ka nyaꞌandol oŋa la, one ka maalmaan kpeenm la miꞌ la, yi yel poꞌa kane gur zaꞌanoor la ka dol Piita kpenꞌ.

17 Ka poꞌa kane gur zaꞌanoor la buꞌos Piita ye, “Kaꞌa fune a dau kaŋa nyaꞌandolib la yinni laa?”

Ka o lebis ye, “Ayei, li kaꞌa mane.”

18 Ka waad be ka tumtumnib la ne yamis nyuꞌe bugum ka ba ziꞌe giligi li uosid. Ka Piita me keŋ laꞌase ba me uosid.

19 Ka maalmaan kpeenm buꞌos Yesu o nyaꞌandolib la ne o paꞌalug la yela.

20 Ka Yesu lebis o ye, “M pianꞌ ne paalo n neeli tis nidib la. Saŋa mekama m paꞌan laꞌasug doodin ne Winaꞌam puꞌusum yin ka Jew dim wusa laꞌased la. M pu suaꞌ pianꞌ siꞌela. 21 Bo ka fu buꞌosi ma? Buꞌosim ne bane wumi m pianꞌad la. Bane miꞌ mam yel siꞌel.”

22 Ka on pianꞌ neꞌe la ka tumtumnib la yinni ziꞌe kpiꞌe o ka nweꞌ Yesu ne tampiank ka yet ye, “Li ane ala ka fu lebisid maalmaan kpeenm?”

23 Ka Yesu lebis o ye, “Ka m yaꞌa pianꞌane beꞌed, fun dimi li kaset, ka m yaꞌa pianꞌane line dol suer, wala ka fu nweꞌedi ma?” 24 Ka Annas ke ka o loob la kpelim aa ala ka ba mor o keŋ maalmaan kpeenm Kaifas saꞌan.

25 Ka Simon Piita nam kpelim ziꞌe uosid bugum la, ka ba buꞌos o ye, “Fu me kaꞌane o nyaꞌandolib la yinnii?”

Ka o kiꞌis ka yel ye, “Li kaꞌ mane.”

26 Ka maalmaan tumtum yinni one a duꞌad ne one ka Piita paꞌa fiꞌigi o tobir la buꞌos Piita yaꞌas ye, “Li kaꞌane fun ka m nye uf ne o lombonꞌogin laa?” 27 Ka Piita lem kiꞌis yaꞌas. Ka noraug kpelim kaas.

28 Ka bekeeung ka ba mor Yesu n yi Kaifas yin n keŋ gomena one ziꞌe Room naꞌab noba zug la yin. Ka Jew dim bane mor o na la pu kpenꞌ gomena la yin ne, bozugo ba pu bood ye ba saꞌam ba maluŋ laa. Ban bood ye ba saa di kuꞌum malek gaadug tienr maluŋ diib la. 29 Ka Pilate yi ba saꞌan na yel ye, “Tuumbeꞌed bo ka dau nwa tum ka ya mor o na?”

30 Ka ba lebis o ye, “O yaꞌa kaꞌane tuumbeꞌed soba, ti naan ku gbanꞌin o naa.”

31 Ka Pilate yeli ba ye, “Doli ne o keŋi n kadi o saria ne ya wada suere a siꞌem.”

Ka Jew dim la yel o ye, “Li pu dol suer ye ti ku soꞌo.” 32 Neꞌeŋa da niŋ ne ye pianꞌakan ka Yesu da pianꞌa n paꞌal kum kan buudi ka o na kpi la, niŋi ameŋa.

33 Ka Pilate kpenꞌ zakin la yaꞌas ka buꞌos Yesu ye, “Fune a Jew dim naꞌab laa?”

34 Ka Yesu lebis o ye, “Buꞌoskaŋa yi ne fu meŋ saꞌan na bee sieba yel uf m yela?”

35 Ka Pilate lebis buꞌos o ye, “M ane Jew nida? Fu meŋ buudi ne ba maalmaan kpeenmnam gbanꞌe uf tisi m. Bo ka fu maale?”

36 Ka Yesu lebis o ye, “M naꞌam kaꞌ dunia nwa dine. Li yaꞌa aane ala m tumtumnib naani zabin ne Jew dim la ka ba ku gbanꞌini ma.”

37 Ka Pilate buꞌos o ye, “Alaa fu ane naꞌaba?”

Yesu lebis ye, “Fune yel ye, m ane naꞌab. Neꞌeŋa zug ka m kenn dunia nwa ni ka ba duꞌa m ye m paꞌal yelsida la. On mekama a yelsida sob wumi m kukor.”

38 Ka Pilate buꞌos o ye, “Yelsida a bo?”

Ka Pilate yel ala nyaꞌaŋ la, o lem yi keŋ Jew dim la saꞌan n yeli ba ye, “M pu nye dau nwa taale. 39 Ka ya mor maluŋ ka yuum yuum kuꞌum malek gaadug tienr la saŋa ka m yiisid sarega nid yinni tisidi ya. Ya bood ye m yiis Jew dim naꞌab laa?”

40 Ka ba tansid ne kukortitaꞌar ye, “Kaꞌa one. Ti boodne Barabbas.” Barabbas da ane naꞌayiig kane faand.