1 Ka Yesu yeli ba ye, “Da ke ka siꞌel daam ya sunyaa. Niŋim Winaꞌam yadda, ka niŋ man yadda men. 2 M Baꞌ yir mor dood bedego. Yaꞌa kaꞌane alaa, m naan ku yeline ya ye, m kene ye m maal zinꞌig ya zugo. 3 Ka m yaꞌa keŋ n maal zinꞌig la naae, m na lem kena n diꞌe ya lebi m saꞌan, ka ya na be zinꞌikan ka m be la. 4 Ka man ken zinꞌisiꞌa la ya miꞌ ani, ka lem miꞌ li suer men.”

5 Ka Tomas yel o ye, “M Zugsoba, ti ziꞌ fun ken zinꞌisiꞌa la. Ti na niŋ wala n baŋi li suere?”

6 Ka Yesu lebis o ye, “Mane a suer ne yelmeŋir ne nyovur. Soꞌ kaeꞌ na nyaŋ n keŋ m Baꞌ Winaꞌam saꞌane, asee o paae man. 7 Ya yaꞌa baŋin man ya naani baŋin m Baꞌ Winaꞌam men. Ka lin pinꞌil nannanna n zaŋ ken sa, ya baŋ o ka nyet o.”

8 Ka Filip yel o ye, “M Zugsoba, paꞌalimi ti fu Baꞌ, ka tinam bood siꞌeli la.”

9 Ka Yesu lebis o ye, “Filip, man be ne ya ka li yuug, ka fun nan kpelim ziꞌ maa? Bozugo on wusa nyet man la, nyet m Baꞌ men. Ka bo zug ka fu lem yet ye, paꞌalimi ti fu Baꞌ la? 10 Fu pu siak ye m a yinni ne m Baꞌ la, ka m Baꞌ la a yinni ne manne? Pianꞌaban ka m pianꞌad tisi ya la kaꞌ m meŋ pianꞌade, amaa m Baꞌ kane be m ni la, one tumi o tuuma. 11 Niŋimi m yadda ye m a yinni ne m Baꞌ la, ka m Baꞌ la me a yinni ne man. Ka li yaꞌa kaꞌ alaa, niŋim man yadda m tuuma la zug. 12 Yelmeŋir ka m yeti ya ye, one niŋ man yadda la na tum tuumbane ka man tum la. Hale o na tum tuumtitada ka ba gaad ala, bozugo m kenne m Baꞌ saꞌan. 13 Lin wusa ka ya sos man yuꞌurin la, m na maali li, ye m Baꞌ yuꞌur na nye zunꞌor o Biig la zug. 14 Ya yaꞌa sos siꞌel ne man yuꞌur, m na maali li.”

15 “Ya yaꞌa noŋ man, ya na siak m noyelug la. 16 Ka m na sos m Baꞌ, ka o na tisi ya Suŋid soꞌ. Ka o na be ne ya saŋa wusa. 17 One a yelmeŋir Siig la. Ka dunia dim ku nyaŋ diꞌe o, bozugo ba pu nyet o, ka me pu baŋ oo. Yanam miꞌ o, bozugo o kpelim ya saꞌan, ka na be ya ni.

18 “M ku basi ya wuu kpiibise. M na leb ya saꞌan na. 19 Li kpelim biꞌela ka dunia nidib ku lem nyee m yaꞌase, amaa yanam na nyeti m. Man voe la zug, yanam me na mor nyovur. 20 Daakan la ka ya na baŋ ye m a yinni ne m Baꞌ la, ka yanam me a yinni ne m, ka m a yinni ne ya.

21 “One diꞌe man noor ziꞌelug la, ka siaki li, one a one noŋi m. Ka one noŋ man la, m Baꞌ Winaꞌam me na noŋ o. Ka man na noŋ o, ka nie m meŋ n paꞌal o.” 22 Ka Judas, kaꞌane Judas Iskariot la, buꞌos o ye, “M Zugsoba, wala ka fu na nie fu meŋ n paꞌal tinam, ka kaꞌane dunia nidiba?”

23 Ka Yesu lebis o ye, “Nid yaꞌa noŋ man, o na diꞌe m noor, ka m Baꞌ na noŋ o, ka tinam na kenn o saꞌan na n kpelim o ni. 24 One pu noŋi m, pu diꞌedi m noore. Ka pianꞌad kane ka ya wum la, kaꞌ m meŋ pianꞌade, amaa li ane m Baꞌ one tum man na la pianꞌad.

25 “Pianꞌabama nwa ka m pianꞌad tisidi ya, man nan be ne ya la. 26 Amaa Suŋid la, one a Winaꞌam Siig Suŋ ka m Baꞌ la na ti tum o ya saꞌan na, ne m yuꞌur la, o na paꞌali ya siꞌel wusa, ka tiens ya siꞌel wusa lin ka man daa pianꞌ tisi ya la.

27 “M basi m sumalisim tisi ya, ka li ane m meŋ sumalisim ka m tisi ya, ka pu wenne dunia tisidi ya siꞌem la. Da ke ka ya sunya saꞌam, bee ka dabiem kpenꞌe yaa. 28 Ya daa pun wum ka m yeli ya ye, m na yi ya saꞌan, ka na lebi ya saꞌan na. Ya yaꞌa noŋin m, ya naan maalin sumalisim, man kenne m Baꞌ saꞌan la, bozugo m Baꞌ la gati m. 29 Ka nannanna m deŋim yeti ya ne ka li nan pu paae. Ka li yaꞌa ti paae ya na niŋ man yadda. 30 Ka lin yi nannanna n ken la, m ku lem pianꞌ bedego ne yaa, bozugo Sutaana one a dunia naꞌab la, kenna. Amaa o paŋ ku nyaŋe ma. 31 Li a tilas ka dunia dim baŋ ye n noŋi m Baꞌ la, ka m Baꞌ la noor ziꞌelug la ka man dol.

“Duomi ka ti yi kpela keŋ.”