1 Pinꞌilugin sa ka Pianꞌad la da pun deŋim be, ka Pianꞌad la da bene ne Winaꞌam, ka a Winaꞌam. 2 Hale pinꞌilugin sa Pianꞌad la da bene ne Winaꞌam.

3 Ka li yi o saꞌan na ka Winaꞌam naam bun wusa, ka li yaꞌa kaꞌan one, bun line naam la wusa ku naaminee. 4 O saꞌan ka nyovur be, ka nyovur la tis saalib neesim. 5 Ka neesim la nie nyain likin ka lik la pu nyaŋe kpiisi lii.

6 Winaꞌam da tum dau soꞌ ka o yuꞌur buon Joon. 7 Ka o kena ye o tuꞌas nidib neesim la yela, ye on zug ka ba wusa na niŋ Pianꞌad la yadda. 8 O da kaꞌ one a neesim laa, amaa o tuuma da ane ye o kena di neesim la kaset.

9 Yelmeŋir neesim line nie nyain tisid saalib wusa la da kenn dunia nwa ni. 10 O da be dunia ni, ka a one maal dunia, hale laꞌam ne wala dunia dim da pu diꞌe oo. 11 O kenn bane a o buudi dimin na, ka ba da pu diꞌe oo. 12 Amaa bane wusa diꞌe o ka niŋ o yadda la, o tisi ba paŋ kane ka ba na lieb Winaꞌam biis. 13 Ba da lieb Winaꞌam biis ka li pu wenne ninsaalibi duꞌad siꞌem laa, amaa Winaꞌam a ba Baꞌ.

14 Ka Pianꞌad la lieb ninsaal ka be ne ti. Ka ti nye o naꞌam paŋ beilim line nie ti saꞌan ka nar on kane a ti Baꞌ Winaꞌam biyimir la. O ni ka yelsum ne sida be.

15 Joon yeli o yela, ka mooli yel ye, “Soꞌ be mam nyaꞌaŋ ka mor kpiꞌeuŋ gat man. Bozugo o da be ka man nan kaeꞌ.” 16 Ka li yine o yelsum titaꞌarin ka ti wusa diꞌe o popielim piini la yinni yinni. 17 Winaꞌam da ke ka Moses tis nidib wada ka lee ke ka popielim piini ne sida yi Yesu saꞌan na tisi ti. 18 Soꞌ kaeꞌ nan miꞌ nye Winaꞌam. Winaꞌam biyimir one be o Baꞌ saꞌan la ke ka ti baŋ o.

19 Saŋkan la ka Jew dim bane be Jerusalem da tum maalmaanib ne Levi dim Joon saꞌan ye ba buꞌos o ye, “Fu aa anoꞌone?” 20 Ka Joon lebisi ba nyain ye, “Li kaꞌa mane a Kiristo laa.”

21 Ka ba buꞌos o ye, “Ka fu aa anoꞌone? Fu ane Elija bee?”

Ka o lebis ye, “Ayei.”

Ka ba lem buꞌos o ye, “Ka fu ane Winaꞌam nodiꞌes la bee?”

Ka o lem lebis ye, “Ayei.”

22 Ka ba lem buꞌos o yaꞌas ye, “Ka fu aa anoꞌon be? Tisimi ti lebiskan ka ti na tis bane tumi ti la na. Fun meŋ aa anoꞌon kimm ne?”

23 Ka Joon lebisi ba wenne line ka Winaꞌam nodiꞌes Azaya da sob siꞌem la ye, “Man ane one be sianꞌarin n moon ye, ‘Maalimi Zugsob la suer suꞌuŋa.’ ”

24 Bane buꞌos o la yine Farisee dimin na, 25 ka buꞌos o ye, “Fu yaꞌa kaꞌ Kiristo la, ka kaꞌ Elija, ka kaꞌ Winaꞌam nodiꞌes la, bo ka fu suud nidib la kuꞌom?”

26 Ka Joon lebis ye, “Mam suud ya ne kuꞌom. Amaa soꞌ be ya soogin ka ya ziꞌ o. 27 O ane one doli m nyaꞌaŋ na ka lee gati m, hale ka li pu nar ye m pidigi o taꞌadaa.”

28 Lini sob nwa niŋne Betani teŋin moꞌar Joodan nyaꞌaŋ, zinꞌikan ka Joon da suud nidib kuꞌom la.

29 Ka yimbeog ka Joon nye ka Yesu ken na, ka o yel ye, “Gosimi one a Winaꞌam peꞌebil one yiisid dunia tuumbeꞌedi basid la. 30 Oŋa ka m yel ye, ‘Soꞌ be m nyaꞌaŋi ken na, ka o mor kpiꞌeuŋ gati m, bozugo, o da be ka m kaeꞌ.’ 31 M da pu baŋ on a soꞌo, amaa line yela ka m daa suud nidib la kuꞌom ane ye li nie paꞌal Israel dim ka ba baŋ o.”

32 Ka Joon yel ye, “M nye ka Winaꞌam Siig Suŋ naam arazana ni sigid na wen wuu dawan ne n zuen ne o zugin ka kpelimi o ni. 33 M daa ziꞌ o, amaa Winaꞌam one tumi m na ye m suu nidib ne kuꞌom la paꞌali m ye, ‘One ka fu nye ka Winaꞌam Siig Suŋ la sigi o ni ka kpelim la, a one suud nidib ne Winaꞌam Siig Suŋ la.’ 34 M nye li ka dii li kaset ye one a Winaꞌam Biig la.”

35 Ka beog lem nie ka Joon da ziꞌe ne o nyaꞌandolib ayi yaꞌas. 36 Ka Yesu n ken la ka o gos o ka ye, “Gosimi oŋa a Winaꞌam peꞌebil la.”

37 Ka nyaꞌandoliba ayi la wum la, ka dol Yesu. 38 Ka Yesu giꞌe nye ban dol o la ka buꞌosi ba ye, “Ya bood bo?”

Ka ba lebis o ye, “Rabbi,” (li gbin ane ye, paꞌana,) “Fu gbeend yaa ni?”

39 Ka o ye, “Kemi na gosi.”

Ka ba keŋ nye on be siꞌel, ka gbenn o saꞌan daakan, bozugo li da ane winkoor.

40 Nidiba ayi bane wum Yesu pianꞌad ka dol o la yinni yuꞌur buon Andrew ka a Simon Piita baꞌabiig. 41 Ka line ka Andrew da niŋ yiiga ane, o keŋne ia Piita ka yel o ye, “Ti nye Messia la” (Li gbin ane Kiristo, one ka Winaꞌam gaŋ la.)

42 Ka o dol o kenn Yesu saꞌan na, ka Yesu gos o ka ye, “Fu ane Joon biiga Simon. Ba na buon uf ye Kefas. (Li gbin ane ye Akugir bee Piita.)”

43 Ka beog kane nie la ka Yesu bood ye o keŋ Galilee teŋin ka nye Filip ka yel o ye, “Doli m.”

44 Filip da yine Besaida, teŋkan ka Andrew ne Piita me yi na la. 45 Ka Filip nye Nataniel ka yel o ye, “Ti nye one ka Moses da sob o yela, ka Winaꞌam nodiꞌesidib me da sob la, one a Josef biig Yesu one yi Nazaret la.”

46 Nataniel buꞌos o ye, “Ka bunsuŋ siꞌa na nyaŋe yi Nazaret teŋin naa?”

Ka Filip lebis o ye, “Kem na gos.”

47 Ka Yesu nye Nataniel ka o kenne n tuꞌa o na ka o pianꞌa o yela ye, “Gosimi, oŋa ane Israel nid ameŋa ka pu mor taala.”

48 Ka Nataniel yel ye, “Fu niŋ wala baŋi ma?”

Ka Yesu lebis o ye, “Saŋkan ka fu paꞌa be kekaŋ gbinin ka Filip buol uf la, ka mam pun nye uf.”

49 Ka Nataniel yel ye, “Paꞌana, fu ane Winaꞌam biig, ka a Israel dim naꞌab.”

50 Ka Yesu yel o ye, “Mam yel ye, m nye uf ka fu be kekaŋ gbinin la zug, ka fu niŋi m yaddaa? Fu na nye yel nyalima bane gat neꞌeŋa.” 51 Ka lem yel o ye, “Asida ka m yet uf ye, fu na nye ka arazana yoꞌog ka Winaꞌam maleknam dol Ninsaal Biig la saꞌan n dut ka sigid na.”