1 Man yet siꞌel la ane ye, ba gosid biig kane na ti di o saam faar la wuu o ane yamug ne, o biilim saŋa, hale laꞌam ne on sid soꞌe siꞌel wusa la. 2 Ka on a biig la, nidib be n gosid o yela wusa hale n ti paae saŋkan ka o saam ziꞌel o la. 3 Ala men tinam daa nan a biis Winaꞌam yela ni la ti daa ane yamis ninsaalib yiiga paꞌalug ni. 4 Ka saŋa kan ka Winaꞌam daa ziꞌel la daa ti paa na la, Winaꞌam tum o meŋ Biig. Ka poꞌa soꞌ duꞌa o, ka o be Jew dim wada la nuꞌusin. 5 O tum o ye o faaenn bane ka wada la soꞌe ba la, ka ke ka ti lieb Winaꞌam biis.

6 Winaꞌam da ye o paꞌali ti ye ti aa o biis la, ka tum o Biig Siig Suŋ ye o bee ti sunfin ka ke ka ti buol Winaꞌam ye, “M Baꞌ.” 7 Ka dinzug fu len kaꞌ yamugo, ka ane Winaꞌam biig. Ka fun sadigim aa o biig la, o na tis uf on ziꞌel siꞌel wusa ye o tis o biis la.

8 Saŋsiꞌen la ka ya da ziꞌ Winaꞌam la, ka dol siꞌelnam line kaꞌ Winaꞌam, ka aa li yamis. 9 Amaa nannanna ya yuꞌun miꞌ Winaꞌam, (ka li kaꞌ ye yaname miꞌ oo, ka ane ye Winaꞌam lee miꞌi ya,) wala ka ya na lem dol line kaꞌa paŋa ka a zaalim? Bo ka ya bood ye ya lem aa li yamis yaꞌasa? 10 Ya doli dabis sieba ne nwadis sieba ne saŋa sieba ne yuma sieba la malima. 11 M zot dabiem ye m tuuma kan ka m daa tumi ya zug la ane zaalim.

12 M baꞌabiise, m belimi ya ye ya aa wuu mam ne; ka mam me aa wuu yanam ne. Ya pu tum mam beꞌede. 13 Ya miꞌ ye man daa mool labasuŋ la ya saꞌan yiiga daan la, li daa ane man daa benꞌed la zug. 14 Amaa ya pu neꞌesi ma ka laꞌam ne m niŋgbina la daa a siꞌem la hale li daa daami ya, ya daa lee diꞌe m wuu m ane Winaꞌam malek bee Yesu Kiristo ne. 15 Ya daa mor sumalisim mam zug. Ka bo len niŋ ka ya tiake? Mam na nyaŋe yel ya yela ye, li yaꞌa nyaŋedin, ya daa naan fue ya nini n tisin mam. 16 Ka m yuꞌun liebne ya dataa man yeti ya line a sida la bee?

17 Nimbama la boodi ya yela. Amaa ba more potenꞌer beꞌed. Ba bood ye ba baki ya ne tinam ka ya lee boodi ba yela. 18 Soꞌ yaꞌa tenꞌes suŋ o taaba yela, li a suꞌum ye o boodi ba yela. Lina yiti a sida, m yaꞌa bee ya saꞌan bee m yaꞌa kaꞌa ya saꞌanee. 19 M binoŋa, m lem mor toog m saꞌan ya zug n ti paae saŋkan ka ya a wuu Kiristo a siꞌem la, ka toog la wenne wuu poꞌa yiti saꞌa bood duꞌam la. 20 M naan boodin ye m be ne ya saꞌan nannanna nwa, ka na nyaŋe tiake man pianꞌad siꞌem ne ya la. Ya yela ke ka m ziꞌ man na niŋ siꞌem.

21 M ye m buꞌos yanam bane bood ye wada la soꞌe ya la ye, ya pu wum wada la yel siꞌel laa? 22 Li ye Abraham da duꞌa biis ayi. Ayinni a yamug biig, ka yinni a poꞌa kane kaꞌ yamug biiga. 23 Ka ba da duꞌa o bikane a poꞌa yamug biig la wuu ban yiti duꞌad siꞌem la. Ka li lee ane Winaꞌam noorziꞌelug la ke ka ba duꞌa biig kane a poꞌa kane kaꞌ yamug la biig la.

24 Neꞌe ane nwaasug ne. Ka poꞌab ayi la nwaasne wada la ne noorziꞌelug line ka Winaꞌam tis o nidib la. One duꞌa biig ka mor yaas ka ba a yamis la nwaasne wada line da yi Sinai zuerin la, zinꞌig kan ka Winaꞌam tisi li la, ka one a poꞌa kane yuꞌuri buon Haga la. 25 Ka Haga nwaasne Sinai zuer line be Arabia teŋin, ka me nwaasne Jerusalem ne Jew dim wada line be nannanna nwa la. Ka Jerusalem ne nidib bane doli li malima la ane yamis wuu Haga ne o yaas la a siꞌem la. 26 Amaa Jerusalem line be agol la kaꞌa yamuga ka lee aa ti ma. 27 Ka li sob Winaꞌam gbauŋin ye,

28 M baꞌabiise, yanam ane Winaꞌam biis, ka li yine o noziꞌelugin, wuu poꞌa kane kaꞌ yamug la biig duꞌam la da yi Winaꞌam noziꞌelugin siꞌem la. 29 Abraham saŋa la, biig kane ka ba da duꞌa wuu ban yiti duꞌad siꞌem la, namisid biig kane ka ba duꞌa ka li yi Winaꞌam Siig Suŋ ni na la. Li me ane ala nannanna. 30 Tenꞌesimi Winaꞌam gbauŋ la yel siꞌem la ye, “Kadim poꞌa kane a yamug la ne o biig; ka o biig ne poꞌa kane kaꞌ yamug la biig la ku ti laꞌam pudug ba saam faar laa.” 31 Ala, m baꞌabiise, tinam wenne poꞌa kane kaꞌ yamug la biis ne, ka pu wenne yamug la biis laa.