1 Man Paul one a Kiristo Tumtum sobid gbauŋ kaŋa. Li kaꞌ nidibi daa gaŋi m ka m a Kiristo Tumtum laa, ka li me pu yi ninsaal soꞌ ni naa. Ka li ane Yesu Kiristo ne ti Baꞌ Winaꞌam one vuꞌug o kumin la n gaŋi m. 2 Ti baꞌabiis bane wusa laꞌam be ne mam kpela la puꞌusid yanam Winaꞌam nidib bane be Galatia teensin la.

3 Ti Baꞌ Winaꞌam ne ti Zugsob Yesu Kiristo na tisi ya yelsum ne sumalisim. 4 Kiristo da pesigi o meŋ tis ye ba ku o tinam tuumbeꞌed zug, wuu ti Baꞌ Winaꞌam boodim a siꞌem la, ye o faaenn ti dunia beꞌug nwa ni. 5 Winaꞌam na nye zunꞌor ka li kaꞌ naare. Ami.

6 Li paki m ye yanam taꞌam bas Winaꞌam one buoli ya Kiristo popielim zug la ka ya lee bas o ka diꞌe labaar siꞌa la, 7 laꞌam ne lin kaꞌ labasuŋ la. Amaa ninsieba be ka daamidi ya ka mood ye ba tiak Kiristo labasuŋ la. 8 Hale laꞌam ne tinam bee malek one yi arazana ni la yaꞌa mool labaar siꞌa line bee li konꞌ ne tinam mool siꞌel ya saꞌan la, Winaꞌam nopoor na be on sob zug. 9 Ti daa pun yeli li, ka m lem yeti yaꞌas ye, soꞌ yaꞌa mool labaar siꞌa ka li bee li konꞌ ne yanam diꞌe siꞌel la, Winaꞌam nopoor na be on sob zug.

10 Ya tenꞌes ye m mood ye m ke ka nidib pianꞌ m yela suꞌum bee? Ayei, m bood ye Winaꞌam pianꞌ m suꞌum. Ka ya tenꞌes ye m mood ye m maꞌae nidib sunya bee? Ayei, m yaꞌa moodin ye m maꞌen nidib sunya, m naan ku aan Kiristo tumtum na.

11 M baꞌabiise, m bood ye ya baŋ ye labasuŋ line ka m moon la pu yit ninsaalib potenda ni naa. 12 Ka m me daa pu diꞌe li soꞌ nii, ka soꞌ daa pu yeli li paꞌali m mene. Ka li lee daa ane Yesu Kiristo meŋ daa nie li n paꞌali m.

13 Ya daa wum man daa dol Jew dim malima la ka daa yiti niŋid siꞌem la n daa namisid Winaꞌam nidib bedego, ka mood ye m saꞌami ba suer la. 14 Ka m miꞌilim ne m suꞌum niŋir ti Jew dim malima yela, daa gaad m Jew dim taaba bane zem ne man la. Ka m potenꞌer daa gbanꞌe hale ye m doli ti yaanam malima. 15 Ka Winaꞌam lee daa gaŋi m ka ba nam pu duꞌa ma, ka buoli m o saꞌan o popielim zug. 16 Ka saŋkan ka Winaꞌam daa gbanꞌe ye o nie o Biig la paꞌali m ye o ke ka m mool o Biig la labaar n tis bane kaꞌ Jew dim la, m daa pu keŋ soꞌ saꞌan ye o zamisi ma. 17 Ka m me daa pu keŋ Jerusalem bane pun deŋ man a Tumtumnib la saꞌanee. Amaa m daa keŋ ne Arabia soꞌolimin, ka lin nyaꞌaŋ ka m leb Damaskus teŋin.

18 Ka li daa gaad yuma atanꞌ nyaꞌaŋ ka m nyaan keŋ Jerusalem ye m kaae Piita, ka daa bee o saꞌan n paae dabisa piinanu, 19 ka pu nye Tumtum soꞌ yaꞌasa, asee Jemes one a Zugsob pitu la maꞌaa. 20 Winaꞌam miꞌ ye lin ka m sobid o tuon nwa la ane sida, ka kaꞌ damaꞌare. 21 Ka m nyaan yi Jerusalem n keŋ zinꞌis sieba bane be Siriya ne Silisia teensin. 22 Ka Winaꞌam nidib bane be Juuda teŋin la wum m yela ka lee nam pu nyee m ne ba ninii, 23 ka ba lee daa wum ne ka sieba yeti m yela ye, “One daa namisidi ti la, yuꞌun moon yadda niŋir paꞌalug line ka o daa mood ye o saꞌam la.” 24 Ka mam zug ka ba zunꞌe Winaꞌam.