1 M zuanoŋa, noorziꞌela bama ane ti din. Dinzugo keli ka ti bas siꞌel wusa line ket ka ti niŋgbina ne ti siis a dianꞌad la, ka lieb nyain. Keli ka ti naꞌas Winaꞌam ka ke ka ti aa o nidib ka a suꞌum nyain.

2 Keli ka ya noŋilim ti saꞌan nobug bedego. Ti pu tum soꞌ beꞌede, ka pu saꞌam soꞌ yadda niŋire, ka pu noki ti tuuma zug n diꞌe siꞌel soꞌ saꞌane. 3 M pu bood ye m yeli ya ye ya tum beꞌede; ka m deŋin yel ye tiname noŋi ya siꞌem la ane bedego. Ka li yaꞌa a ye ti kpine bee ti voe ti ku bas ti noor yinni laa. 4 M miꞌ ya poog suꞌuŋa ka mor nyeesim ya yela. Ti yeltood wusa poogin m mor sukpiꞌeuŋ ne sumalisim bedego.

5 Hale ne tinam daa paae Masedonia teŋin la, ti daa pu nye vuꞌusum. Yeltood daa be zinꞌis wusa ka zaba me be. Ka ti meŋ mor dabiem ti sunfin. 6 Ka Winaꞌam one ket ka bane mor susaꞌaŋ la nye kpeꞌeŋir la daa ke ka Titus kena, ka ti sunf kpeꞌeŋ, 7 ka li kaꞌane o ken la na maꞌanee, amaa on daa yeli ti yaname daa kpeꞌeŋ o sunf siꞌem la. O yeli ti ye ya bood hale ye ya nyee m ka mor susaꞌaŋ ne line daa niŋ la ye ka soꞌ yaꞌa pianꞌa beꞌed man yela, yanam yiti kpeꞌeŋi ya meŋ n lebis suꞌum man yela. Ka dinzug ka m sumalisim maligim paas bedego.

8 Hale laꞌam ne gbauŋ kan ka m daa sob la daa saꞌam ya sunya la, m sunf pu saꞌam man sobi li laa. M nye ka m gbauŋ la daa saꞌam ya sunya, amaa li ane saŋa biꞌela. 9 Ka m mor sumalisim nannanna, ka li kaꞌane man daa ke ka ya sunf saꞌam la yelaa, ka ane ye ya susaꞌaŋ la daa ke ka ya tiake ya sueya la zug. Susaꞌaŋ kaŋa ane susaꞌaŋ lin ka Winaꞌam tisi ya, ka dinzug ka gbauŋ kane ka ti daa sob la pu ke ka ya nye beꞌede. 10 Susaꞌaŋ lin ka Winaꞌam tisid la ket ka nidib tiakedi ba sunya ka lin na ke ka ba nye faangir. Ka susaꞌaŋ ku be neꞌeŋa nii. Ka dunia susaꞌaŋ dolne kuꞌum. 11 Ya nye Winaꞌam n ke ka ya susaꞌaŋ dol suer siꞌa. Li daa ke ka ya tenꞌes line daa niŋi ya saꞌan la yela ne nimmua, ka ke ka ya bood bedego ye ya paꞌal ye ya kaꞌ taal yelkaŋa nii, ka ke ka ya sunf due, ka ya zot dabiem, ka bood ne ya sunya wusa ye ya nyee m ka bood ye ya niŋ line a suꞌum, ka kpeꞌeŋi ya meŋ ye ya saans one tum tuumbeꞌed kaŋa la. Ya paꞌaleya ye ya kaꞌ taal yelkaŋa wusa nii.

12 Hale ne man daa sobi ya siꞌem la, man daa pu sobi li one tum tuumbeꞌed kaŋa bee on ka o maal beꞌed tis o la zugo, ka lee sobi li ye li ke ka ya baŋ suꞌuŋa Winaꞌam tuon yaname noŋi ti siꞌem bedego la. 13 Dinzugo ti nye sukpiꞌeuŋ ka me nye sumalisim bedego. Titus mor sumalisim yaname ke ka o susaꞌaŋ naae la zug. Ka lin ke ka ti sumalisim paas bedego. 14 M daa nweꞌe nyoꞌog ya yela Titus saꞌan ka ya me pu diis m nyane. Ti yiti pianꞌad sida tisidi ya. Ka ala men tiname pianꞌad siꞌel n nweꞌed nyoꞌog ne Titus la daa sid a sida. 15 Ka Titus tenr yaname wusa kpeꞌeŋi ya meŋ n siak m noor ka diꞌe o ne zotim siꞌem la. Ka dinzug ka o noŋilim ya saꞌan nobugid bedego. 16 M miꞌ ye ya na niŋ siꞌel wusa lin ka m yeti ya la. Ka dinzug ka m mor sumalisim.