1 Winaꞌam zoti ti nimbaanlig ka tisidi ti tuumkaŋa, ka dinzug ka ti pu sinꞌigida. 2 Ti zanꞌasne ye ti dol nyan ne yelsuaꞌada tuuma wusa, ka me pu maꞌad nidibaa, bee tiaked Winaꞌam pianꞌad ye li dol ziri sueyaa, ka lee pianꞌad yelsida paalo ni, ka niŋidi li Winaꞌam tuon, ka ke ka nidib yaꞌam line miꞌ suꞌum ne beꞌed la baŋ ye ti niŋid line a suꞌum. 3 Labasuŋ line ka ti moon la yaꞌa suaꞌane, ka li a wuu pien ligili li, li suaꞌane bane bodig la saꞌan maꞌaa. 4 Sutaana one soꞌe dunia nwa la ke ka bane pu niŋ Winaꞌam yadda la yaꞌam a lik, ka ba ku nyaŋe baŋ labasuŋ Kiristo naꞌam yela laa, one a wuu Winaꞌam a siꞌem wusa la. 5 Ti pu mooni ti meŋ yelaa, ka lee moon ye Yesu Kiristo a Zugsob, ka ye tinam tumi tisidi ya Yesu zug. 6 Winaꞌam da yel ye, kel ka li nie nyain likin. Ka li ane one ke ka li a nyain ti sunfin n ke ka ti baŋ Winaꞌam naꞌam pipilim line ka ti nye Kiristo saꞌan la suꞌuŋa.

7 Ka baŋir kaŋa la wenne siꞌel line ligidi zuꞌe bedego, ka ba suaꞌa li dukin. Ka tinam wenne duk la, ye li paꞌal ye paŋtitaꞌar line ka li mor la kaꞌa tinam dine, ka lee ane Winaꞌam bun. 8 Ti nyet daamug siꞌel wusa ni ka ti sunf pu saꞌamida, ne yelpakir ka pu basi ka kpelim mor potenꞌer ye ti na yii li ni, 9 ka nyet namisug ka Zugsob la pu basidi tii, ne demis ka ti pu kpii, 10 ka yiti nyet namisug ti niŋgbina ni wuu Yesu da kpi siꞌem la ye nidib na nye o nyovur ti niŋgbina ni. 11 Ti vum saŋa wusa ka ti yiti nyet namisug line zemis ne kum Yesu zug, ye nidib na nye o nyovur ti niŋgbina line na kpi la ni. 12 Aa to, kuꞌum tumi ti saꞌan, amaa vum tumi yanam saꞌan.

13 Li sob Winaꞌam gbauŋin ye soꞌ yel ye, “Man niŋ Winaꞌam yadda la zug ka m pianꞌad.” Tinam meŋ niŋ Winaꞌam yadda wuu on niŋ siꞌem la ka ti yadda niŋir zug ka ti me pianꞌad. 14 Ka miꞌ ye Winaꞌam one vuꞌugi ti Zugsob Yesu kumin la, me na vuꞌug tinam meŋ ne o, ka laꞌase ti ne yanam n more ti keŋ o tuon. 15 Li wusa ane yanam suꞌum nyeeb zug. Ka Winaꞌam popielim yadigid ka nidib nyee li ka paasid, ka ala ka ba bareka puꞌusug la me paasid n tisid Winaꞌam naꞌasi.

16 Dinzugo, ti pu sinꞌigida. Hale laꞌam ne ti ninsaal niŋgbina saꞌamid la, Winaꞌam ket ka ti meŋ nyet vumpaal ti sunfin beog beog. 17 Namisug line ka ti nyet la ane biꞌela ka na gaad, ka lee ke ka ti na nye naꞌasi titaꞌar line kaꞌa naare, ka gati ti namisug la bedego, ka ti ku nyaŋe maki li ne ti namisug laa. 18 Ti noki ti sunf n lo ne bun lin ka ti pu nyetaa, ka kaꞌ ne bun lin ka ti nyeta. Bun lin ka ti nyet la ku yaꞌas naare, ka lin ka ti pu nyet la na be yuma ka li kaꞌ naare.