1 Kiristo sadigim namis niŋgbiŋin la, ya kpeꞌeŋimi ya meŋ ne potenꞌer kan men; ka one mekama namis niŋgbiŋin, on baꞌa lem kaeꞌ ne tuumbeꞌede. 2 Ka nannanna kudum waꞌae sa, ya niŋgbina beilim da dol ninsaal boodim amaa Winaꞌam boodim. 3 Bozugo saŋa line gaad la ya yaꞌa daa tumne line ka buudi bane pu dol Winaꞌam bood ye ba tum la, ka ba beilim a tuumyaalis ne niŋgbina boodim ne danuur, ne danuur tuuma ne geenn tuuma ne bada maalug line pu dol Winaꞌam suere. 4 Ka yaname pu lem laꞌas ne ba n tum ba geenn tuuma la, ka ba pu baŋi li gbin ne ka tuꞌudi ya. 5 Amaa Winaꞌam one gur ye o kad bane voe ne bane kpi saria, ka ba lebis Winaꞌam ban tum siꞌel. 6 Neꞌeŋa zug ka ba da mool labasuŋ n tis bane kpi la ye, hale baa Winaꞌam kadi ba saria niŋgbiŋin wuu saalib ne la, ba tunꞌe voe ne siis wuu Winaꞌam ne.

7 Bun wusa naar pu lala. Dinzugo gbanꞌamini ya meŋ ka mor nimmua ne ya Winaꞌam puꞌusug la. 8 Line gati li wusa ane ye ya mor noŋilim ne taaba ne nimmua, ka one mor noŋilim la ku gos soꞌ na tum o beꞌed ka li a siꞌela. 9 Maalimi saauŋ ne taaba ka da more nyunyolise. 10 Yanam bane diꞌe Winaꞌam popielim piini konꞌob konꞌob la gosimini li suꞌuŋa ka zaŋ line ka o tisi ya la niŋi suꞌum tisi taaba. 11 One mekama pianꞌad on baŋim ye o pianꞌadne Winaꞌam pianꞌad. Ka one me suŋid, me baŋim ye Winaꞌam tis o paŋ. Tuumbannam wusa na zunꞌe Winaꞌam yuꞌur line yit Yesu Kiristo saꞌan. Winaꞌam mor naꞌam ne naꞌasi line kaꞌ benne. Ami.

12 M zuanoŋa, da ke ka namistitaꞌar line na kpansi ya la paki yaa wuu li ane bunsaaŋi tisi yaa. 13 Ka lee more sumalisim yaname laꞌam namis ne Yesu la zug, ye ya more sumalisim bedego o pipilim naꞌam nier saŋa. 14 Ba yaꞌa tuꞌudi ya Yesu Kiristo yela, ya mor yelsum, bozugo Winaꞌam Siig Suŋ one mor naꞌasi bedego be ne ya. 15 Amaa da ke ka ya soꞌ namisid tuum bamanaminee, on naani a ninkuud, bee naꞌayiig, bee tuumbeꞌed sob bee one nweꞌedi o meŋi gentid nidib tuuma ni. 16 Ka soꞌ yaꞌa namis on niŋ Kiristo yadda la zug, o da zoti li nyanne. O lee zunꞌom Winaꞌam yuꞌur Kiristo yuꞌurin. 17 Ka saŋa paaya ye Winaꞌam saria kadib pinꞌil ne o yidim, ka li yaꞌa pinꞌil ne ti, bane pu siak Winaꞌam labasuŋ la baꞌasug na a wala? 18 Li sob Winaꞌam gbauŋin ye,

19 Dinzugo keli ka bane namisid ka li dol Winaꞌam boodim la, niŋi line a suꞌum ka nokidi ba meŋ pesig Winaꞌam one maali ba ka a yelsida sob la.