14
1 A lungkaang e napui ni teh a im hah a sak,
hatei ka pathu e ni teh amae kut hoi ouk a raphoe.
2 Kalanlah ka hring e ni BAWIPA a bari,
hatei a hringnae ka longkawi e ni teh a dumdam.
3 Tamipathu e pahni dawk kaisuenae bongpai ao,
hatei tamilungkaang e pahni ni teh kânguenae a poe.
4 Maitotan ohoehnae koe maito im a thoung,
hatei moikapap pungnae teh maitotha dawk doeh ao.
5 Yuemkamcu e ka panuekkhaikung teh laithoe dei hoeh,
hatei kapanuekkhaikung kaphawk ni doeh laithoe ouk a dei.
6 Ka dudam e tami ni teh lungangnae
ka tawng nakunghai hmawt mahoeh,
hatei kathaipanueknaw hanelah teh panuenae heh ayawica.
7 A pahni panuenae na hmu hoeh toteh,
tamipathu teh cettakhai yawkaw.
8 Ma e coungnae panue e heh poukthainae ka tawn e lungangnae doeh,
hatei tamipathunaw e pathunae teh dumnae doeh .
9 Tamipathu ni teh yonnae a panuikhai,
hatei tamikalannaw koe ngaikhainae ao.
10 Lungthin patawnae heh lungthin ni doeh a panue,
ayânaw ni teh lunghawinae hai hmawngkhai katang hoeh.
11 Tamikathout imthung teh ka rawk han doeh,
hatei tamikalan e rim teh a kamhlawng han.
12 Tami pouknae lahoi teh lam kalan lah a kamcu eiteh,
apoutnae koe lah duenae koe ka phat e lam hai ao.
13 Panui lahun nahai lung a mathoe teh,
panuinae a poutnae heh lungmathoenae lah a coung thai.
14 Lungthin hoi hnuklah ka ban e teh, ama ngainae hoi a kawi han,
hatei tamikahawi teh hot patet e lathueng vah
ao dawkvah a lunghawi han.
15 Kamawngrame ni dei e pueng a yuem awh,
hatei kâhruetcuet e tami ni teh
a cei nahane lamthung kahawicalah a pouk.
16 Tamilungkaang ni teh a taki dawkvah yonnae hah a roun,
hatei tamipathu ni teh amahoima a kâyuem teh a taran a hawi sak.
17 Tami lungkaduem teh pathu laihoi a kâroe,
hatei tamikathout e noenae teh hmuhmanae doeh.
18 Kamawngrame e coe e teh pathunae doeh,
hatei kho ka pouk e teh panuenae kâmuksak lah ao.
19 Tamikahawi teh tamikahawi hmalah a tabut vaiteh,
tamikathout teh tamikalan e takhang koe a tabut han.
20 Tamikathout teh a imri ni hai a hmuhma,
hatei tami ka tawnta ni hui moi a tawn.
21 A imri ka dudam e teh tamikayon doeh,
hatei tamimathoe ka pahren e teh a lungkahawi e lah ao.
22 Hnokathout ka pouk e teh lam a phen toung nahoehmaw,
hatei lungmanae hoi lawkkatang teh
hawinae kapouknaw hane doeh.
23 Tawknae pueng dawk meknae ao teh,
pahni hoi dei rumram e teh voutnae doeh.
24 Tamilungkaangnaw e bawilukhung teh tawntanae doeh,
hatei tamipathu pathunae hateh a pathunae doeh .
25 Kapanuekkhaikung katang ni teh hringnae a rungngang,
hatei kapanuekkhaikung kaphawk ni teh laithoe ouk a dei.
26 BAWIPA takinae dawkvah a taranhawi laihoi a tha ao teh,
a canaw ni kânguenae a pang awh han.
27 BAWIPA takinae teh hringnae tuiphuek lah ao teh,
duenae karap dawk hoi kamlang sakkung lah ao.
28 Tamimaya koe siangpahrang barinae ao teh,
tami younca koe e ukkung teh rawkphainae doeh.
29 A lung kasawe ni thaipanueknae a tawn,
hatei tami lungkaduem e teh pathu tawmrasangnae doeh.
30 Lungthin damnae teh tak hanelah hringnae lah ao teh
utsinnae teh hru ka rawk sakkung doeh.
31 Tamimathoe repcoungroe e teh
ama kasakkung dudam e lah ao,
hatei kasakkung ka bari e ni tami kavoutthoupnaw pahrennae a tawn.
32 Tamikathout teh a thoenae ni letlang a pâlei teh,
tamikalan teh a duenae koe kânguenae a tawn.
33 Thaipanueknae katawnnaw lungthin dawk lungangnae ao,
hatei tamipathu e lungthung kaawm e teh kamnue sak lah ao toe.
34 Lannae ni miphun a tawmrasang,
hatei yonnae teh tami pueng hanelah min mathoenae doeh.
35 Tamilungkaang okhai e teh siangpahrang ni a ngai pouh,
hatei yeirai ka po sakkung koe a lung ouk a khuek