1 Abraham hoi Devit e catoun lah kaawm e, Jisuh Khrih a thonae lairui cauk teh, 2 Abraham capa Isak, Isak capa Jakop, Jakop capa Judah hoi a hmaunawngha naw. 3 Judah ni Tamar hoi a khe e capa Perez hoi Zerah, Perez capa Hezron, 4 Hezron capa Aram, Aram capa Amminadab, Amminadab capa Nahshon, Nahshon capa Salmon, 5 Salmon capa Boaz, Rahab hoi a khe e. Boaz capa Obed, Ruth hoi a khe e. Obed capa Jesi, Jesi capa Devit siangpahrang.

6 Devit capa Solomon, Uriah e a yu hoi a khe roi e, 7 Solomon capa Rehoboam, Rehoboam capa Abijah, Abijah capa Asaph, 8 Asaph capa Jehoshaphat, Jehoshaphat capa Joram, Joram capa Uzziah, 9 Uzziah capa Jotham, Jotham capa Ahaz, Ahaz capa Hezekiah, 10 Hezekiah capa Manasseh, Manasseh capa Amon, Amon capa Josiah, 11 Josiah capa Jekhoniah hoi a hmaunawnghanaw, Babilon lah a kampuen tawmlei vah a khe e ca catounnaw doeh.

12 Babilon kho lah a kampuen awh hnukkhu, Jekhoniah capa Shealtiel, Shealtiel capa Zerubbabel, 13 Zerubbabel capa Abiud, Abiud capa Eliakim, Eliakim capa Azor, 14 Azor capa Zadok, Zadok capa Akhim, Akhim capa Eliud, 15 Eliud capa Eleazar, Eleazar capa Matthan, Matthan capa Jakop, 16 Jakop capa, Meri e a vâ Joseph, Khrih tie Jisuh teh Meri koehoi a khe. 17 Abraham koehoi Devit totouh a se hlaipali, Devit koehoi Babilon kho lah a kampuen awh totouh a se hlaipali, Babilon kho lah a kampuen awh hoi Khrih totouh a se hlaipali touh a pha.

18 Jisuh Khrih a khenae teh, hettelah ao. A manu Meri teh Joseph yu lah pacei lah ao navah tak cungtalah a hmawng roi hoehnahlan, 19 Kathoung Muitha e camo teh a vawn toe. A vâ Joseph teh tamikalan lah ao dawkvah, Meri kaya sak hane a ngai hoeh dawkvah, arulahoi ma hanlah a kâcai.

20 Hottelah a kâcai navah, a manglah Bawipa e kalvantami, ahni koe a kamnue pouh teh, Devit capa Joseph, na yu Meri paluen hane hah na lungpuen hanh, atu e a vawn e camo teh Kathoung Muitha lahoi doeh a vawn. 21 Ahni ni Ca tongpa a khe vaiteh, Jisuh telah na phung han. Bangkongtetpawiteh, a taminaw yon thung hoi a rungngang han dawkvah atipouh.

22 Hete akong teh Bawipa ni profetnaw hno lahoi sutdeilawk akuep nahane doeh. 23 Sutdeilawk teh, Khenhaw! tanglakacuem ni vawn vaiteh ca tongpa a khe han. A min teh Emmanuel telah a phung han. Emmanuel tie teh Cathut maimouh koe ao tinae doeh.

24 Joseph a kâhlaw teh, Cathut e kalvantami ni lawk a poe e patetlah a yu teh a paluen. 25 Hatei, camin a khe hoehroukrak tak cungtalah hmawngkhai hoeh. Hote capa hah Jisuh telah a phung.