1 Ca̱a̱ de̱ lo gyicy nu zeed de̱ lo de ru de riidz ni biñ nu bi zu nil nese anzir nu gzub gyiꞌ gyishlombecy. De̱ ya̱ güeñ de̱ riidz nu mniim. Nunu bzaac urlo̱ la̱ de̱m. Gun bgüi̱i̱ de̱ lom, nunu gul ya̱a̱ de̱m. Mi zeꞌ nac mi biñ nu la riidz ni Ñgyoozh, biñ nu rbic gyel mbañ. 2 Orzeꞌ bruu zac biñ nu rbic gyel mbañ zeꞌ lat de̱ ya̱. Nunu bzac de̱m, nunu ne̱e̱ de̱ lo der cyu nac biñ nu rbic gyel mbañ nu rila walazh. Mi zeꞌ biñ nu nil gulas nac nu Ñgyoozh, Uz den. Tees Ñgyoozh, Uz na, bicy mi nu bruu zac mi lo de̱ ya̱. 3 Orzeꞌ shaal de̱ lo der de riidz nu güeñ de̱, gal nu de coz nu bzaac de̱, gun orzeꞌ gac nu der de̱ ya̱. Orzeꞌ de ub na gac du den Ñgyoozh Uz na gal nu Iꞌñ mi Jesucrisht. 4 Orzeꞌ rca̱a̱ de̱ de riidz ii, gun orzeꞌ gyet lagy de̱ gashtal zeꞌ nu wagacaꞌ la.

5 Nii riidz nu güeñ de̱ nu mnii Jesucrisht lo̱ de̱. Nunu shaal de̱ ñii lo der: Ñgyoozh nam gal nu na zeꞌ yuꞌ yaa, gun dzi yon mi. Par lo Ñgyoozh sac la cyi. 6 Benu niin nu nac dun mi, zeꞌ laab tiem zeꞌ rded na ricy na cyi, orzeꞌ rguun, nunu wagyicy den gal nu rlagy Ñgyoozh. 7 Tees benu rded na zeꞌ nu yuꞌ yaa gal nu Ñgyoozh zum zeꞌ nu yuꞌ yaa, orzeꞌ nac du den losaꞌn. Nunu nu nac reñ Iꞌñ mi, Jesucrisht, gyecy dela cyi den.

8 Benu niin nu sac cyin, orzeꞌ rguun laab ub na, nunu wacsaan den nu chetib ic coz rishli nañ lardoon. 9 Zeꞌ benu shuub ruꞌ den de cyi nu ricy na, orzeꞌ mi zeꞌ ricy paam, nunu ricy mi coz nu seꞌñ. Orzeꞌ gyicy sulagy mi dela cyi den, nunu cyib mi dela coz cyi nu ricy den. 10 Benu nii den nu sac cyin, orzeꞌ ricy na nu Ñgyoozh nac mi tub biñ rguu, nunu wacsaan na nu chetib ic riidz nim nañ lardoon.