2
Ita musti haraik aan hanesan Yesus Kristus
1 Mamaluk sia! Kristus foo lia diꞌak waꞌin boot baa ita tiꞌan. Ita bele hakbiit malu neon. Ita bele foo lia tateꞌan mak nahabut nosi itakaan dadomin. Ita bele moris furak ho malu, tan Naꞌi Maromak Kmalar Lulik serwisu iha itakaan klaran. Ita moos bele hatudu laran dodan no laran maluak baa malu. 2 Kalo emi halaꞌok lia nia hotu-hotu, haꞌu neon boot. Liu tan tenik, kalo emi neon mesak, krarain mesak, no hodi lia kabuar atu serwisu hamutuk. 3 Keta halo sa-saa mak buka sotir duꞌuk. Keta mose aan maꞌak, o makaꞌas liu ema seluk, tan tuir loos, okaan lokok nia la noo tatuur. Ita musti haraik aan, hodi hafoli ema seluk liu ita. 4 Keta babilan loos emikaan moris duꞌuk. Mais ita moos musti haree ema seluk.
5 Itakaan neon musti hanesan Yesus Kristus neon.
6 Masik Niakaan ilas manesak no Naꞌi Maromak,
Nia moos Ulun manesak no Naꞌi Maromak,
mais Nia nabusik Niakaan beran,
no la tau Niakaan kneter-taek.
7 Nia namaan aan tuun mai iha raiklaran neꞌe,
tau ilas nuꞌu ema raiklaran da-daun.
Nia nabusik nela Niakaan beran hotu-hotu,
nodi nalo aan dadi ata.
8 Nia lahoos dadi ata dei,
mais Nia moos nalo aan dadi ema kona lelen,
nodi nalo tuir Naꞌi Maromak hakaran toꞌo mate.
Masik ema noꞌo Nia iha ai karuus toꞌo mate moos, Nia simu.
Ema noꞌo Nia, hanesan Nia neꞌe, ema aat.
9 Tan Nia naraik aan nunia,
Naꞌi Maromak foti-nahaas Nia.
Naꞌi Maromak foo naran boot kaliuk baa Nia.
La noo naran ida tenik mak boot liu naran nia.
10 Naꞌi Maromak foti-nahaas Niakaan naran nunia,
nebee ema hotu-hotu nakneter Nia.
Ema iha laleꞌan,
no ema iha raiklaran.
Ema mak moris no ema mak mate.
Nosi ikus, ema hotu-hotu atu nakniꞌa nodi loꞌu-sudur baa Nia.
11 Ema hotu-hotu atu katak naꞌak, “Yesus Kristus nia, Ulun tebe-tebes!”
Hodi nunia, sia tonu-naboot Ama Maromak.✡ Yesaya 45:23
Ita dadi fitun maksinak mak naroma raiklaran
12 Mamaluk sia mak haꞌu kadomi! Rona diꞌa-diꞌak! Hori hirak nia, baa oras haꞌu ksei iha kota Filipi, emi hanono baa haꞌu hodi tuir Kristus dalan loos. Oras neꞌe, ita faꞌe malu tiꞌan baa fatin se-seluk. Mais haꞌu kusu nebee emi harui aan moris loos, tan kalo la hanono baa Kristus mak sori emi nosi emikaan salan, emi lei haree duꞌuk. 13 Naꞌi Maromak duꞌuk mak serwisu iha emikaan neon. Nia loke dalan nebee emi bele hanono baa Nia. Nia moos foo beran nebee emi bele halo Nia neon diꞌak.
14 Emi halo saa dei, keta mamuun aan no keta toe malu. 15 Hodi nunia, emi bele neon moos no la hoo sala. Emi moris iha ema aat no ema tolek teen klaran. Mais keta tuir sia! Emi musti moris moos, tan emi neꞌe, Naꞌi Maromak oan. Emikaan moris musti naksinak natudu dalan baa sia, hanesan fitun maksinak naroma makukun.✡ Hanoin Hikar Dalan Moris 32:5 16 Kalo emi moris loos hodi halaꞌok Manfatin mak foo moris, emi atu halo haꞌu neon boot baa oras Kristus namaan aan mai nikar. Neꞌe naꞌak, haꞌu la kole butan, tan noo folin boot.
17-18 Masik haꞌu klatan mohu haꞌukaan moris dadi sera, haꞌu ksimu kodi neon diꞌak, tan kakara nebee emi bele fiar baa Kristus no halaꞌok Niakaan serwisu. [Haꞌu klatan to-tomak haꞌukaan moris neꞌe, hanesan naꞌilulik fakar mohu anggor ween iha sera fatin nodi natetu baa Naꞌi Maromak.] Emi bele neon diꞌak ho haꞌu, tan haꞌukaan kolen dadi baa sera mak folin boot.✡ Sura Renu Israꞌel 28:7
Paulus atu solok Timotius baa Filipi
19 Haꞌu kaloon nebee, la kleur ona, Naꞌi Yesus loke dalan nebee haꞌu kbele solok Timotius tone nakbiit emikaan neon. Hotu, nia atu fila mai nakbiit nikar haꞌukaan neon nodi nasara baa haꞌu nosi emikaan tuur-hariik. 20 Haꞌu la ksolok ema seluk. Haꞌu ksolok Timotius dei, tan nia mak neon ida no haꞌu. Nia moos nadomi emi tebe-tebes. 21 Nia la nuꞌu mamaluk seluk sia mak nanoin loos siakaan moris duꞌuk, toꞌo la babilan lia mak folin bodik Yesus Kristus. 22 Emi hatene tiꞌan Timotius niakaan serwisu makaꞌas. Nia serwisu no haꞌu, hanesan oan serwisu bodik aman. Nia tulun haꞌu tiꞌan baa katak Manfatin Diꞌak iha nabee dei. 23 Kalo sia nakotu tiꞌan haꞌukaan lia iha neꞌe, foin haꞌu ksolok Timotius tone. 24 Naꞌi Maromak nakbiit haꞌukaan neon naꞌak, la kleur ona, haꞌu moos bele tone karee duꞌuk emi.
Paulus atu solok fila Epafroditus baa Filipi
25 Uluk, emi solok itakaan maluk Epafroditus mai tulun haꞌu. Nia nalaꞌok Kristus Niakaan serwisu bele-bele no haꞌu, ahan nuꞌu sondadu madinas tuir siakaan ulun hakaran. Mais oras neꞌe, haꞌu kanoin musti solok fila nia, 26 tan nia beer basuk atu naree nikar emi. Nia neo-neon baa emi, tan nia natene emi rona tiꞌan haꞌak, nia noꞌi moras. 27 Tebes. Hori hirak nia, nia moras todan kreꞌis mate. Mais Naꞌi Maromak nadomi nia, hotu nadiꞌak nola nia. Naꞌi Maromak moos nadomi haꞌu, nodi nadiꞌak nola Epafroditus, nebee haꞌu keta hetak susar. 28 Tan lia nia, haꞌu kakara solok fila nia tone, nebee emi bele hasoru hikar malu hodi neon diꞌak. Nunia, foin haꞌukaan neon bele noku. 29-30 Simu nia diꞌa-diꞌak, tan nia, Kristus eman. Emi moos musti hakneter ema hotu-hotu hanesan nia, tan nia nalaꞌok Kristus Niakaan serwisu toꞌo kreꞌis mate. Nia la nakiduk kois, tan nakara tulun haꞌu nodi seluk emi. Dadi simu hikar nia hodi laran maluak.