1 Lia nuneꞌe, mamaluk sia! Ami hamaus emi, nebee moris kona baa Naꞌi Maromak neon. Ami hanorin nunia tiꞌan, emi moos tuir nunia ona. Mais tan emi dadi Naꞌi Yesus ema uma laran, ami husu nebee emi hetak harui aan tenik. 2 Emi hatene tiꞌan, lia mak ami hanorin baa emi nia hodi itakaan Naꞌin, Yesus beran. 3 Naꞌi Maromak nakara nuneꞌe: Moris moon no dook hosi lia kfoꞌer. 4 Musti bali aan duꞌuk, nebee moris moon toꞌo ema nakneter emi. 5 Keta beer aat, hanesan ema mak la natene Maromak. 6 Keta malo sala baa maluk makfiar. Keta buka sotir hosi sia. Tan Naꞌi Maromak atu kastikar lisan aat nia sia. Hori uluk, ami halore lia nia sia baa emi tiꞌan. 7 Naꞌi Maromak bolu ita atu dadi Niakaan ema mak moris moon, lahoos ema mak moris hanesan ema mak nalo lia kfoꞌer nia sia. 8 Ema mak nakur hanorin neꞌe, lahoos sakar ema raiklaran dei, mais sakar Naꞌi Maromak mak natuun Niakaan Kmalar Lulik baa emi.* Lia Yunani lia fuan iha neꞌe naꞌak “Emi musti bali ‘fatin’ duꞌuk.” Lia fuan ‘fatin’ neꞌe, bele naꞌak ‘isin’, lale, ‘isin lolon’. Mais ema balu naꞌak iha tohar neꞌe, ‘fatin’ naꞌak ‘feen’. Nodi nunia, tohar neꞌe naꞌak ‘moris moon mo okaan feen.’

9 Haꞌu lalika kakerek tenik nosi lia hadomi malu, tan Naꞌi Maromak duꞌuk nanorin lalaꞌok nia baa emi tiꞌan. 10 Ami rona haꞌak, emi hadomi mamaluk sia hotu-hotu iha rai Makedonia. Mais lia nuneꞌe, mamaluk sia! Oras neꞌe, ami husu nebee emi hetak hadomi malu tenik. 11 Harui aan, moris mamatek. Keta kahur ema lian, mais bali lian duꞌuk. Serwisu buka haan hodi liman duꞌuk. Keta haloon baa ema seluk. Lia neꞌe sia ami katak baa emi hori uluk tiꞌan. 12 Kalo emi moris nunia, emi la hatodan ema. Ema mak la fiar baa Yesus Kristus naree hahalok nunia, nanis sia dale naꞌak, “Tebes! Yesus eman neꞌe sia moris moon tebes!”

13 Mamaluk sia! Oras neꞌe, haꞌu kalore lia ida tenik baa emi, nebee emi bele hatene lia nosi ema mak mate tiꞌan. Lia mak loos nuneꞌe: Naꞌi Maromak atu nalo ema mak mate tiꞌan moris nikar. Tan lia nia, kalo Kristus eman ida mate, emi lalika susar hanesan ema mak la natene lia neꞌe. 14 Ita fiar haꞌak, Yesus mate, hotu Naꞌi Maromak nalo Nia moris nikar. Tan baa nia, ita moos bele fiar haꞌak, ema mak fiar mak mate tiꞌan, Naꞌi Maromak atu nalo sia moris nikar, hotu naklibur sia namutuk no Yesus.

15-17 Loron ikus, Naꞌi Yesus namaan aan nosi laleꞌan tuun mai raiklaran, noo lia maliak makaꞌas ida naruka. Makbukar laleꞌan ulun moos naruka nebee huu kfui. Hotu Naꞌi Yesus ema mak mate tiꞌan sia moris nikar. Sia niꞌit aan namutuk no ita mak sei moris neꞌe, saꞌe baa kaloꞌan atu simu Naꞌi Yesus namaan mai nia. Hotu, ita hotu-hotu moris ho Nia nima-nimak.✡ 1 Korintus 15:51-52

Rona diꞌa-diꞌak! Lia mak ami katak neꞌe, Naꞌi Maromak duꞌuk mak katak. 18 Tan lia nia, emi musti halaꞌok hanorin neꞌe hodi hakbiit malu neon.