4
Kɨli Pita ayɨp Jon ayɨp kɨlop dad bɨawl takaw tɨg asɨkep okok wɨdɨn mɨdup sɨŋak apɨl agɨlak
1-2 Mat 22.23, Luk 22.4, 22.52, Apo 23.8 Pita ayɨp Jon ayɨp Jisas kumɨl tɨkjakak takaw ak binɨb kɨlop agñɨleknɨŋ, bɨ God nop sɨbogep okok sek, bɨ God agnɨgep kal awl polis bɨawl okok sek, bɨ Sajusi okok sek, kɨli takaw agɨlek anɨb ak nɨgɨlak. Nɨŋɨd, binɨb ogɨnap kumɨl ma tɨkjakɨpal anɨb ak taynen takaw anɨb ak agñebil agɨl mɨlɨk nɨgɨlak. 3 Mɨlɨk nɨŋɨd, dɨ nag lɨl, mɨñɨl dugep won awl mel, tol takaw agɨl dɨ nag lep agɨlak. 4 Apo 2.41 Pen takaw agɨlek ñɨn anɨb ak, binɨb kuŋay yɨbɨl Jisas nop gos lɨnɨgɨlak. Bɨ anɨb okok apnan gɨlak nɨm anep 5,000 tek amnak.
5 Pen mɨnek bɨawl takaw tɨg asɨkep ogɨnap, Juda bɨawl ogɨnap, bɨ kɨli Mosis takaw ñu kɨl tɨkak ak nɨgtep gep ogɨnap, Jelusalem apnan gɨlak. 6 Pen Anas, ne bɨ God nop sɨbogep bɨawl yɨbɨl ak, Kayapas ak, Jon ak, Aleksada ak, Anas bɨne ogɨnap sek, kɨli ayɨp apnan gɨlak. 7 Mat 21.23, Apo 7.27 Anɨgɨl nɨg mɨdɨlaknɨŋ, Pita ayɨp, Jon ayɨp kɨlop dap nab sɨŋak lɨl agɨlak, Bɨ tob tɨmel gak ak taydɨl gel suŋ lup agɨlak? Kɨles akal dɨl, wog anɨb ak anɨgɨl gɨpil agɨlak?
8 Mat 10.19-20 Agelak, Pita God Kawnan ayɨp yek ak nɨm agak, Nɨbi bɨawl takaw tɨg asɨkep okok sek, Juda bɨawl okok sek agak. 9 Chɨl tap teplep yɨbɨl gobul agak. Pen chɨlop bɨ tob tɨmel gak anop taydɨl gel suŋ lup agɨl, agnɨgebɨm agak? 10 Apo 2.24, 3.6, 3.13-16 Nɨbi okok, Yislel binɨb mɨdupsek okok, takaw agebin ak nɨgtep gɨnɨmɨb agak. Jisas Klays bɨ Nasalet nɨb ak nop, mab bak alaŋ chɨpɨl pak tɨbɨk lem kumak ak pen, God gek tepayaŋ tɨkjakak agak. Bɨ anɨb ak nop ne nokom agnɨgol, bɨ tob tɨmel gak anɨb awl nop gek pɨsnep suŋ lek, aj tep gup agak. 11 Sng 118.22, Ais 28.16, Mat 21.42 Bɨ Jisas anɨb anop nɨm, buk Baybol kɨl tɨkɨl, takaw pal adaŋ lɨl agɨlak,
Nɨbi bɨ kal gep okok, nɨgem kab meg olap tep ma gek kelɨgɨpek ak pen, mɨñɨl kal meg nab awl ayaŋ tek puŋɨl ñɨl mɨdeb agɨl tɨkɨlak agak.
12 Mat 1.21, Apo 10.43 God ne bɨ anɨb ak nep chɨnop agak ak nɨm, nop don, ne gek God binɨb ne yonɨgabun agak. Ne nokom bɨ kasɨn gep ak, chɨnop tɨg asɨk dɨnɨmuŋ agak. Pen binɨb ogɨnap kɨlop don, kɨli gel God binɨb ne yonɨgun tek ma mɨdeb agak.
13 Pita anɨgɨl agek, bɨawl anɨb okok nɨŋɨd gos pal awl lɨl agɨlak, Bɨ omɨŋal awl sikul ma agɨlek ak pen, takaw anɨb awl ma pɨlɨkɨl monmon agebil agɨlak. Jisas ayɨp ajelɨgɨpal ak nɨm, anɨgebil agɨlak. 14 Kɨlop takaw kɨles tɨmel agɨnɨgel ak pen, bɨ tob tɨmel suŋ lak ak, bɨ omɨŋal ayɨp jak mɨdaknɨŋ, kɨlop ag gɨnɨgel tek ma lak. 15 Anɨb ak kɨli agɨlak, Ñɨli chɨnop bɨ Juda bɨawl takaw tɨg asɨkep okok kelɨgɨl, seŋayaŋ amnɨmil agɨlak. Anɨb agel, seŋ amelek, kɨli ke agnɨg agnɨg gɨl 16 Jon 11.47, Apo 3.9-10 agɨlak, Chɨn bɨ anɨb omɨŋal ak kɨlop tɨtay dɨnɨgun agɨlak? Tap mageptek ak gel, Jelusalem binɨb mɨdupsek nepal agɨlak. Anɨb ak kɨlop yepɨs gɨpil agɨl, agɨnɨgun tek ma lup agɨlak. 17 Pen Jisas tɨtay gak takaw anɨb ak, binɨb ogɨnap kɨlop abe agel nɨgɨnɨgel tek lup ak, kɨlop mel agɨnɨgun agɨlak. 18 Apo 5.28, 5.40 Anɨb agɨl, kɨlop agel apel agɨlak, Jisas yɨb nop ak kɨdek ma yɨbɨl agɨnɨmil agɨlak. Binɨb okok kɨlop kɨdek ma yɨbɨl agñɨnɨmil agɨlak.
19 Apo 5.29 Anɨb agel pen agɨlek, Chɨl God takaw nop ak kelɨgɨl, takaw nɨbop ak nɨgol, God nop tep gɨnɨgab akaŋ agɨlek? Nɨbi ke nɨgɨm agɨlek. 20 Apo 1.8, 22.15, 1 Jo 1.1-3 Pen Jisas tɨtay gak, takaw tɨtay agak ak kelɨgɨnɨgul tek ma lup agɨlek. Tap anɨb ak nɨŋɨd, binɨb okok kɨlop agñɨnɨgabul agɨlek.
21-22 Anɨb agelek, bɨawl okok kɨli gos ke nɨŋɨd, bɨ anɨb ak sub anep 40 mɨdɨl kɨdek suŋ lup ak, binɨb okok nɨŋɨd God yɨb nop dad aplanebal. Bɨ omɨŋal anɨb awl kɨlop tap olap gonɨgabun, binɨb okok kabɨyam junɨgabal agɨl, kɨlop yokɨp takaw awl agɨl, ag seŋ yokɨlak.
Binɨb Jisas nop gos lɨnɨgɨlak okok God nop agel, kɨles ñek God takaw agɨlak
23 Pita ayɨp, Jon ayɨp kɨlop anɨgɨl ag seŋ yokɨlak. Yokel, bɨ omɨŋal amɨl, Jisas binɨb ne okok kɨlop nɨŋɨd agñɨlek. Bɨ God nop sɨbogep bɨawl okok sek, Juda bɨawl okok sek, kɨli takaw tɨtɨmel agɨlak anɨb okok mɨdupsek agñɨlek. 24 Kis 20.11, Neh 9.6, Sng 146.6 Agelek nɨŋɨd, mɨdupsek God nop agɨlak, Nad bɨawl yɨbɨl, tap okok mɨdupsek kod mɨdeban agɨlak. Adekab alaŋ gɨlɨl, lum awl gɨlɨl, ñɨg solwala gɨlɨl, tap tɨtay mɨdeb okok mɨdupsek gɨlɨnak agɨlak. 25 Sng 2.1-2 Bɨlel Kawnan nad ak based chɨn Depid nop gos ñek, takaw nad ak tɨkɨl agak,
Taynen binɨb Juda mel okok mɨdupsek kabɨyam jupal agɨl tɨkak agɨlak. Binɨb okok taynen takaw aglɨl, tap tɨmel gup anɨb okok gun apal agɨl tɨkak agɨlak. 26 Bɨnonɨm man okok nɨb okok nɨb sek, bɨawl okok sek takaw ag jɨmñɨl, God ayɨp penpen gɨnɨgun agɨl, taw jɨsɨpuk gɨl mɨdebal agɨl tɨkak agɨlak. Bɨ God nop aglup ak abe ayɨp penpen gɨnɨgun agɨl mɨdebal agɨl tɨkak agɨlak.
27 Mat 27.1-2, Mak 15.1, Luk 23.1, 23.7-11, Jon 18.28-29, Apo 3.13 Based Depid, takaw agɨl tɨkak anɨb ak, nɨŋɨd yɨbɨl agɨl tɨkak agɨlak. Gapman bɨnonɨm Helod ayɨp Podiyus Paylat ayɨp, binɨb Juda mel ogɨnap, Yislel nɨb ogɨnap apɨl takaw ag adek nokom lɨlak agɨlak. Aglɨl, bɨ wog gɨñeb nad Jisas ak nop gɨ tɨmel gɨlak, man awl anɨb ak agɨlak. Jisas bɨ suŋtep yɨbɨl, Bɨ nad nop aglup ak agɨlak. 28 Apo 2.23, 3.18 Pen ned Jisas nop anɨgɨnɨgabal agɨnak ak nɨm, yaw age gɨlak, yokɨp ak anɨb ma gɨpɨlap agɨlak. 29 Apo 9.27, 13.46, 19.8, Epe 6.19 Bɨawl, mɨñɨl chɨnop takaw kɨles tɨmel yɨbɨl agebal agɨlak. Pen chɨn binɨb wog gɨñeb nad agɨlak. Chɨnop kod mɨde, chɨn ma pɨlɨkɨl, takaw nad ak binɨb okok kɨlop monmon kɨles gɨl agñɨnɨgun agɨlak. 30 Nad kɨles ge, bɨ wog gɨñeb nad Jisas, ne bɨ suŋtep yɨbɨl ak, chɨn ayɨp kod mɨdonɨmuŋ agɨlak. Mɨdɨl, binɨb tap gup okok gon suŋ lɨl, tap mageptek ogɨnap sek gɨnɨgun agɨlak.
31 Apo 2.4, 4.29, 16.26 Pen anɨgɨl takaw agjuwelak, kal yelak ak monmon tek dak. Dɨl, God Kawnan ak apɨl kɨlop bak lek, ma pɨlɨkɨl, God takaw ak monmon kɨles gɨl agñɨlak.
Binɨb tap yɨgɨlɨl ñɨtep gɨlak
32 Apo 2.44-45, 2 Ko 13.11, 1 Pi 3.8 Pen binɨb Jisas nop gos lɨnɨgɨlak anɨb okok, takaw adek nokom agɨl, gos adek nokom nɨŋɨd gɨlak. Tap kɨli tɨtay yek okok, mɨdupsek tap chɨn ke agɨl ma nɨgɨlak, tap chɨn jɨmñɨl agɨl nɨgɨlak. 33 Apo 1.8, 1.22, 2.45-47 Bɨ Jisas takaw nop dad ameb okok, takaw kɨli ak, takaw awl kɨles gɨl agelɨgɨpal, Bɨawl Jisas nop ñag lel kumɨl tɨkjakek, nop nɨgɨnok agelɨgɨpal. Pen God kɨlop mɨdupsek dɨtep yɨbɨl gɨl, gɨtep gak. 34 Apo 2.45 Kɨli olap tap ogɨnap tek dek ma yelak, mɨdupsek tap yek. Bɨ olap lum abe kal abe yek okok, kɨlop agek mani dap tawelɨgɨpal. Tawel, mani dɨl dad apɨl, 35 bɨ Jisas takaw nop dad ameb okok kɨlop ñelɨgɨpal. Kɨli pen dɨl, binɨb tap ma yek okok kɨlop bɨlok ñelɨgɨpal.
36 Apo 11.22-26, 13.2-3 Pen bɨ Lipay jɨj tɨk dad amɨl tɨkɨlak bɨ olap, yɨb ne Josep. Man ne Sayplus nɨb. Bɨ anɨb ak ne bɨ takaw sayn agɨl kɨlop agñɨtep golɨgup tek, bɨ Jisas takaw nop dad ameb okok, kɨli nop Banabas agɨlak. 37 Banabas lum ne wakay olap agek tawɨlak. Tawel, mani anɨb ak dap bɨ Jisas takaw nop dad ameb okok kɨlop ñak.
4:1-2 Mat 22.23, Luk 22.4, 22.52, Apo 23.8
4:4 Apo 2.41
4:7 Mat 21.23, Apo 7.27
4:8 Mat 10.19-20
4:10 Apo 2.24, 3.6, 3.13-16
4:11 Sng 118.22, Ais 28.16, Mat 21.42
4:12 Mat 1.21, Apo 10.43
4:16 Jon 11.47, Apo 3.9-10
4:18 Apo 5.28, 5.40
4:19 Apo 5.29
4:20 Apo 1.8, 22.15, 1 Jo 1.1-3
4:24 Kis 20.11, Neh 9.6, Sng 146.6
4:25 Sng 2.1-2
4:27 Mat 27.1-2, Mak 15.1, Luk 23.1, 23.7-11, Jon 18.28-29, Apo 3.13
4:28 Apo 2.23, 3.18
4:29 Apo 9.27, 13.46, 19.8, Epe 6.19
4:31 Apo 2.4, 4.29, 16.26
4:32 Apo 2.44-45, 2 Ko 13.11, 1 Pi 3.8
4:33 Apo 1.8, 1.22, 2.45-47
4:34 Apo 2.45
4:36 Apo 11.22-26, 13.2-3