1-3  Apo 7.58, 8.4, 9.1, 9.13, 9.21, 11.19, 22.4-5, 22.20, 26.9-11, 1 Ko 15.9, 1 Ti 1.13 Stipen nop pakel kumak anɨb ak, bɨ Sol tep kumub agak. Stipen kumek, bɨ God nop nɨŋɨd kɨdek golɨgup ogɨnap, chɨb gek chaŋ lɨlɨg dam kamɨlak. Ñɨn anɨb ak, Juda kay kɨli binɨb Jisas nop gos lɨnɨŋɨd Jelusalem yelɨgɨpal okok, kɨlop gɨ tɨmel gɨnɨg gɨlak. Sol ne kal mɨgan kɨli amɨlɨg, binɨb okok kɨlop monmon pak lɨpɨg dam nag lolɨgup. Anɨgek, ogɨnap pɨlɨk, Samaliya plopens amɨl, ogɨnap pɨlɨk Judiya plopens tɨgoŋ okok amnɨlak. Bɨ Jisas takaw nop dad ameb anep umɨgan ak, kɨli pen Jelusalem yelak.

4  Mat 10.23, Apo 6.5, 11.19 Binɨb Jisas nop gos lɨnɨgɨlak okok, pɨlɨk am wakay okok yelak. Mɨdɨl, binɨb anɨb okok kɨlop Jisas takaw tep ak agñɨlak. 5 Bɨ Pilip* Pilip bɨ anep kugul bɨ olap, kɨlop tap yɨgɨlep wog adek anɨb ak aglɨlak. Aposel sapta 6 nɨgɨnɨmɨn. pen, am Samaliya plopens yek. Mɨdɨl, binɨb okok kɨlop agak, Bɨ God nop aglup ak, ne owup agak. 6 Agñɨlɨg, tap mageptek okok gak. Takaw ne tɨtay agak ak, tɨmud pak nɨgtep yɨbɨl gɨlak. 7  Mat 10.1, Mak 16.17 Binɨb kuŋay kɨcheki sek yelak okok, tap anɨb okok agek, wal agɨlɨg seŋ amnɨlak. Binɨb ñɨn tob kumak okok sek, binɨb ñɨn tob tɨmel gak okok sek gek, suŋ lak. 8 Anɨgek, binɨb mɨdupsek mɨñmɨñ yɨbɨl gɨlak.

9 Pen man awl anɨb ak, bɨ olap yolɨgup, yɨb ne Saymon. Ne kuj gɨl, yepɨs agɨl agolɨgup, Yad bɨawl agolɨgup. Samaliya binɨb kɨli nɨŋɨd gos kuŋay yɨbɨl nɨgelɨgɨpal. 10 Binɨb yɨb yek okok, binɨb yɨb ma yek okok, kɨli mɨdupsek Saymon takaw agolɨgup tek nep nɨgolɨgup. Nɨŋɨd anɨb agolɨgup, Bɨ kɨles tɨmel anɨb awl, bɨ olap ke mel, nɨm bɨawl anep agolɨgup. 11 Saymon ne kuj gɨl, tap mageptek okok pel gaknɨŋ, binɨb okok gos kuŋay nɨŋɨd, takaw agak tek nep nɨgelɨgɨpal. 12 Kɨdek pen Pilip apɨl, ne God binɨb dɨl kɨlop kod yenɨgab takaw tep ak kɨlop agñɨlɨg, Jisas nɨm, ne Bɨawl ke yɨbɨl pel kod mɨdobun ak agak. Anɨb agek, binbɨ Jisas nop gos lɨnɨŋɨd ñɨg pakɨlak. 13 Saymon abe, Jisas nop gos lɨnɨŋɨd ñɨg pakak. Pakɨl, Pilip nop nep kɨdek golɨgup. Kɨdek gek, ne tap mageptek okok kuŋay yɨbɨl gek nɨŋɨd, Saymon gos pal yɨbɨl lolɨgup.

14 Bɨ Jisas takaw nop dad ameb anep umɨgan ak, Jelusalem mɨdel, kɨlop takaw olap agɨlak, Samaliya binɨb God takaw nepal agɨlak. Anɨb agelak nɨŋɨd, Pita ayɨp, Jon ayɨp kɨlop agyokel, Samaliya amnɨlek. 15-16  Mat 28.19, Apo 2.38, 10.48, 19.2 Amɨl nɨgɨlek, binɨb Jisas nop gos lɨnɨŋɨd ñɨg pakɨlak ak pen, God Kawnan ne ak ma dɨlak. Nɨŋɨd, God nop agnɨŋɨd agɨlek, Binɨb okol Kawnan nad ak kɨlop ñan agɨlek. 17  Apo 6.6, 19.6, Hib 6.2 Anɨb agɨl kɨlop dɨ mɨdel, God Kawnan ne ak kɨlop keke yokak.

18 Kɨlimɨŋal anɨgɨl kɨlop dɨ mɨdel, God Kawnan ne ak binɨb okok kɨlop yokak ak, Saymon nɨŋɨd, yad abe gɨnɨm agɨl, kɨlopmɨŋal mani yomɨlɨg agak, 19 God ñɨlop kod mɨdaknɨŋ, binɨb okok yokɨp dɨ mɨdel, Kawnan ne kɨlop yɨl amub agak. Anɨb ak ñɨlop tawɨl yad abe gɨnɨm agak.

20  Mat 10.8, Apo 2.38, 10.45 Anɨb agek, Pita agak, God Kawnan ne ak ñub anɨb ak, taynen tawnɨg geban agak? Mani anɨb ak nak ayɨp kuy gɨnɨmuŋ agak. 21  Sng 78.37 Wog chɨl gɨpul ak nak ayɨp mel agak. Gos nad nepan ak, God nɨgek tep ma gup agak. 22-23  Dan 4.27, 2 Ti 2.25, Hib 12.15 Yad nepin, gos tɨmel nepan anɨb ak, nep nag lɨl wos gup agak. Nad tap si tap tɨmel gɨpin ak taynen anɨgɨpin agɨl kelɨgɨnɨmɨn agak. Mɨlɨk nepan ak kelɨgɨl, God nop nokom gos nɨŋɨd agnɨgenɨgaban, tɨmel yɨbɨl gɨpan anɨb okok tɨg walɨg gɨyokɨnɨgab agak. 24  Kis 8.8, Nam 21.7, 1 Kin 13.6, Jem 5.16 Agek Saymon agak, Ñɨli Bɨawl anop agnɨgel, tap yɨp gɨnɨmuŋ agɨl agebil anɨb ak ma gɨnɨmuŋ agak.

25 Pen Pita ayɨp, Jon ayɨp binɨb okok kɨlop, Jisas chɨlop tɨtay gak takaw ak agñɨlek. Agñɨl, adɨkɨd Jelusalem amnɨg, kanɨb nab okok amɨlɨg, Samaliya binɨb wakay ogɨnap kɨlop, Jisas takaw teplep ak agñɨlɨg amnɨlek.

26 Pen Bɨawl ensel ne olap apɨl, Pilip nop agak, Tɨkjakɨl, Jelusalem nɨb taun Gasa abal kanɨb pal ak amnɨmɨn agak. Kanɨb anɨb ak, man nep binɨb ma yelak nab okok yek. 27  Ais 56.3-7, Sef 3.10, Jon 12.20 Agek, Pilip kanɨb agak pal anɨb ak amɨl nɨgak, bɨ Yitiyopiya nɨb olap amek. Bɨ anɨb ak ne bɨawl olap, binawl man Yitiyopiya kod mɨdep ak nop wog gɨlɨg, mani nop kod yolɨgup. Pen ne Jelusalem amɨl, God nop agnɨg mɨdɨl, 28 adɨkɨd man Yitiyopiya amnak. Amnɨg, chag hos lɨpɨg dad ajup tap bad adek ak besɨgɨl, buk Baybol Aysaya kɨl tɨkak ak dɨl, nɨgɨlɨg amnak.

29 Pen God Kawnan ak Pilip nop agak, Chag hos tap bad lɨpɨg dad ameb ak bak sɨŋak amɨl, ayɨp amnɨmil agak. 30 Agek, kasek Pilip agak tek amɨl nɨgak, bɨawl Yitiyopiya nɨb anɨb ak, bɨ God gos ñek agñeb Aysaya mɨj kɨl tɨkak ak, nɨgɨlɨg amek. Pilip nɨŋɨd anɨb agak, Mɨj nɨgɨlɨg ameban ak, takaw jɨj ak nɨgeban akaŋ mel agak?

31  Jon 16.13 Agek agak, Binɨb ogɨnap yɨp takaw anɨb ak agñel nɨŋɨd tek, nɨgɨnɨm agak. Anɨb agɨl, Pilip nop agak, Ap adek awl besɨge amnul agak. Agek, am adek anɨb ak besɨgak. 32  Ais 53.7-8 Pen buk Baybol Aysaya kɨl tɨkak anɨb ak agak,

34 Aysaya takaw agɨl tɨkak anɨb ak nɨŋɨd, bɨawl Yitiyopiya nɨb ak ne Pilip nop agak, Bɨ God gos ñek agñeb ak, ne anop agak? Ne ke akaŋ, bɨ olap nop agak? 35  Luk 24.27, Apo 18.28 Agek, Pilip ne bɨ anɨb anop, Aysaya takaw tɨkak jɨj anɨb ak ned agɨl, ag ag Jisas nop takaw teplep ak agñɨtep gak.

36-37  Apo 10.47 Pen anɨgɨl takaw ag dad amɨlɨg nɨgɨlek, ñɨg olap yek. Bɨ anɨb ak Pilip nop agnɨŋɨd agak, Ñɨg mɨdeb awl, yɨp ñɨg pakñɨnɨgaban agak? 38 Agɨl, bɨ anɨb ak bɨ chag hos dad ameb nop agek nɨŋɨd, chag hos ak yek. Pen ñɨli ñɨg ayaŋ amɨl, Pilip bɨ anɨb anop ñɨg pakñak. 39  1 Kin 18.12, 2 Kin 2.16, Ese 3.12-14 Ñɨg pakñɨl owleknɨŋ, God Kawnan ak Pilip nop dad wakay olap amek, bɨ anɨb ak ne Pilip nop ma nɨgak. Ne pen mɨñmɨñ gɨlɨg man Yitiyopiya amnak. 40  Apo 21.8 Pen God Kawnan ak Pilip nop dam taun Asdod lek, Pilip binɨb man anɨb okok yelak okok kɨlop Jisas takaw teplep ak agñɨlɨg, gɨ dam dam taun Sisaliya amjakak.