atokilaño mb’am-pivolañam-bavako

o ravembia’ areoo.

2 Ho sokafeko ty vavako handrazaña’e:

ho lañoneko razan-­tsaontsy

miheotse boak’an-kaehae’e;

3 o jinanjin-tika naho fohin-tikañe vaho natalilin-droae aman-tikañeo.

4 Aa le tsy haetantika amo ana’ iareoo,

fa hatalilin-tika amo tariratse ho avio

ty fandrengeañe Iehovà, naho ty haozara’e vaho o fitoloña’e

ra’elahy nifonire’eo.

5 Fa noriza’e e Iakobe ao ty taroñe naho najado’e e Israele ao t’i Hake

linili’e aman-droaen-tikañey,

hañanara’ iareo o ana’ iareo,

6 hampahafohina’ iareo

ty tariratse ho avy,

naho o ajaja mbe hasamakeo,

hitroara’ iareo hañoke o ana’eo,

7 soa te ho aman’Añahare ty fatokisa’e, vaho tsy handikofa’ iareo

o fitoloñan’ Añahareo,

fe hambena’ iereo o lili’eo;

8 naho tsy hitsikombe o roae’ iareoo; tariratse mitangingìñe naho miola,

tariratse tsy nampifahatse troke,

tsy nigahiñe aman’ Añahare ty arofo’e.

9 Nimpitam-pale ninday fale

o ana’ i Efraimeo

f’ie niamboho tañ’ andro’ i hotakotakey.

10 Tsy nambena’ iareo

i fañinan’ Añaharey,

vaho nifoneñe tsy hañavelo amy Tsara’ey.

11 Nihaliño’ iareo o fitoloña’eo—

o halatsàñe naboa’e am’ iareoo,

12 o raha tsitantane nanoe’e añatrefan-

droae’ iareo e Mitsraimeo, an-tete’ i Tsòañe ao.

13 Finatsi’e i riakey naho nampisorohe’e mb’eo iereo!

najoha’e hoe votry i ranoy.

14 Le niaoloa’e an-drahoñe iereo

te antoandro,

naho an-kazavàñ’afo te haleñe

am-para’ te niporea.

15 Finoi’e o vato am-patrañeo,

finaha’e rano bey manahake i an-dalekey;

16 Nampitotsaha’e torahañe ty lamilamy vaho nampikararaha’e rano hoe oñe.

17 Fe mbe nandilara’ iareo,

niola amy Abo Tiañey

am-babangoañ’ añe.

18 Nitsohe’ iereo an-troke

t’i Andrianañahare,

nihalaly mahakama

ty amy hadrao’iareo.

19 Toe, nandrabio’ iareo

t’i Andrianañahare, ami’ty hoe:

Mahafañalankañe fandambañañe

an-dratraratra ao hao

t’i Andrianañahare,

20 Eka, finofo’e i vato

nampidoandoan-dranoy,

vaho nampanganahanae’e o torahañeo.

Aa vaho hahafanjotsoa’e mofo ka?

he ho fahana’e hena hao ondati’eo?

21 Aa ie jinaji’ Iehovà,

le niforoforo ty fifombo’e,

naho namiañañe afo t’Iakobe,

vaho nionjoñe am’ Israele ty haviñerañe,

22 Amy t’ie tsy natoky an’Andrianañahare,

vaho tsy niatoa’ iareo ty fandrombaha’e;

23 Fe linili’e o rahoñe amboneo,

naho sinoka’e o lalambein-dindìñeo,

24 nampikojojoaha’e mane ho kamae’iereo;

nanjotsoa’e ampemban-dikerañe.

25 Nikama ty mofom-panalolahy ondatio! nampidobaña’e mahakama nahaeneñe!

26 Nampikofaohe’e an-dikerañe ey

ty tiok’ atiñanañe vaho

nitehafe’e an-­kaozarañe i tiok’ atimoy.

27 Nampidoañe’e am’ iareo

ty hena hoe lemboke,

voroñe amañ’elatse

mira amo fasen-driakeo!

28 nampivotrahe’e aivo’

ty tobe’e ao,

niarikoboñe i Toem-pimoneña’ey.

29 Aa le nikama iareo vaho nianjañe

amy te nanjotsoa’e ty hasiji’ iareo.

30 Ie mboe nibòro ty drao’ iareo,

mbe tam-palie’ iareo ao i henay,

31 le nihelofe’ ty haviñeran’ Añahare

navetra’e o nanjofak’ am’iereoo,

vaho nampihotrahe’e o jinoboñ’ Israeleo.

32 Ie amy zay iaby, mbe nitolon-kakeo iereo, tsy niantoke

o fitoloña’e fanjakao.

33 Aa le nampigadoña’e an-kamodoañe

ty andro’ iareo,

naho an-­kebahebake ty tao’ iareo.

34 Ie zinevo’e iereo, naho nipay aze,

nisoloho vaho nitsoeke

an’Andrianañahare,

35 le nahatiahy te lamilami’ iareo

t’i Andrianamboatse,

naho t’ie Mpijeba’ iareo

i Andrianañaharen-dindimoneñey.

36 Fe kinabea’ iareo am-palie;

vaho nandañitse am-pameleke.

37 Toe tsy nifahatse ama’e o arofo’ iareoo,

naho tsy nigahiñe amy fañìna’ey.

38 Fe amy fitretreza’ey,

le hinaha’e o hakeo’ iareoo,

naho tsy rinotsa’e;

beteke natoli’e ty haviñera’e,

vaho tsy fonga nitroboa’e o fifombo’eo !

39 Nitiahi’e te nofotse avao iareo,

tioke mihelañe naho tsy mibalike.

40 Impire hao ty niodia’ iareo

am-patrambey añe,

vaho nampioje’Aze an-dratraratra añe?

41 Eka, niamboho naho nitsok’ an’Andrianañahare iereo,

vaho nanigike i Masi’ Israeley

42 Tsy nitiahi’ iereo ty fità’e,

i andro nijebaña’e iareo

amy rafelahiy,

43 Ie nampipoha’e e Mitsraime añe

o vilo’eo naho

an-tete’ i Tsòañe ao o halatsà’eo.

44 Nafote’e ho lio o saka’ iareoo,

vaho tsy nimete kamaeñe

o toraha’ iareoo.

45 Nañiraha’e laletse nifamorohotse,

namotseke, naho sahoñe nandrotsake.

46 Natolo’e amo oletseo

ty havokara’ iareo,

amo valalao ty tolim-pitoloña’ iareo.

47 Rinotsa’e ami’ty havandra

ty vahe’ iareo, naho

an-drano-panala o sakoa’ iareoo.

48 Nengae’e amy havandray

o añombe’ iareoo,

vaho an-kelatse nibelabela

o mpirai-tro’ iareoo.

49 Nahitri’e am’iereo ty fiforoforoa’e;

fifomboañe naho haviñerañe vaho hankàñe; firimboñan’ anjely mpandrotsake.

50 Nampimirae’e lalañe i haviñera’ey;

tsy navotso’e am-pihomahañe

ty fiai’iareo,

fa napo’e ho zamanen-kiria

ty havelo’ iareo

51 Binaibai’e ze hene tañoloñoloña’

i Mitsraime, ty lohan-kaozara’iareo

an-kiboho’ i Kame ao.

52 Nonjone’e hoe añondry ondati’eo;

vaho niaoloa’e mb’am-babangoañe añe hoe lia-raike.

53 Nindese’e tsy nolañeñe,

le tsy nihembañe iereo,

vaho nampiopoe’ i riakey o rafelahio.

54 Nindese’e mb’an-tane’e miavake mb’eo, sikala’ami’ty vohitse

vinilim-pità’e havana toy.

55 Rinoa’e aolo’ iareo ka o kilakila’ndatio;

le zinara’e an-taly ty lova’ iareo,

vaho nampitobea’e amo akiba’

iareoo o fifokoa’ Israeleo.

56 F’ie nangala-pañahy naho niola aman’Añahare Andindimoneñe, vaho tsy nambena’ iereo o taro’eo;

57 Te mone niba­lintoa naho nañorike

ty tsy fatokisan-droae’ iareo;

niolake hoe fale mibatriotse.

58 Ie nikai-jaka ama’e

amo tamboho’ iareo;

vaho nampamarahy aze

amo raham-pahasive’iareoo.

59 Nahajanjiñe t’i Andrianañahare

le nifombo vaho niheje’e vintañe t’Israele.

60 Le naforintse’e ty kivoho’e e Silo ao, i akiba nanoe’e

himoneña’e añivo’ondatioy.

61 Nasese’e mb’ am-pandrohizañe

añe ty haozara’e,

le am-pità’ o rafelahio ty enge’e.

62 Natolo’e ami’ty fibara ka ondati’eo,

naha-fiforoforo Aze i lova’ey.

63 Nabotse’ ty afo o ajalahi’eo;

naho tsy nanan-tsabo haonjoñe

o somondrara’eo.

64 Nampikorovohem-pibara

o mpisoro’ iareoo,

naho tsy ­nahafandala o remavoi’ iareoo.

65 Nivañoñe amy zao t’i Talè

hoe nirotse,

manahake ty fanalolahy niopoen-divay.

66 Nampipolie’e an-dafa o rafelahi’eo,

le nametsaha’e hasalarañe tsy modo

kitro katroke.

67 Mbore nifarie’e ty kivoho’ Iosefe;

le tsy jinobo’e ty tarira’ i Efraime.

68 Fe ginene’e ty fifokoa’ Iehodà,

i vohy Tsiône nikokoa’ey.

69 Rinanji’e hoe o haboañeo

i toe’e miavakey,

manahake ty tane naore’e ho nainai’e

tsy ho modo toy.

70 Jinobo’e ka t’i Davide mpitoro’e,

rinambe’e amo golobon’añondrio.

71 Boak’ am-piarahañe o añondry

mampinonoo ty nendesa’e aze

hiaraha’e o tiri’ Iakobe ondati’eo,

naho Israele lova’ey

72 Nifahana’e añ’ arofo-vañonañe le niaoloa’e am-pitàñe mahimbañe.