3
1 Modo zay le nanoka-palie t’Iobe namatse i andro’ey, 2 hoe ty nilañone’ Iobe:
3 Ehe te ho mongoreñe
ty andro nahatoly ahiko,
naho ty haleñe nanoeñe ty hoe:
Inao, niareñe lahilahy.
4 Ehe te ho ieñe i andro zay;
lonike te tsy ho vazohon’ Añahare
boak’ ambone ao,
vaho tsy hipisaña’ ty hazavàñe.
5 Ehe t’ie ho tsepahe’ ty hamoromoroñañe naho ty talinjon-kavilasy;
lonike te hitozòhan-drahoñe;
ee te hampirevendreveñe aze
ze fonga mahamainten-gero’ i àndroy
6 Le i haleñe zay:
hiambotrahan-kamoromoroñañe,
tsy hitrao-pirebeke
amo andro’ i taoñeio;
tsy hizilik’ ami’ty ia’ o volañeo.
7 Hete! ehe ho beitsiterake i haleñe zay,
tsy himoaham-peon-kafaleañe.
8 Ee te hamatse aze
o mpamoiñ’ androo,
o veka’e hampibarakaoke i fañaneñeio,
9 Ho maieñe abey o vasiañe am-palipalitsieñeo:
angao re hipay hazavàñe fa tsy hahatrea;
ee t’ie tsy ho sambae’ ty holimaso’ i maraiñey;
10 amy te tsy narindri’e i lalan-koviñey,
naho tsy nakafi’e amo masokoo
ty hasotriañe.
11 Ino ty tsy nahasimb’ ahy an-koviñe ao? Akore te tsy namoeako fiay
te niboloañe?
12 Ino ty nandrambesa’ o ongotseo ahiko? naho o fatroa ninonoakoo?
13 Ie ho nihity ampitsiñañe ao;
ho niroro naho nitofa avao,
14 mindre amo mpanjakao
naho o mpisafiri’ ty tane toio,
o mamboatse hakoahañe ho am-bata’eo;
15 naho o ana-donak’
amam-bolamenao,
o mameno akiba am-bolafotio:
16 hera ho nanahake ty tsi-ambolañe naetake,
anak’ ajaja niboloañe
mboe lia’e tsy nahatrea hazavàñe.
17 Ao ty fitroara’ o lo-tserekeo
amo firohandroha’eo;
ao ka ty fitofà’ o màmakeo.
18 Mitraok’ am-pierañerañañe
o mpirohio,
tsy mahajanjiñe ty fiarañanaña’
i mpamorekekey.
19 Ao ty bey naho ty kede:
vaho votsotse amy talè’ey ty ondevo.
20 Ino ty añomezan-kazavàñe ty misotry,
naho ty haveloñe amo mafaitse añ’ova’eo?
21 ze mitama hihomake, fe tsy avy,
ie tsikaraheñe mandikoatse o vara mietakeo;
22 o mandia taroba naho mirebeke
t’ie nahatendreke kiborio?
23 [Ino ty anoloran-kazavàñe]
amy t’indaty nietahan-dalañe,
ie nigoloboñen’Añahare?
24 Misolo ty fihinanako ty fiselekaiñako,
vaho midoañe hoe rano ty fitoreoko.
25 Amy te mifetsak’ amako
o mampangebahebak’ ahikoo,
naho mivovo amako i ihembañakoy,
26 tsy mierañeran-draho, tsy mipendreñe, tsy mitsiñe
fa pok’eo ty hekoheko.
DRAFT VERSION