1 Iakobe, fetrek’oron’ Añahare naho i Talè Iesoà Norizañey,

Ho amo foko folo ro’amby miparaitake an-tsese-tane añeo: Talilio areo.

2 Ee t’ie hatao ho hafaleañe pea, ry longo naho mizo fitsohañe ankafankafa, 3 fohiñe te minday fahaliñisañe ty fitsohañe o fatokisa’ areoo. 4 Le apoho ho heneke i fahaliñisañey, soa t’ie ho vañoñe naho fonitse tsy hipay ndra inoñ’ inoñe.

5 Aa naho ama’ areo ty mipay hilala, soa re te hihalaly aman’ Añahare, fa hene atarìha’e tsy aman-tìñe, vaho hitolorañe. 6 Ie mihalaly, le am-patokisañe tsy mifejofejo, fa am-panahafeñe ami’ty onjan-driak’ asiotsion-tioke, mivali­taboake mb’etia mb’eroa, ty mitroetroe am-patokisañe, 7 Ee te tsy hitamà handrambe ndra inoñ’inoñe amy Talè indatiy. 8 Maletroletro amy ze fonga sata’e ty milolohe vatavo roe.

9 Ehe te hirenge ami’ty halohà’e ty longo trentrañe; 10 le amy fañivañ’ azey i mpañalealey, ie ­himosaoñe manahake o voñen’ ahetseo. 11 Ie manjirik’ an-katrovòha’e reketse tio-mae i àndroy, le miheatse o ahetseo, mihintsañe o voñe’eo vaho mikò-mavo ty hasoa-vinta’e. Hoe zay ty hiforejejea’ ty mpañaleale amo fitoloña’eo.

12 Haha t’indaty mahafeake fitsohañe, fa ie ventèñe ro handrambe i sabakan-kaveloñe nampitamà’ i Talè o mpikoko azeoy. 13 Aa ie zizieñe t’indaty, ee te tsy hanoe’e ty hoe: Azizin’ Añahare raho. Amy te tsy mete zizien-draty t’i Andrianañahare vaho tsy zizie’e t’ondaty; 14 f’ie songa zizieñe te kozozote’ o drao raty manigìk’ azeo. 15 Ie miareñe i hasiji’ey le mitoly hakeo; ie añoñ’ay i tahiñey le mampikoromake. 16 Mitaoa tsy ho fitaheñe ry longo sarotse.

17 Boak’ ambone añe iaby ze raha soa natolotse naho ze falalàñe, mizotso hirik’ aman-dRaen-kazavàñe; ie tsy mihotike, tsy an-kaieñe te mihodiñe* Mal 3:6. 18 An-satri’e ty nampiareña’e an-tika ami’ty tsara to, ho karazan-doha-voa amo namboare’eo.

19 Aa le soa ry longoko sarotseo te songa havitrik’ am-pi­tsendreñañe naho malea an-tsaontsy vaho malaoñe an-kaviñerañe, 20 amy te tsy mitoloñe ami’ty havantañan’ Añahare ty haboseha’ ondaty. 21 Apoho iaby arè ze haleorañe naho haratiañe ila’e, vaho rambeso an-trentram-po i tsara tinongy† Mat 13:4-23 maharombake ty fiai’ areoy.

22 Toloño i tsaray, le ko mijanjiñe avao‡ Mat 7:24-27, Lke 6:46-49, 8:21, Rom 2:13, Heb 4:11, Ben 22:14 hamañahy vatañe. 23 Naho mpijanjin-tsara t’indaty, fa tsy mitoloñe, le ampanahafeñe amy t’indaty mihetsoro laharañe. 24 Ie mahaisa-batañe naho mienga, ro mañaliño i vintañe nioni’e anianiy. 25 Fe ze mibiribiry i Hake famotsorañe hiringiri’ey§ Iak 2:12, naho mañambeñe aze, tsy manao fijanjiñam-bei-areke, fa mpifanehak’ amy fitoloñañey, ro tahieñe amo sata’eo.

26 Naho eo ty mieva ho mpitalaho, fa tsy vahora’e i famele’ey le mamañahy troke, vaho kafoake o fitalahoa’eo. 27 Zao ty fitalahoañe hiringiri’e tsy aman-kila añatrefan’ Añahare Rae: le ty fiti­lihañe bode-rae naho vantotse amo fisotria’eo, vaho ty fifoneñañe tsy ho pepoe’ ty voatse toy.