1 Tsoehe’ o tsy nañontane Ahio raho,

nitendreke o tsy nipay Ahikoo;

Le nataoko ty hoe:

Intoy raho, Intoy raho;

ami’ty fifeheañe tsy tokaveñe

ami’ty añarako.

2 Fa nañity tañañe lomoñandro raho

am’ondaty mañarinjeñeo,

o mijelanjelañe an-dalañe tsy mahasoao,

mañorike ty fitsakorea’ iareo avao;

3 Ondaty mikai-jaka an-daharako

nainai’eo, ie manao soroñe

an-goloboñe ao, vaho mañemboke

ambone birike eo;

4 O mpitozòke an-kibory ao,

naho mañialo añ’etake ao;

o milintseñe henan-dambo* Oni: Ies 66:17,

vaho ron-draha veta

am-pinga’eo.

5 Ie manao ty hoe: Mijohaña ey rehe,

ko mitotoke amako,

amy te masiñe te ama’o raho;

hatoeñe añ’oroko ao iereo,

afo miforehetse lomoñandro.

6 Hehe t’ie sinokitse aoloko eo,

tsy hianjiñe raho ampara’ te hondroheko, eka, havahako añ’araña’ iareo ao

7 o hakeo’ areoo,

mitraoke amo tahin-droae’ areoo,

hoe t’Iehovà,

ie nibanabana an-kaboañe ey,

naho niteratera ahy amo vohitseo;

le haranako añ’araña’ iareo hey

ty fitoloña’ iareo.

8 Hoe t’i Iehovà:

Manahake te zoeñe ami’ty

angazora’e ao ty ranom-baloboke,

le hoe ty saontsy: Ko joieñe, fa aman-tata;

zay ka ty hanoeko ty amo mpitorokoo,

fa tsy ho fonga rotsaheko.

9 Fa hampiakareko am’ Iakobe ty tiry,

naho haboako am’ Iehodà

ty mpandova o vohikoo;

le handova aze o jinobokoo,

vaho himoneñe ao o mpitorokoo.

10 Ho golobon-dia-raike t’i Sarone,

le ho fandream-piray troke

ty vavatane’ i Akore† Akore: tolon-tsotry,

ho a ondaty mipay Ahikoo.

11 Fe, ry mpitsambolitioke am’Iehovà naho mandikoke i vohiko miavakeio,

naho mañalankañe kitrelim-

pitahiañe, vaho mampilaro divay

am-pañaranañe pea ho ami’ty vintañe,

12 Hoireko ho am-pibara nahareo,

fonga hitsin­goro am-pizamanañe;

amy te nitokaveko, fe tsy nanoiñe,

le tsy nihaoñe’ areo t’ie nitaroñe;

te mone nanoe’areo ze raty a masoko ao,

jinobo’ areo ty tsy maha-fale Ahiko.

13 Aa le hoe t’i Talè, Iehovà:

Hikama o mpitorokoo,

fe ho kerè nahareo;

hinoñe o mpitorokoo,

fe haran-drano nahareo;

hirebeke o mpitorokoo,

fe ho salatse nahareo;

14 Eka hisabo ami’ty hafalean-tro’e

o mpitorokoo,

f’ie hirovetse am-pioremeñan’arofo,

naho hangoihoy ami’ty fandalàn-troke.

15 Hapo’ areo ho fatse amo jinobokoo ty añara’ areo:

zay ty hanjamana’ i Talè, Iehovà azo;

fa hanoe’e tahinañe hafa o mpitoro’eo.

16 Aa le hitata aman’ Añaharen-katò

ze hitata vatañe an-tane atoy;

le hifanta aman’Añaharen-katò

ze hifanta an-tane atoy;

amy te añe o hasotriañe taoloo,

fa naetake amo masokoo.

17 Ingo, mandranjy likerañe vao

naho tane vao raho;

naho tsy ho tiahy ka o raha taoloo,

vaho tsy ho tohinem-betsevetse.

18 Aa le mifalea naho mirebeha nainai’e

amy hitseneakoy;

ingo, hamboareko firebehañe t’Ierosalaime

naho hafaleañe ondati’eo.

19 Le hifaleako t’Ierosalaime,

naho hitrao-pirebeke am’ondatikoo;

vaho tsy ho janjiñeñe ama’e ka

ty feom-pangololoihañe,

naho ty feom-pirovetañe.

20 Tsy eo ty anak’ajaja

tsy hahatrats’ andro,

ndra ty ondati-bey tsy ho eneñe andro;

le hatao tora’e ty mihomake t’ie zato taoñe,

vaho hatao fokom-patse aman-

kakeo ze tsy mahatratse ty hazato tao’e.

21 Handranjy anjomba iereo,

naho himoneña’e;

hambole an-tanem-bahe iereo

vaho hikama amo voa’eo.

22 Ie tsy hamboatse, hitoboha’ ty ila’e

vaho tsy hitongy, habotse’ ty hafa;

fa ho mira ami’ty andron-katae

ty andro’ ondatikoo,

ho losore’ o jinobokoo havelo

o satam-pità’iareoo.

23 Tsy hifanehake ami’ty fianto iereo,

tsy hisamake ho an-kankàñe,

fa ho tahie’ Iehovà o tabiri’ iereoo,

naho o tarira’ iareoo.

24 Ie amy zay, aolo’ te hikanjy iereo,

le hanoiñe raho; ie mbe misaontsy,

le fa nahatsanon-dRaho.

25 Hitrao-pihinañe ty farasy

naho ty añondry,

hihinañ’ahetse manahake ty añombe o lionao,

le deboke ty liñe ’ o mereñeo

f’ie tsy hijoy, tsy hanao raty ndra

aia’aia am-bohiko masiñ’ ao,

hoe t’Iehovà.