1 oJanjiño zao, ry anjomba’ Iakobe,

ie tokaveñe ami’ty tahina’ Israele,

ry niboak’ ami’ty figoangoa’ Iehodà;

o mifanta ami’ty tahina’ Iehovà

naho mitalily i Andrianañahare’ Israeleo, fe tsy an-katò,

tsy an-kavantañañe.

2 Ie manao ho mpiamy rova miavakey, naho mpiato aman’ Añahare’ Israele,

Iehovà’ i Màroy ty tahina’e.

3 Fa nitaroñeko haehae o raha taoloo;

eka fa nionjoñe boak’am-bavako ao,

nitaroñeko le tsipaepae’e te nifetsake;

4 Amy te napotako

t’ie mitangingìñe,

naho viñe ty tali-bozìn-kàto’o,

Vaho torisìke ty lahara’o;

5 Aa le nivolañako boake taolo añe,

ie mbe tsy nitondroke le nitaroñako,

tsy mone hatao’o ty hoe;

Nihenefa’ i hazomangakoy,

naho i sare pinateko an-kataey,

vaho, i raha natranakoy

ty nandily zay.

6 F’ie nahajanjiñe,

heheke iaby o raha zao:

aa vaho tsy ho taroñe’ areo?

F’ie nitaroñeko raha vao henaneo,

raha mietake mbe tsy nifohi’o.

7 Nifonireñe henaneo, fa tsy haehae,

tsy nijanjiña’o taolo’ ty andro toy,

tsy mone hatao’o ty hoe t’ie nifanta’o.

8 Eka, tsy jinanji’o tsy napota’o;

toe tsy nisokake o ravembia’oo

haehae zay;

fe napotako t’ie hikabo-draha,

ihe natao mpiola boak’ an-koviñe ao.

9 Aa le ty añarako ty hampihankàñe

o fifombokoo,

i fandrengeañe ahiy ty ifoneñako,

tsy mone haitoako rehe.

10 Ie hinasohasoko, fa tsy hoe volafoty;

nitsoheko an-toñan-kaloviloviañe ao* Its 8:2-16.

11 Zaho, eka zaho, ty hanao zay;

fa akore te ho tivaeñe ty añarako?

toe tsy hatoloko ami’ty ila’e o engekoo.

12 Haoño raho ry Iakobe,

ry Israele kinanjiko;

Zaho ro Ie, Zaho ty fifotora’e,

naho Zaho ty figadoña’e.

13 Eka, nandaharen-tañako

ty faha’ ty tane toy,

nilamahen-tañako havana o likerañeo;

ie tokavako, mitrao-piongake.

14 Mitontoña, ie iaby, vaho mijanjiña:

ia am’ iereo ty nitsey o raha zao?

Hanao ty satrin-arofo’e e Bavele añe

t’i kokoa’ Iehovà,

ie hisenge ty sira’e amo nte-Kasdio.

15 Zaho le Zaho avao ty nivolañe,

eka Zaho ty nitoka aze,

Zaho ty nanese aze,

Ie ty hampiraorao o lala’eo.

16 Mitotoha amako le janjiño:

Boak’ am-baloha’e raho

tsy nivolañe añ’etake;

ie vaho namoroñe le tao raho;

ie amy zao fa nañirak’ ahy

naho i Arofo’ey t’Iehovà Talè

17 Hoe t’Iehovà, Mpijebañe azo,

t’i Masi’ Israele;

Zaho Iehovà, Andrianañahare’o,

I mpañòke azo ho ami’ty hasoa’oy,

I mpiaolo azo an-dalan-kombà’oy.

18 Naho ho nihaoñe’ areo o lilikoo!

le ho nanahake o oñeo ty fierañeraña’o,

vaho hoe onjan-driake ty havantaña’o.

19 Le ho nira amo faseñeo o tiri’oo,

o tariram-pañova’oo

ami’ty hamaro’ ty haminjilita’e;

naho tsy napitsoke

ndra naitoañe aoloko ka ty tahina’e.

20 Iakaro i Bavele,

Ivoratsaho o nte-Kasdio;

am-peo-pisaboañe, tseizo, pazapazaho, koiho pak’ añ’olo’ ty tane toy;

Ano ty hoe:

Fa jineba’ Iehovà ty mpitoro’e Iakobe.

21 Ie tsy nitaliñiereñe te niaoloa’e hitsake o fatram-beio;

Nampipororoaha’e rano i vatoy;

tsinera’e i lamilamiy vaho

nidoandoañe i ranoy.

22 Po-panintsiñañe, hoe t’Iehovà,

o tsivokatseo.