6
Ty Vohi’Iehovà
1 Tamy taoñe nihomaha’ i Oziày, le nitreako miambesatse am-piambesatse abo naho nonjoneñe t’i Talè vaho nahaatseke i anjombay ty saravi’e. 2 Nijohañe ambone’e ey o seràfeo* Serafe: anjely ambane’ lohà’ o kerobeo; songa aman’ elatse eneñe, ty roe nanakoñe ty lahara’e, ty roe nanaroñe o fandia’eo vaho nitiliñe ty roe. 3 Ie nifampikoike ty hoe : Masiñe, masiñe, masiñe, t’Iehovà’ i Màroy; lifotse ty enge’e ty tane bey toy. 4 Nampiezeñezeñe o tokonañeo i feon-koikey, vaho natsafe’ ty hatoeñe i anjombay.
5 Le hoe raho, Hankàñe amako, rebake, fa ondaty maleo-tsoñy, vaho añivo’ ondaty maleo-pivimby ty itobohako; fa nahatrea i Mpanjakay, Iehovà’ i Màroy, o masokoo. 6 Nitiliñe mb’ amako amy zao ty seràfe ninday vato mirekake am-pità’e, ie rinambe’e an-tsadrò boak’amy kitreliy ao, 7 le natoho’e ami’ty soñiko naho nanao ty hoe: Hehe, tinoho’ ty raha toy o fivimbi’oo, vaho finaoke o tahi’oo.
8 Tsinanoko ka ty fiarañanaña’ i Talè nanao ty hoe: Ia ty hiraheko, vaho ia ty homb’eo ho anay? Le hoe raho: Intoy raho; iraho! 9 Le hoe re: Akia, le saontsio am’ondaty retoañe:
Toe mijanjiñe nahareo fe sy mahafohiñe,
mañente fe tsy mahaoniñe.
10 Ampibobòho ty arofo’ ondaty retoa,
le ampivalagìño o ravembia’ iareoo,
akipeo o fihaino’ iareoo;
tsy mone hahaisake o fihaino’ iareoo,
naho hitsendreñe o ravembia’ iareoo,
naho hahafohiñe o arofo’ iareoo,
vaho himpoly ho jangañeñe.
11 Le hoe raho:
O Talè, pak’ombia?
Le hoe ty natoi’e:
Ampara’ te kòake o rovao
tsy amam-pimoneñe,
naho tsy ama’ondaty o anjombao,
vaho vata’e ratraratra i taney,
12 ie fa naveve’ Iehovà añe ondatio,
vaho maro ty toetse hoakoake
añivo’ i taney.
13 Aa ndra te i faha-folo’ey ro sehanga’e,
mbe habotseke avao;
fe manahake te mbe eo ty foto’
o mendoraveñeo naho o kileo
t’ie firaeñe,
le i tiry miavakey ty ho foto’e.
DRAFT VERSION