២ ផះ អន់ឌែ កាតាំង អ៊ែ កាប ហេព្រឺ នីណោ័ះ ហ៊ែង ណោះ ហង អន់ឌែ អ្វៃ រ៉ាង៉ាប់ រ៉ាអ៊ែត។ ប៉ូល កា កាប ផា ៣ «អាញ់ ឃឺ សុនសាត អ៊ីស្រាអ៊ែល កើត ពឹង មឿង តើសុះ ពឹង ខេត គីលីគៀ។ ហះកា អាញ់ អ្វៃ ពឹង មឿង យេរូសាឡឹម អា ឡឹង អ្វៃ សាស្វា ទឹប ទី វគ័ កាម៉ាលៀល ប៉ាំងហៀន អាញ់ តុត ខាក់ ឡឹង ចាបាប់ វគ័ យ៉ាគ់ ពិន។ អាញ់ ខំ ប៉្រគ័ ង៉ារ ប‌៉្រ័ះ ប៊កកាតយ័ ឡាក់ កា អន់ដីស ទិឌូ កាណុង ដារ់ អា ដេល។ ៤ អាញ់ កា ឃើយ ប៉្រគ័ អូ ដាគ់ កា មួត សឿ យីស៊ូ លូ ប៉ាន់តោ័ អន់ឌែ ទឹប រ៉ុប ចគ់ អន់ឌែ ទឹប កាម៉ាក័ ទឹប អង់កាន់ អ្យក់ ចៃគ ខុក ដេល។ ៥ យ‌៉័ះ មួត ម៉ៃគ ក្រាគ់ រ៉ាម៉ះ ប‌៉្រ័ះ លូ មួត ក្រាគ់ តាំងកង់ ទិឌូ កា ប៉ប័ អាញ់ ប៉្រគ័ នីណោ័ះ ដេល។ អាញ់ អ្យក់ សត់ត្រា ឡឹង អន់ឌែ ណោះ អន់ ឡាំ រ៉ុប ចគ់ មួត សឿ យីស៊ូ អ្វៃ ប៉ាគ់ មឿង ដាម៉ះ ភឿ អ្យក់ ចៃគ ថូត អន់ឌែ ប៉ាគ់ មឿង យេរូសាឡឹម។

៦ «ហះកា ទី សារ ម៉ោញ កើត ពឹះ ពឹង អាញ់។ ផះ រ៉ាំងវ៉ាង ដារ់ ប៉ង់ ផះ អាញ់ ចាក ក្យាម័ ចឹង ទឹល មឿង ដាម៉ះ កេះ ផាឌី កា ទី តាតារ ក្លាគ់ ឡឹង ប៉្លៃង ជុំ អាញ់ ឡូត។ ៧ អាញ់ កា ប៉ក់ កេះណោះ កាតាំង ប៉ានឹរ កាប កា អាញ់ ផា "សូល អឺ សូល ញ៉ា ត្រគ់ អីស ប៉្រគ័ បាប កា អាញ់ នីអៀ ?" ៨ អាញ់ តើល ផា "អឺ ពឹ តាំងឡា ពឿ អីស ណោះ ?" អ៊ែ តើល ផា "អាញ់ សិច យីស៊ូ ឡឹង តេះ ណាសារែត ឡាក់ អីស ផះ ប៉្រគ័ បាប"។ ៩ កាប៉ាច់ មួត ចាក អន់ឌូ លូ អាញ់ កា ប៉ប័ តាតារ ក្លាគ់ ណោះ ដេល ហះកា អូ កាតាំង ប៉ានឹរ កាប ណោះ អុះ។ ១០ អាញ់ កា អំប៉ញ់ ណាវ្គ ផា "អឺ ពឹ តាំងឡា អាញ់ ត្រគ់ ប៉្រគ័ នីចម័ ?" អ៊ែ តើល ផា "ហគ់ អ្យូវ ឡាំ ប៉ាគ់ មឿង ដាម៉ះ តោ ពិ ប៉ាគ់ ចារ ណោះ ពូ ចឹង រ៉ះ ឡឹង ង៉ារ ឡាក់ ប‌៉្រ័ះ ចឹង ប៉្រើ អីស ប៉្រគ័"។ ១១ ញន កា តាតារ ក្លាគ់ ណោះ ប៉្រគ័ អន់ កា អាញ់ ម៉ាម៉ាំង ម៉ាត់ ហៃ ញ៉ា កា អូ ប៉ប័ ទឹល នីណោ័ះ មួត បក់ ចាក អន់ឌូ លូ អាញ់ ទុង តី អាញ់ ចាក ម៉ុត កាណុង មឿង ដាម៉ះ។

១២ «ពឹង មឿង ណោះ ទី កាម៉ាក័ ម៉ោញ ដូវ សិច អ៊ែ អាណាណះ ឡាក់ អ្យិល កូត័ អ្យូគ កា ប‌៉្រ័ះ ប៊កកាតយ័ លូ ប៉្រគ័ ពួយ ចាបាប់ ប‌៉្រ័ះ។ សុនសាត អ៊ីស្រាអ៊ែល អ្វៃ ពឹង មឿង ដាម៉ះ ណោះ កា ការ៉ុប អ៊ែ ទិឌូ។ ១៣ អ៊ែ កា ឡាំ ប៉ាគ់ ចារ អាញ់ កេះណោះ អ៊ែ កាប ផា "អឺ ម៉ី សូល ហគ់ អន់ ម៉ាត់ អីស តាតារ ឡគ ពិ"។ ម៉ោញ ទ្រុ ឡឹង ណោះ ផាឌី អាញ់ ហៃ អ៊ែ ប៉ប័ ឡូត។ ១៤ អ៊ែ រ៉ះ ផា "ប‌៉្រ័ះ វគ័ ពិន អ៊ែ អ្យក់ អីស ភឿ អន់ អីស អន់ហ្នាល់ ពុត ពៀក អ៊ែ អន់ អីស ប៉ប័ សាដាច់ ដាគ់ ត្រង់ លូ អន់ អីស កាតាំង ប៉ានឹរ អ៊ែ ១៥ ខង អីស ចឹង ប៉្រគ័ ផាញ៉ាន កា អ៊ែ រ៉ះ កា ប៉ាណូស ទិឌូ ឡឹង សារ ញ៉ា ឡាក់ អីស ប៉ប័ លូ កាតាំង ឡឹង អ៊ែ។ ១៦ កិញអៀ អា អីស អ្វៃ ក្យាគ់ ញ៉ា ណាវ្គ ? ហគ់ អ្យូវ អាញ់ ចឹង ប៉ាំងហុំ អីស។ ហគ់ ឡោម យីស៊ូ ពិ ភឿ អន់ អ៊ែ អ៊្យូត ឡាច់ សារ យច កា អីស"។

១៧ «ប៉ាគ់ អាញ់ សឹត ប៉ាគ់ មឿង យេរូសាឡឹម ណាវ្គ ផះ អាញ់ អ្វៃ ម៉ន់ អើ ប‌៉្រ័ះ ពឹង ចារ រ៉ោង រ៉ាម៉ះ អាញ់ អូ ហ្លង់ ប៉ាណូស ញន កា ប‌៉្រ័ះ ប៉ាំងខ្វាង័។ ១៨ កេះណោះ យីស៊ូ តាំបាង ឡាកោ អន់ កា អាញ់ ប៉ប័ លូ រ៉ះ កា អាញ់ ផា "ហគ់ ចាក ឡាច់ ឡឹង មឿង យេរូសាឡឹម អា ស៊្រសៗ កិញអៀ ហង ពិ ខង មួត អ្វៃ ពឹង មឿង អា អូ ចៃ សាំយ៉ាំង ប៉ានឹរ អីស រ៉ះ ឡឹង សារ អាញ់ ណោះ អុះ"។ ១៩ អាញ់ កា តើល ផា "អឺ ពឹ តាំងឡា មួត ទិណោ័ះ អន់ឌែ អ្លុ កេះ កា អាញ់ ឃើយ ម៉ុត កាណុង រ៉ោង ចារ ពូ លួម អៀង ចារ ណាំង រ៉ុប មួត បក់ សឿ អីស លូ អន់ ពូ ចៃគ ខុក ទឹប ពីត សាប៉្វាត័ អន់ឌែ ដេល។ ២០ ផះ ពូ ប៉ាន់តោ័ សាតេផាន ឡាក់ ប៉ាណូស រ៉ះ សារ អីស ពែ អាញ់ កា អ្វៃ ហះ ណោះ អាញ់ រែវ ពុត លូ ពូ ដេល ទឹប អ្វៃ ក្យាគ់ ខោ អាវ កា មួត បក់ ប៉ាន់តោ័ អ៊ែ"។ ២១ ផះ ណោះ យីស៊ូ រ៉ះ កា អាញ់ ផា "ចាក ពិ ខង អាញ់ ចឹង ប៉្រើ អីស ឡាំ ណាំង សុនសាត អន់ទៀគ ឡាក់ អ្វៃ ប៉ាគ់ ចាំងហាយ្គ"»។

២២ មួត ប៉ាសុន សាំយ៉ាំង ប៉ូល រ៉ះ ទឹល គឹត អា កេះ ពូ កា កាប ម៉ៃៗ ផា «ប៉ាន់តោ័ អ្លាត ពិ ប៉ាណូស នែវ អា ជែ គម អន់ អ្វៃ រ៉ីស ហង»។ ២៣ ផះ អន់ឌែ កាប ម៉ៃៗ លូ ហឹរ អ្លាត អាវ អន់ឌែ ទៅ ទឹប ចី តេះ ពឹង ប៉្លៃង ២៤ ម៉ៃគ តាហាន កា ប៉្រើ ពូ អ្យក់ ម៉ុត ប៉ូល កាណុង ចារ តាហាន លូ ប៉្រើ ពូ អំប៉ញ់ ទឹប ពីត លូ កាស៊ែ ប៉្លៃ ម៉ាត់ ភឿ ប៉ិច អ្លុ ខ ញ៉ា បះ មួត ប៉ាសុន កាប អឺក កា អ៊ែ នែវ អា។ ២៥ ផះ ពូ អ្យក់ កាស៊ែ កត់ ប៉ូល អ៊ែ កាប លូ ម៉ៃគ តាហាន ម៉ោញ ណាវ្គ ឡាក់ អ្វៃ ក្យាម័ ហះ ណោះ ផា «ញ៉ា អន់ដីស ទី ចាបាប់ ពីត ប៉ាសុន រ៉ូម ឡាក់ បើ តាន័ តាត់ស៊ិន សារ ដេល ប ?» ២៦ ម៉ៃគ តាហាន ណោះ កាតាំង អ៊ែ ផា នីណោ័ះ កា ឡាំ រ៉ះ លូ ម៉ៃគ តាហាន ឡាក់ តីស ឡឹង ពូ ផា «អីស ចឹង ឃឹត ប៉្រគ័ នីចម័ កា ប៉ាណូស ណោះ ខង អ៊ែ ប៉ាសុន រ៉ូម នីណោ័ះ ?» ២៧ ម៉ៃគ តាហាន ឡាក់ តីស ឡឹង ពូ ឡាំ អំប៉ញ់ ប៉ូល ផា «ប៉រ់ អីស រ៉ះ ហៃ កា អាញ់ ញ៉ា អីស អា ប៉ាសុន រ៉ូម តាទឹច ប ?» ប៉ូល តើល ផា «អឺះ អាញ់ ប៉ាសុន រ៉ូម តាទឹច»។ ២៨ ម៉ៃគ តាហាន ឡាក់ តីស ឡឹង ពូ កាប ណាវ្គ ផា «អាញ់ ឡាច់ លៀន អៀង ខាក់ សុំ ទី ម៉ុត ប៉ាសុន រ៉ូម»។ ប៉ូល តើល ផា «អាញ់ ឃឺ ប៉ាសុន រ៉ូម ឡឹង កើត ឡូត»។ ២៩ មួត បក់ ឃឹត ចឹង អំប៉ញ់ លូ ពីត ប៉ូល អន់ឌែ កា ឡាច់ ឡឹង ចារ ណោះ ឡូត។ ម៉ៃគ តាហាន ឡាក់ តីស ឡឹង ពូ កា អ្យូគ ដេល ផះ អ៊ែ អ្លុ អន់តគ់ ផា ប៉ូល ឃឺ ប៉ាសុន រ៉ូម ខង អ៊ែ ប៉្រើ ពូ កត់ ចគ់ ប៉ូល។

៣០ ប៉ាគ់ ដារ់ តាយ៉ាង័ ម៉ៃគ តាហាន តោះ ឡើយ ប៉ូល កេះណោះ រ៉ះ កា មួត ក្រាគ់ រ៉ាម៉ះ ប‌៉្រ័ះ លូ ក្រុំ ពឹកសា រ៉ាតីស ទិឌូ អន់ ពឹះ ប៉ាតុំ គួប សោប។ កេះណោះ អ៊ែ អន់ ប៉ូល អន់តាវ ហះ ង៉ីរ អន់ឌែ ភឿ ប៉ិច អ្លុ អន់តគ់ ខ ញ៉ា បះ សុនសាត អ៊ីស្រាអ៊ែល អូ ណីស កា ប៉ូល នីអៀ។